Karya ovi Paulus notu na'a kota Tesalonika
1 Teramam-valimami averi na'a Yesus Kristus,
mia mkya'a roak ne,
na'ut i ti amalola mia,
na amfabana nala mami karya ra.
2 Bir tinemun mkya'a ne,
wol amama kota Tesalonika obin,
na tamata ra rwi-rwa ovu rfalak sian ami na'a kota Filipi.
Velik ne tamata rivun rangal ami,
na'uk Ubu i traning a,
nfangrebat ami ovu nfabrahi ami ma amfamalik Ni Ivar Lolin a verin mia.
3 Ami amfamalik Ubu Ni Ivar Lolin verin mia,
na wol amair afa ovi wol kena ra.
Wol amweang mia ovu fikiran sian ra,
ovu wol amsiklabir.
4 Ami vali wol amangrihi ma amfaloling tamata ralarira ra,
na'uk amotu ma Ubu ralan a lolin.
Ia sa'i nsi'ik raladida ra,
ovu nfili vali ami ma amfamalik Ni Ivar Lolin a.
5 Mia ka'i mkya'a ne,
wol amangrihi ma al amdava wahamami ralan,
te amfonak ralamami ma amala afa boku tali mia.
Ubu nsi'ik ovu nrenar roak ami.
6 Ami wol amera vali ma mia te tamata liak ra rfadawang ami,
velik ne wol sala ami ma amera wean inyai,
tevek Kristus Ni rasul verin ami.
7 Na'uk na'ut i amalola mia,
na amfamafung watan ralabira ra,
wean vata i nsusu ovu nwanar yanan ra.
8 Ami amlobang urun mia,
ba ralamami urun ma amfamalik Ubu Ni Ivar Lolin verin mia.
Na'uk wol mane inyai watan,
ba inamami ma amlobang mia na'a afaka watan,
tevek amlobang urun mia.
9 Teramam-valimami averi mingnanang obin ne,
iva'umami ma amkarya urun ovu amfamalik Ubu Ni vaivatul ra verin mia.
Ovan-amar,
na amkarya afa liak vali ma al amdava mami fana'an-fanenu,
boma deka amotu varvara verin mia.
10 Mia myorang roak Yesus,
ovu mkya'a roak ne,
mami vava'at ra rmalola verin mia.
Mia msyi'ik roak ne,
mami vava'at ra kena ovu Ubu Ni vaivatul ra,
ba tamata ra wol rfasala nala ami.
Ubu nsi'ik vali mami vava'at ra.
11 Mia mkya'a vali ne,
amlobang mia wean i itrana isa nlobang yanan ra.
12 Amsurak mia ovu amfangrebat ralabira ra,
ovu amera verin mia,
boma bira vava'at ra kena ovu Ubu ralan a.
Tevek Ubu nera roak mia ma mnya'a Ni fareta i nfitik nyadat.
13 Ba amfalak fara weninyai lalawatan verin Ubu,
tevek na'ut i amfamalik Ni vaivatul ra verin mia,
na mtyorung ma myala vaivatul avyai,
wean lahir Ubu nfalak a.
Mia mkya'a roak ne,
vaivatul avyai wol rtali tamata,
na'uk reluk Ivar Lolin tali Ubu.
Ni vaivatul ra rkarya na'a ralabira ra,
tevek myorang roak Yesus Kristus.
14 Terang a valing averi,
tamata ra rotu sian mia tevek myorang Yesus,
wean vali tamata inorang ovi rna'a Yudea rira sidovung ra.
Tamata Yahudi ovi wol rorang Yesus na'a Yudea rotu sian tamata inorang ovi rna'a inyai.
Mia wean lahir ira,
tevek tamata Tesalonika ovi wol rorang Yesus rotu sian vali mia.
15 Tamata Yahudi rfedan nabi ra,
ovu rfedan vali Duila'a Yesus,
ovu vali rwi-rwa ami.
Ba rira sian verin iki watan,
ovu vali rangal lalawatan Ubu.
16 Ira rotu teri ami ma deka amfamalik Ubu Ni Ivar Lolin a verin tamata ovi wol Yahudi ra ma rka'a ne,
wean inba ma Ubu bisma nsikat ira tali rira salasilan ra,
ma rira vava'at kakiwal.
Ba wean inyai,
na tamata Yahudi rira salasilan ra ntafal ma dawan.
Ba fiang ini Ubu nfaturu lahir Ni ngrova i dawan urun a verin ira.
Paulus inan ma nti nalola ewal tamata ovi rorang Yesus na'a Tesalonika
17 Teramam-valimami averi,
tamata ra rotu ma tsifaroa ita roak,
na'uk wol mnanat.
Tsifaroa ita ovu tenadida ra,
na'uk raladida isa watan.
Amaseak urun mia ovu amdava roak linga'an mane amtuan ewal mia.
18 Inamami ma ti amalola mia,
ba udava linga'an fafira roak,
na'uk nitdawan a notu teri ami.
19 Inamami ma ti amalola mia,
tevek fyangrebat ralamami ra ovu myotu ma inamami lolin watan.
Na'ut i dida Duila'a Yesus veka nma ewal,
na bira inorang na'a Ubu nangrebat watan,
ba ralamami veka dawan ovu lolin urun.
20 Ba mia myotu ma ralamami dawan ovu inamami urun.