Babel nama'ar
1 Nata usi'ik ewal,
na Ubu Ni sansinir liak isa vali ntali lanit ratan nsuta.
Ni ngrebat a dawan urun,
ovu vanan a nfitik nyadat ma notu ma lanit ivavan ini lyawan urun.
2-3 Ia nafwak ma vain a dawan urun ma nfalak ne,
“Kota dawan Babel nama'ar roak!
Kota dawan Babel nama'ar roak,
tevek tamata ovi rna'a kota yai ralan a rotu ma bangsa ra munuk na'a lanit ivavan wol rorang Ubu.
Tamata ovi rna'a kota yai wearira lahir vata i nfanavuk brana ra ovu anggur,
boma nfaleka ira ma rot-orang ni ininan sian ma rsifa tia ma watan ovu tamata ovi wol awarira verin ira.
Raja ovi rna'a lanit i vavan a munuk rsifa tia ma watan ovu tamata ovi rna'a kota yai,
velik ne wol awarira verin ira,
ovu vali tamata ovi rfedi-rfaha afa na'a lanit i vavan ini rka'i,
tevek ni ininan sian i mane ni munuk afa ovi fyawar a.
Ba kota dawan yai nama'ar roak,
ma nitu ra ovu nait sian ra,
rturat roak na'a kota yai,
ovu vali kota yai neluk wan fanfonak verin manut nangan ovi tamata ra rkasiri ovu wol inar lahir ira.”
4 Urenar vali vai liak isa ntali lanit ratan.
Vai yai nfalak ne,
“Ning tamata ovi rorang Ya'a,
byan-talik kikyai kota ini!
Deka myorang rira salasilan ra,
boma sian i veka nkena kota yai wol nkena mia.
5 Ba kota yai ni salasilan ra,
wean i rsita'i teta roak ma nrata naran lanit ratan,
ovu Ubu wol nablufang afa sian ovi notu ra.
6 Myotu sian kota yai,
wean i lan a notu sian roak bira tamata ra.
Mia musti myotu ma sian a nrahi nala farua verin ia na'a afa ovi notu ra.
Sian i verin kota yai wean kobi i nvua anggur kfera-kfuran.
Anggur yai msyileti ma ni kfera-kfuran a nrahi nala farua tali anggur i nala verin tamata liak.*
7 Myotu lahir ma nfarnuang wawa'uk i dawan urun a,
ma inovan ovu ni kaka'i a ovu ni kul dawan ma nfakaratat tenan a.
Ia nfikir na'a ralan ne,
‘Ya'a ufareta wean ratu,
ya'a wol varu ya'a,
ovu vali ya'a ufena lahir ma ralang lalau.’
8 Ba afa avyai rotu mi na'a amar isa watan,
na sian ovi dawan urun i lahir yai veka rma lahir.
Sian avyai wean suhut aleman,
lalau i dawan urun ia a,
ovu vali lafar dawan.
Yafu dawan veka narang kota yai,
tevek Ubila'a Ni ngrebat a dawan ma nukun ia.
9 Na'a lanit i vavan ini,
na raja ovi rsifa tia ma watan roak ovu tamata ovi rna'a kota yai,
velik ne wol awarira verin ira.
Raja avyai vali rka'i roak ovu kota yai,
ba veka rvakar ma rfaktanit ia na'ut i rarea yafu i nasnuri kota yai uman a.
10 Ira veka rdiri ma raroa ila'a ira,
tevek rbobar ni inukun i sian urun yai ma rfalak ne,
‘Ya'i yo.
Sian urun i lahir,
sian urun i lahir Babel,
kota dawan eri.
Kota Babel eri kota i nangrebat urun a,
na'uk jam isa watan,
na mu inukun i ntali Ubu ka'i nkena roak oa!’
11 Tamata ovi rfedi-rfaha afa na'a lanit ivavan ini rvakar urun ia lahir,
ovu vali wol tamata roak ma rfaha rira afa ovi rfedi ra.
12 Wol tamata roak ma rfaha masa ovu perak,
vatu masmasa i fyawan urun a,
ovu mutiara,
maloli lolin i naran lenan a ovu maloli ungu,
maloli sutra i masmasa ovu maloli valvulin i wean lara.
