Waɗiino e jamaanuuji, loohotooɗo wonnoo de loohoorum wuuri. Nde fini fu o naatan ladde. Alla e loohooru makko o jogorinoo wuro makko.

Nyannde gom loohotooɗo men dilli loohooru. Na yaha. Ni na yaha. O wari o faami woɓɓe na nodda. O hettinii faa wooɗi. O tawi noddaandu ndu yo nder ɓunndu ƴuurata. O yehi ɓunndu toon. O tawi yo waandu, gusuuru, mboddi e ɓi-aadama mboɓɓi toon. Walaa fu no ɓe ngaɗay de ɓe mbaaway wuytaade. Gaɗa loohotooɗo o, warii, ɓe keddii ɓe ndookii ɗum walla ɓe, ɓe mbuytoo. O ƴami ɓe salle o wuytinii ɓe, ɓe njoɓan o moƴƴere lobbere. Waandu wi'i yoɓan. Ɓe fu ɓe njaabii ɓe mbi'i ɓe njoɓan. O lamndii ɓe faa wooɗi salle ngoonga fu ɓe njoɓowan moƴƴere nde. Ɓe fu ɓe mbi'i so Alla jaɓii ɓe njoɓan.

Loohotooɗo yehi soppowi leggal wari tummbi nder ɓunndu. Ɓe nayo fu ɓe ndewi ɓe mbuytii. Ɓe njootondiri faa jootiiru yottii de mono fu adi laawol mum. Worndi noon faa waɗi duuɓi.

Nyannde gom ɓii-loohotooɗo dilli loohooru de lallowi. O anndaa lettugol o anndaa gorgal. O yahan na o yayyayta. Wari o ɗomɗi. O heddii na o yaha faa ɗo domka ka, warowi liɓi o. O daasii o yottii nder ɗoogi. Waandu warowi tawi o ɗoon. Yi'unoo o, ni annditi.

Waandu ƴamtinii o: "Wanaa aan tawdanoo e bammaa mballondirɗon mbuytinɗon min e ɓunndu, min, gusuuru, mboddi e ɓii-aadama remmbe gooto?." Suka gorko wi'i wallay yo kanyum. Waandu men ittowi ndiyam wari hokki o, o yari faa o ɗomɗiti de yehi hollowi o feto. O naati o lootii. O londinoo, o tawi waandu waddanii o nareeri faa heewi. O watti nareeri ndiyam, o nyaami de o heddii o yooɓii.

Waandu wi'i a walliino kam mi wuytoke e ɓunndu, mi wi'iino mi yoɓan moƴƴere, ɗum wonnoo ko mbaawum yoɓude fadde. Ni ɓe mbaynondiri.

Suka gorko adi laawol. Wari hawri gusuuru. Ɓe njootondiri. Gusuuru annditi o. Wi'i wanaa aan e bammaa mbuytinnoo kam e ɓunndu? O wi'i ayoo. Tawi gusuuru na ronndinoo bootooji kanŋe e cardi ko wujjoynoo nder kiɓeeje kinɗe. O adi bootooji ɗi fu o kokki suka gorko. O wi'i yo moƴƴere hinnde nde o yoɓɓiri. Heddii ɓe njootondiri. Ni ɓe mbaynondiri.

Suka gorko heddii na yaha. O yehi faa naange saami. O wari o naati nder wuro. O filii ɗo o waala. O yottii dammbugal ɓaade goɗɗo o salmini. Jom ɓaade wuytii. Ɓe annditondiri. Kam, suka gorko e bammum mbuytinnoo e ɓunndu. Jom ɓaade wi'i o naata. O naati. Ɓe njootondiri faa jootiiru timmi. Daɗɗaare daɗɗaa. Wawlaare dekaa. Beero fukkii. Hiraande waddaa. Ɓe kiirtii. Ɓe kiirtodinoo ni ɓe puɗɗi hiiro. Oo haala timmina, oo to ada haala. Haala waddi haala ni beero haalani jom ɓaade ko waandu e gusuuru ngaɗani ɗum. O wi'i na o haaja jom ɓaade walla o, o sotta kanŋe mo gusuuru hokkori o, o, seeɗa o waɗa njooɓaangu makko. Jom ɓaade wi'i ɗuum walaa basi. Jam finii ni heɓanan o coodooɓe kanŋe e coodooɓe cardi. Jemma jenngunoo ni ɓe mbaynondiri. Mono fu wi'i ɗaanoyto.

