Surat verin tamata ovi rorang Yesus rira sidovung na'a kota Sardis
1 Duila'a Yesus nfalak verin ya'a ne,
“Mtulis surat verin Ubu Ni sansinir tali lanit ratan i nwanar tamata ovi rorang Yesus rira sidovung na'a kota Sardis.
Mtulis wean ini:
Vaivatul ini ntali Ia i nfareta roh ifitu ovi rkarya verin Ubu,
ovu ntaha nara ifitu a.
Ia nfalak ne:
Ya'a uka'a munuk afa ovi myotu ra.
Tamata ra rfalak ne,
bya'at obin,
na'uk velik aba,
mia myata roak.*
2 Usi'ik bira inorang a,
na wol inovan ovu afa ovi Ubu nfalak ra.
Byatar kikyai ma msyi'ik wabira ra!
Fyangrebat bira inorang kedan i fiang ini nana'a obin,
tevek wol myotu wean inyai,
na veka nmamu munuk.
Usi'ik afa ovi myotu ra,
na wol isa vali obin nfakena Ning Ubu,
ralan a.*
3 Ba mingnanang afa ovi rair roak verin mia,
ovu afa ovi mryenar roak na'a bira inorang a.
Mtyalik kikyai ma deka myotu salasilan ra,
na'uk myot-orang a'uk Ning afa ovi rair roak verin mia yai.
Wean i wol myahil ma mtyalik tali bira salasilan,
na Ya'a veka uma wean tamata barborin,
ma wol mkya'a ne,
lafira ki uma.
4 Na'uk na'a Sardis,
na bira tamata ifira na'a bira sidovung a wol rfangra rira kadaravit ra ovu salasilan ra.
Ira veka roru kadaravit ngangiar,
tevek rira vava'at ra rmalola,
ba inovan ma rbana ovu Ya'a.
5 Ba tamata iki watan norang Ya'a ma nangal nala afa ovi sian ra,
na ia veka noru kadaravit ngangiar.
Ya'a veka wol a'i vatuk naran a tali buku i utulis roak tamata ovi rira vava'at kakiwal nararira ra.
Ya'a veka utorung ma ufalak ne,
uka'a ia na'a Yamang a ovu Ni sansinir ovi rtali lanit ratan waharira ralan ra.
6 Ba eka mryenar afa ovi Ubu Ni Roh nfalak verin tamata ovi rorang Yesus rira sidovung ra.”
Surat verin tamata ovi rorang Yesus rira sidovung na'a kota Filadelfia
7 Duila'a Yesus nfalak verin ya'a ne,
“Mtulis vali verin Ubu Ni sansinir tali lanit ratan i nwanar tamata ovi rorang Yesus rira sidovung na'a kota Filadelfia.
Mtulis wean ini:
Vaivatul ini ntali Ia i nmerat urun ovu nfabana urun afa ovi Ubu nfalak ra.
Ia ntaha raja Daud ni kusi a,
ba wean i nvadil falfolat a,
na wol tamata isa bisma nfolat nala,
ovu wean i nfolat falfolat a,
na wol tamata isa vali bisma nvadil nala.*
8 Ia nfalak ne:
Ya'a uka'a afa ovi myotu na'a bira vava'at ra.
Uka'a ne,
bira ngrebat kako'u watan,
na'uk myot-orang afa ovi ufalak ra,
ovu wol myalak mia ne,
wol mkya'a Ya'a.
Myotu wean inyai,
ba uvadil roak falfolat verin mia,
ovu vali wol tamata isa bisma nfolat nala.
9 Eka mingnanang,
tamata boku rtali nitdawan ni sidovung a rfalak ne,
Yahudi ira,
na'uk rsiklabir,
tevek inyai wol kena.
Ya'a veka otu ma tamata avyai rma ma rsangatur na'a wahabira ralan ra,
ma veka rtorung ne,
Ya'a ulobang mia.*
10 Mia myot-orang roak afa ovi ufalak ra,
ovu mtyahang nal ralabira na'a bira susa ra al mnyaban Ya'a.
Ba na'a amar i veka ulabir teman tamata ovi rna'a lanit ivavan munuk ovu sian i dawan urun a,
na Ya'a veka ubelat teri mia na'a amar yai.
11 Wol mnanat,
na Ya'a veka uma lanit ivavan ini!
