Waɗɗiino e jamaanuuji, bojel e njuuraa. Ɓe jaadiraaɓe, ɓe tawanoo. Njannde gom bojel wi'i njuuraa ɓe tewta no ɓe ngaɗi koo naangere maɓɓe woɗɗoke. Njuuraa miilii; ndaari nano e nyaamo de wi'i bojel: "E miilo am walaa no ngaɗen ta naangere nde wara en so wanaa inniraaɓe men cottuɗen." Heddii bojel bonnanay o. Ɓe kaaldi fa ɓe poti, heɓa so weeti ɓe nanna inniraaɓe maɓɓe luumo.

Weetunoo ni mono fu waddi innam. Bojel haɓɓiri innam palle. Njuuraa haɓɓiri innam raande lobbere tekkunde nde hawilawaaka.

Nanaa na ɓe njaha, mono fu na ɗowi innam. Bojel yo ɓoccooɗe loowi. So ɓe njehii seeɗa, ni bojel yoppa ɓoccoonde wootere fotta de wi'a: "Njuuraa, inna am muuyi teetaade de piw-mi ɗum." Ni njuuraa du ada sawru fiya innam de wi'a ɗum, mi jaynete nih so a muuyii ta'nyude.

Wari ɓe ɓadii luumo. Bojel wi'i innam difoo. Ba waɗan seeɗa ni bojel halɓi. Njuuraa wi'i: "Koree jam!" Bojel yo fiifoto, yo nyittoto: gomngol to, nyilɓere ga. Bojji tan. Njuuraa watti ƴami: "Koree jam!" Bojel wi'i: "A yi'ay ko inna am teetii ɗum." Njuuraa wi'i: "Hulu Alla de celaa bojji maa ɗi. Gaɗa inna am ta'nyay ni baasi walaa. So en cottii ɗum ni danyan ko sukkani en." Ni bojel deƴƴinii. Be ndewondiri faa ɓe naati e luumo. Ɓe cotti inna njuuraa ɓe coodi daandi.

Kiikiiɗe warnoo ni njuuraa e bojel adi laawol wuro muɓɓoy. Na ɓe njaha. Ɓe njehii, ɓe njehii ni bojel wi'a selan. Njuuraa heddoo na yaha. Bojel dogga maytinkinoo yeeso. Njuuraa yottoken tawii wojere na waalii ni tiima, de yoppa wi'a: "Ndaaree ɗo wojere waati!" Nih faa waɗi kile kewɗe. Wari njuuraa darii miilii de wi'itii ko so suɓanno boje ɗe yi'i na mbaati dow laawol ɗe, ni heƴƴiino ko hebbina bootooru honda. Watti bojel wari hewtii o. Ɓe adi laawol na ɓe njaha.

Bojel watti wi'i selan. Ɗum selunoo ni njuuraa haɓɓi daandi de yeeƴanii boje ɗe yi'unoo dow laawol. Bojel lutti njuuraa. O nanngi daandi ndi o hirsi, o adi teewu mayri o mooɓoy de o adi lacol o ufi e honndorde faa yoolii, yoppi seeɗa na fuunta.

Ba ɓooyal ni njuuraa warti na ɓalinii. Bojel wi'i: "Noy hey?." O wi'i: "Won ko o yeeƴaninoo de o tawoway. Ni njuuro ummanii ɗo haɓɓunoo daandim. Toy daandi woni ? Njuuraa tewti yiitay. Nde wootere ni bojel yoppi wi'i: "Njuuro, war ndar honndorde moɗii daandi maa yoppi laccol yaasi. Njuuraa doggi yottii. Muuyi nangude laccol fooɗa. Bojel wi'i ta o waɗanoo so wanaa o haaja lacol ngool taƴa. O yoppa ɓe mbasa.

Heddii njuuro yedday konngol bojel. Ɓe tefoy gollitirɗi ɓe ngari ɓe puɗɗi wasude. Oo wasii somii ni oo to jaɓa. Manngal ladde warowi tawi ɓe ɗoon. Wi'i jaɓanan ɓe. Jaɓani ɓe na wasa. Wasii ni gineejim luuloo. Luuloroo nano, luuloroo nyaamo. Ni njuuraa na ndaara. Ni na ndaara. Walaa fu ko miilotoo e ɓeerndem so wanaa dogga taƴa luulotooɗe manngal ladde doggida.