Wol tamata roak ma rfaha aa voan lolin ra,
afa rivun ovi rotu tali gaja nifan a,
afa rivun ovi rotu tali aa ovi fyawan urun a,
afa ovi tali tembaga,
tali tma'an,
ovu marmer.*
13 Wol tamata roak ma rfaha rira aa lolin ovi manminak ra,
afa ovi voar lolin ra munuk,
mur ovu kemenyan,
anggur,
ngul zaitun,
mangal i manminan urun a ovu gandum,
sapi,
domba,
kuda,
garobak,
ovu tamata sansinir,
ovu vali tamata nan a.
14 Tamata ovi rfedi-rfaha afa avyai veka rfalak verin Babel ne,
‘Afa ovi ralam nfalak ra rmamu roak,
ovu mu afa ovi fyawan urun ovu ryadat tia ma watan,
wol rleal munuk roak.
Oa veka wol mtuan roak afa avyai.’
15 Tamata ovi rfedi-rfaha afa avyai rka'i roak,
tevek rfedi rira afa avyai verin Babel.
Ira veka rdiri ma raroa ira,
tevek rbobar Babel ni inukun i nkena ia yai.
Ira veka rvakar ma ralarira lalau urun,
16 ma rfalak ne,
‘Ya'i yo.
Sian urun i lahir Babel,
kota dawan yai.
Lan ana,
ia ba'i neluk a'uk maloli i lolin naran lenan,
maloli ungu i fyawan urun a,
maloli valvulin i navuli ma wean lara ma felan a lolin buas,
maloli ovi rdamur ira ovu masa,
ovu vatu masmasa ovi fyawarira urun a,
ovu vali mutiara.
17 Na'uk jam isa watan,
na metan rivun avyai veka rmamu lahir!’
Tamata i ntaha fareta na'a kabal,
ovu ni tamata ovi rkarya na'a kabal,
ntafal vali tamata ovi rafnavul kabal a,
rdiri ma raroa ira.
18 Na'ut i rsi'ik yafu i narang Babel uman a,
na ralarira lalau ma rfalak ne,
‘Kota ba ma wean kota dawan ini?’
19 Ba ira rala kfuan ma relik na'a ulurira ra ma al nfaturu ne,
ralarira lalau urun,
beti rvakar ma rafwak ila'a matan ma rfalak ne,
‘Ya'i yo,
sian urun i lahir kota dawan eri.
Ni metan a notu ma tamata ovi rira kabal ra rka'i.
Na'uk na'a jam isa watan,
na ni afa avyai wol rleal munuk lahir!’
20 Ba Ubu Ni sansinir tali lanit ratan nfalak ne,
‘Ba ovi mnya'a lanit ratan munuk myotu inabira lolin,
tevek Babel nama'ar roak!
Fara inabira lolin watan tamata ovi bira vava'at ra rmalola,
ovu Ni rasul ra ovu Ni nabi ra!
Ubu nfaleka roak inukun verin kota yai,
tevek ni afa sian ovi notu verin mia.’ ”
21 Nata Ubu Ni sansinir ngrebat isa tali lanit ratan nsikat vatu dawan isa ma nasba vatuk nti tahat ralan ma nfalak ne,
“Ubu veka nala ngrebat dawan i wean ini a,
ma nkama'ar kota dawan Babel,
wean ya'a usba vatuk vatu dawan ini ma wol trea roak ia.
22 Na'a kota yai ralan a,
tamata ovi rma'in kecapi,
te rafraik flo'its ovu rafraik tvuri ra,
te ovi rdedang ra,
wol rotu roak afa avyai.
Tukan ra,
ovu ovi ba'i rbutar slaru na'a vatu ra wol rleal roak.
23 Tamata ra wol rarea damar yeban,
ovu wol rarenar afa ngoan roak tali snobsifa.
Kota dawan yai ntuan inukun dawan,
tevek tamata ovi rfedi-rfaha afa na'a inyai rka'i lia munuk na'a lanit ivavan,
na'uk rlabir tamata ra ovu rira afa ovi rtaha ra te afnitu ra,
ma tamata ra rotu a'uk afa ovi sian ra.
24 Tamata ovi rna'a kota yai rfedan roak nabi ra ovu tamata ovi rorang Ubu.
Tamata ovi tamata Babel rfedan munuk roak ira na'a lanit ivavan ini,
lararira ra na'a vali inyai.”*