Jom ɓaade naati ley suudu jooɗii. Beero makko warowi na hara. O annditi ɗum ɗaani. O soosii o wuytii ɓaade. O dilliri wuro kaananke. O tawi kaananke yo ɗaani. O jooɗii o heɗii heɓa fina. Dontooje mboyunoo ni kaananke fini. Wuyɓinoo fu wuytii yaasi. Tawi gorko men na joodii na heɗii ɗum. Ni kaananke ƴami: "Koree jam de kejjirɗaa nih?" O wi'i: "Amiiru, tilay de mi hejja. Gujjo kanŋe e cardi woni wuro am to na fukkii. Bootooji ɗiɗi kanŋe e bootooru cardi wootoru o jogii. E miilo am, aan leɓdi e jawdi ndi. Saboo mi yi'ay fu ko o waɗa ndi. Pusi yadi yo o gujjo." Kaananke wi'i, so kanŋe e cardi o hebbini bootooji ni o gujjo. Mi nilanan o.

Kaananke itti nilaangal dillani suka gorko. Ba neeɓan ni o waddaa. O haɓɓaa gaɗa kohoogol hoggo na'i na o uuma toon. Tawi mboddi na waranannoo coppe. Faamunoo na o uumma ni ɗakkii heɓa humpitoo. O annditii gorko kaɓɓaaɗo. Nde wootere ni yurmeende naati o. Mboddi diri yottii de ƴami: "Aan giɗo Alla mbuytinnooɗo min e ɓunndu o, haɓɓaa ɗo! Ko saabii?" O jabii: "Mboddi! ko ndimmunoo mi waɗi. Tagaaɗo mo tawdanoɗaa e ɓunndu o, waɗi kaɓɓaa-mi. Mboddi wi'i ta o mettina ko so Alla jaɓii o ittan ɓeernde. Mboddi itti roosi hokki o de wi'i yahan ŋatowa ɓii kaananke.

atangal ngal naawan faa hulee. Ɗo roosi woni fu nilante.

Heddii mboddi ŋati ɓii kaananke. ƴiiƴam walaa ɗo wuytortaako; yo wubbiran gite yo wubbiran noppi. Walaa ɗo wuytortaako. Kulol ƴeenyi kaananke. Nilaaɗe heɓa roosi waddowee lalli e ladde. Nde kaɓɓaaɗo men yi'unoo nilaaɗo gooto na yaha fu, noddi ɗum nili ɗo kaananke. O wi'i kaananke haalanee koo na o jogii roosi lobbi. Kaananke haalanowaa. Itti nilangal wari haɓɓiti o waddi. O yottinoo o tiimi ɓii kaananke ni o hucciti kaananke. O wi'i ɗum na o jogii roosi de ɓii-ɓeernde naafiki hawrondintee. Kaananke ƴami ɗo naafiki heɓetee. O wi'i beero mo o jippanii de waɗi o haɓɓaa o yo naafiki. Ni naafiki-men haɓɓaa faa ŋeeti de hirsaa. Ɓii-ɓeerndem itaa hawrondinaa e roosi hokkaa ɓii kaananke yari. Yarunoo ni daɗi. Ɓeernde kaananke weli. Ɓotti jawdi faa heewi hokkori o. Ndelle so neɗɗo waɗanii ma, so a yoɓay ɗum moƴƴere lobbere du, tinna ta njoɓɓaa ɗum ko boni.