Paulus nfamalik na'a sian ovi veka rma na'ut i Duila'a Yesus nma ewal
1 Teramam-valimami averi na'a Yesus Kristus,
mane amfamalik na'a amar i dida Duila'a Yesus Kristus veka nma ewal ma nasdovu ita,
ma itmunuk tleal wan isa.
Ami veka amera tali mia ovu ralamami urun,
ma fara
2 deka ralabira kako'u ovu wahabira dadar na'a tamata ovi rfalak ne,
Duila'a Yesus nma ewal roak lanit ivavan.
Snain tamata avyai rfalak ne,
rarenar lahir tali Ubu ma ti rfamalik verin tamata ra.
Bis vali ma rfalak ne,
rfamalik afa ini verin mia,
te rfalak vali ne,
rfamalik na'a surat isa ne,
Yesus Kristus Ni amar i mane nma,
naran roak!
3 Msyi'ik wabira ma lolin,
boma tamata ra deka rlabir nala mia,
tevek wol naran amar i Yesus newal Ia obin,
na tamata rivun veka rafena ma rorang Ia.
Nata tamata ktufan isa i nangal afa ovi Ubu nfalak ra munuk veka nvotuk*,
ma na'ut amar i veka nma,
na Ubu veka nala'ing vatuk ia ma ti nleal yafwan kakiwal.
4 Ia veka nangal Ubu ovu nangal munuk afa ovi tamata raraning ra,
ovu nfakaratat tenan a ma nfalak ne,
ia ni dawan a nlia Ubu.
Ia veka ndoku Yahudi rira Rahan Dawan Falurut ralan ma nfalak ne,
Ubu ia.
5 Mia musti mingnanang ne,
amar i itmunuk yai,
na ufamalik munuk roak afa avyai verin mia.
6 Fiang ini mkya'a ne,
afaki nangal teri tamata ktufan yai,
boma ti naran amar i Ubu nfadoku a,
na tamata ktufan yai nvotuk vali.
7 Fiang ini ngrebat i na'a tamata ktufan yai nbana fanfonak ia obin.
Tevek afa i nangal teri tamata ktufan yai ntaha ia obin,
ti naran amar i Ubu nfadoku ma nfatalik ia.
8 Na'ut amar yai watan,
na tamata ktufan yai veka nvotuk.
Na'ut amar i Duila'a Yesus nma,
na veka nfedan ia ovu Ni vaivatul ra watan,
ovu vali nala Ni ngrebat i nfitik nyadat ma nkusar nwear ia.
9 Yesus wol newal Ia obin,
na tamata ktufan yai veka nvotuk ovu ngrebat i ntali nitdawan a.
Ia veka notu afa ovi rfaturu ni ngrebat a ma tamata ra rtalkaka.
Ia notu vali mujizat ra ovu faneak ovi tamata ra wol rot-nala,
na'uk afa avyai munuk wol kena lahir.
10 Ia veka nala ni siklabir sian ra ma al nweang lablabir tamata ovi veka rmata ma rna'a yafwan kakiwal,
tevek rafena ma rorang Ubu Ni ivar mnga'un a.
Ivar yai nfaturu ne,
wean inba ma Ubu nsikat ira tali rira salasilan ra,
ma rira vava'at kakiwal.
11 Ira rafena ma rorang Ubu,
ba Ia notu ma tamata siweang isa nti ma nweang nala ira,
boma rorang afa ovi wol kena ra.
12 Ba Ubu veka nukun tamata ovi inar ma rotu salasilan ra,
ovu rafena ma rorang Ni ivar mnga'un a.
Ubu nala Ni rala lolin verin ita
13 Teramam-valimami averi na'a Yesus Kristus,
Ubu nala Ni silobang verin mia.
Ami amangnanang mia ma amfalak fara weninyai lalawatan verin Ubu,
tevek Ia wol notu lanit ivavan obin,
na nfili roak mia ma nsikat mia tali bira salasilan ra,
ma bira vava'at kakiwal.
Ia notu wean inyai,
tevek Ubu Ni Roh notu ma ralabira ra rmerat,
ovu myorang Ni Ivar mnga'un a.
14 Ubu nera mia,
na'ut i amfamalik Ni Ivar Lolin verin mia ma nsikat mia tali bira salasilan ra,
ma bira vava'at kakiwal.
Ia nera mia,
boma nalang mia wean watan i nalang ma dawan dida Duila'a Yesus Kristus.
15 Ba kida averi,
deka mtyalik ma myorang afa ovi amair roak verin mia.
Na'a afa avyai,
na amfamalik boku roak verin mia,
na afa boku vali amfadoku roak na'a surat verin mia.
16-17 Fara dida Duila'a Yesus Kristus ovu Yamadida Ubila'a nfaloling ovu nfangrebat ralabira ra,
boma afa ovi myotu ra,
ovu bira vaivatul ra lolin watan.
Tevek Ubu nlobang ita ovu Ni rala lolin a,
ovu nfaloling lalawatan raladida ra.
Ita tfaklo'i a'uk dida vava'at ra verin Ia,
tevek tka'a basil ne,
veka tna'a lanit ratan.