Myorang a'uk afa ovi mryenar roak tali Ya'a,
boma tamata ra wol bisma rala afa ovi utorung roak verin mia ma aval mia na'a bira rala lolin ra.
12 Ba tamata iki watan,
wean i norang Ya'a ma nangal nala afa ovi sian ra,
na Ya'a veka aval ia na'a ni rala lolin a.
Ya'a veka otu ma ia nana'a lalawatan Ubu Ni Rahan Dawan Falurut a.
Tamata yai wean liri ovi rna'a roak rahan a,
ba wol bisma rtaha rti wan liak.
Ya'a vali veka utulis Yamang a Ubila'a naran a na'a tamata yai,
ovu na'a Ni kota i naran Yerusalem a,
boma nka'a ne,
Ubu Ni roak ia,
ovu ia ni roak kota yai.
Kota yai naran Yerusalem ngorva'an i veka ntali lanit ratan nsuta.
Ya'a veka utulis vali narang ngorva'an a na'a tamata yai.
13 Ba eka mryenar afa ovi Ubu Ni Roh nfalak verin tamata ovi rorang Yesus rira sidovung ra.”
Surat verin tamata ovi rorang Yesus rira sidovung na'a kota Laodikia
14 Duila'a Yesus nfalak verin ya'a ne,
“Mtulis surat verin Ubu Ni sansinir tali lanit ratan i nwanar tamata ovi rorang Yesus rira sidovung na'a kota Laodikia.
Mtulis wean ini:
Vaivatul ini ntali Ia i rfanara ia ne,
Kena Urun.
Ia nfamalik lalawatan afa ovi kena ra.
Afa ovi kena ra munuk rtali Ubu.
Nahu Ia,
na Ubu notu munuk afa ovi rna'a lanit ivavan ini.
15 Ia nfalak ne:
Ya'a uka'a afa ovi myotu na'a bira vava'at ra.
Uka'a ne,
mia wol myalak mia na'a Ya'a,
na'uk byosa ma wol myot-orang afa ovi ufalak ra.
Mia weabira wear i wol ngnea ovu wol ridin a,
ma taltulin watan.
Ni lolin a,
mia musti ridin te ngnea lahir!
16 Ba bira inorang wean wear i taltulin a,
wol ridin ovu wol ngnea ma wean i myorang Ya'a ovu ralabira tutul watan.
Myotu wean inyai,
na Ya'a veka umuta vatuk mia tali vavang a.
17 Mia fyalak ne,
‘Ami amka'i roak na'a mami inorang a ovu ami ka'i amfaka'i tenamami ra,’
ovu fyalak vali ne,
wol bira kasian.
Wora lahir mia,
tevek wol mkya'a ne,
bira kasian a dawan!
Mia wol bira akataka,
bira kadaravit ra viar watan,
ovu vali matabira ra rkibu.
18 Wean inyai bi,
usurak mia ma fyaha masa tali Ya'a,
boma mkya'i na'a bira inorang a.
Masa yai rasnuri roak ia na'a yafu ma rfamasa roak ia.
Mia vali musti fyaha kadaravit ngangiar tali Ya'a ma myeluk,
boma deka mya'it,
tevek tamata ra rsi'ik bira kadaravit vian ra.
Mia vali musti fyaha ubat tali Ya'a ma na'a matabira ra,
boma msyirea ma lolin.
Fyaha munuk afa avyai,
boma Ubu nfaka'i mia na'a bira inorang.
19 Ya'a utabu ovu ufakena tamata ovi ulobang ira,
ba ralabira urun ma myahil ma mtyalik kikyai tali bira salasilan ra!
20 Mya ma msyi'ik!
Ya'a udiri rahan ngoran a ma ufwak,
ovu evan falfolat a.
Ba wean i tamata iki watan nasweang Ya'a ma uti ralan,
na Ya'a veka uti ma utuan lahir ia na'a ralan ma ufna'an ovu ia.
Wean inyai,
na Ya'a Ningu roak ia.
21 Ba tamata iki watan,
wean i norang Ya'a ma nangal nala afa ovi sian ra,
na Ya'a veka ala ia ma ndoku ma nfareta ovu Ya'a na'a wan i Ubu ndoku ma nfareta,
wean i Ya'a vali angal nala roak afa ovi sian ra ma udoku ovu Yamang a na'a wan i nfareta.*
22 Ba eka mryenar afa ovi Ubu Ni Roh nfalak verin tamata ovi rorang Yesus rira sidovung ra.”