Njuuraa ndaari luulotooɗe mannngal ladde faa ɓooyi. So ɗe luuloroke nano ni njuuro luuloroo nano. So ɗe luuloroke nyaamo ni njuuro luuloroo nyaamo. Nih faa ɗo njuuro yoppi wi'i e ɓeerdem: "Waɗii ko janninii; wasa uuta nyaamdu de nani nyaamdu na luuloo; ɗume ngaɗam mi ndi daandi so mi heɓii ɗee luulotooɗe ?"

Jaka ko njuuraa miilotoo e ɓeerndem teetoke wuytoke yaasi faa bojel nanii. Kam du heensii ƴamtinii njuuro. Njuuraa wi'i miilataakonaa leeɓaa jooɗoo de mawɗo ladde na wasa. Manngal ladde jaabii wi'i ɗuum walaa baasi. Ni na wasa.

Ba waɗan seeɗa ni njuuraa wi'i e ɓeerndem: "So neɗɗo heɓii ɗe luulotooɗe ni walaa ko waɗa ndi ufiindi." Bojel watti nani. ƴamtinii. Njuuro wi'i a nanii ko miilotoo-mi ɗum! Mi wi'aanaa kokkoraa kam pemmborki." Ni bojel haɓɓiti bootoorum itti pemmborki hokki. Ni watti miilo njuuro teetii. Ni bojel watti ƴamtinii ko o haajaa. Njuuro jaabii wi'i yo bootooru ɗaɓi. Bojel soorti bootowel hokki o. Ni manngal ladde na heddii na wasa. Ni gineejim na luuloo.

Njuuro harbitii ummii. Ba maƴƴere ni taƴi luulotooɗe manngal ladde watti e bootoorum de itti gullal. Bolonngu ɓantii. Manngal ladde boɓɓii na ɓoyloo naawu e dukkuru.

Bojel naatondiri e sawrinde manngal ladde. O ɗaɓɓi ɗum, ɗum fewna ɓeerdem ko so Alla jaɓii ni njuuraa heɓete. Manngal ladde wi'i so njuuraa heɓaaka ni bojel hirsete. Kulol ƴeenyi bojel.

Bojel heɓunoo seedi e manngal ladde ni miilii no jey waarude. Hedii heɓi hakkillo. O nili adunaaru fu haalanaa koo hiiro manngo woodi.

Nyalaande fini. Walaa ɗo adunaaru ƴuurataa. Bojel ndaari nano ndaari nyaamo, yi'ay njuuraa. Itti nilaangal yehi ɗo njuuraa. Nilaaɗo yottinoo wuro njuuraa ni ƴami salle njuuraa na ɗoon. Dey njuuraa jaabii wi'i: "Njuuro maayii faa mooɓaama." Nilaaɗo bojel wi'i: "Gasay, nyaamduuji kewɗi, feere-feereeji ɗi, de njuuraa kay maaya." Tawi njuuraa faa logologo suudu wonnoo. Harbitii wuytii de wi'i: "Moy mo Alla haɗi wodde wi'i koo min njuuro mi maayii. Ley wuro, de wara, ɓuruɓe bonde yonki ɓuri ɗudde. Neɗɗo waree illa maydem waray." Yoppi dey njuuro darii na semti.

Njuuro naati ley suudu adi hoddum de dillani hiiro. Ɗo, wanaa ɗo faa yottowi.

Njuuro yottinoo ni nannowaa nder danki. Teewu na tibii faa ɓuri jonndem toowude. Ittii asangal ga, ni itta heere to. Hunnduko yo nyaaman, yo yiman. Guri be'i e baali na luuloo. Njuuraa juwi seeki jimol:

Njuuro yimii, ni heenta teewu faɗɗa e hunnduko. Njuuraa ƴakki teewu faa tilde ɓuytii. Wari na o yi'a ko wojji na fuunta. Jaka yo manngal ladde ufii ley tilde teewu. Kuungel bodeyel puuntannoongel wari waylii yitere woɗeere. Njuuraa ndaari faa wooɗi. Annditii ko yitere yo yitere manngal ladde. Nde wootere cirwol ƴeenyi o. Gaasi mbattitaa. Hoddu na hoɗira:

Ni hoddu na fewta. Ni koɗoowo na diwna. Nde warnoo faa laaɓani njuuraa koo yo manngal ladde saawii nder tilde teewu, ni hoddu faɗɗaa. Danki yulaa. Nanaa bolonngu njuuraa. Ɗo, wanaa ɗo ni manngal ladde hewtowii o liɓi.

Ndelle en cela eelgal.