Paulus nera verin tamata ovi rorang Yesus na'a kota Tesalonika ma raflurut verin ira
1 Ba teramam-valimami averi na'a Yesus Kristus,
amera verin bir tinemun ma miflurut verin ami.
Myera verin Ubu ma Ni Ivar Lolin yarak ti naran wan rivun,
boma tamata rivun veka rorang,
wean lahir lan a mryenar ma myorang.
2 Miflurut vali ma Ubu nfaroa tamata sian ra ovu ovi raktufan ra tali ami,
tevek tamata rivun rarenar Ni Ivar Lolin,
na'uk wol rorang Ia.
3 Na'uk Ubu not-nala munuk afa ovi nfalak ra.
Ia veka nfangrebat ralabira ra,
ovu veka nbelat teri mia tali nitdawan.
4 Duila'a Yesus notu ma ralamami dawan,
ma amka'a ne,
myorang roak mami snurak ovi amala verin mia,
ovu veka myot-orang vali afa ovi amfalak ra.
5 Fara Ubu notu ma fyan-aran Ni silobang a verin mia,
boma mtyahang nal ralabira,
wean vali Duila'a Yesus Kristus ntahang nal ralan.*
Paulus nsurak tamata inorang ra ma rfaroa tenarira ra tali tamata inorang ovi rbosa ma rkarya
6 Teramam-valimami averi na'a Yesus Kristus,
amala ngrebat tali dida Duila'a Yesus Kristus ma amfareta mia,
ma fyaroa tenabira ra tali tamata inorang ovi rbosa sian ra,
ovu rafena ma rot-orang afa ovi amair roak verin ira.
7 Amfareta mia wean inyai,
tevek na'ut inyai itmunuk tna'a wan isa,
na mia ka'i msyi'ik ne,
ami wol ambosa na'a mami karya ra.
Mia mkya'a vali ne,
wean inba ma myot-orang afa ovi amotu ra.
8 Ambahir tamata ra rira afamtahan ra,
beti ama'an.
Amkarya ma dawan ovan-amar,
boma wol amotu varvara verin mia.
9 Velik ne bis amera ma fya'an ami,
na'uk tali mami karya ra,
na inamami ma amfaturu linga'an lolin verin mia,
boma myot-orang.*
10 Na'ut i itmunuk yai,
na amfareta mia ma deka fya'an tamata ovi rafena ma rkarya.
11 Amfalak wean inyai,
tevek amrenar ne,
tali bir tinemun,
na tamata boku rbosa sian.
Ira rafena ma rkarya,
na'uk iva'ur ma rfamalik tia ma watan tamata liak ra.
12 Amala ngrebat tali Duila'a Yesus Kristus ma amsurak ovu amfareta tamata avyai,
ma deka rfamalik tamata liak ra ovu deka rsingarahi,
na'uk rkarya ma lolin ma al rdava rira fana'an-fanenu.
13 Teramam-valimami averi na'a Yesus Kristus,
amera verin mia ma deka byosa ma myotu lalawatan afa ovi lolin ra.
14 Wean i tamata boku rafena ma rorang afa ovi amfalak na'a surat ini,
na mingnanang ma deka myovun ira,
boma rma'it.
15 Deka myotu ira wean i myotu tamata ovi rira sian mia,
na'uk mtyabu ira,
wean mtyabu tamata ovi rorang Yesus.
Paulus ni vaivatul situli ra
16 Ubu a'uk sa'i nala malinan verin ita.
Fara Ubu notu ma bira vava'at ra malinan na'a afaka watan.
Fara Ia novun bir tinemun.
17 Ya'a,
Paulus,
ala salam verin mia.
Ya'a ka'i ususan surat ini,
ma otu faneak wean ini na'a ning surat ra munuk.
18 Fara dida Duila'a Yesus Kristus nala Ni rala lolin verin bir tinemun.
Ning surat a lawan watan ini.Salam tali ya'a,
Paulus