Paulus ni surat i ntulis lan verin tamata ovi rorang Yesus rira sidovung na'a kota Tesalonika
1 Ya'a ini Paulus,
amtelu Silas* ovu Timotius amasusan surat ini verin sidovung tamata inorang ovi mnya'a kota Tesalonika.
Mia mryaning vali Yamadida Ubila'a ovu Duila'a Yesus Kristus.
Fara Ubu nala Ni rala lolin verin mia ovu notu ma bira vava'at ra malinan watan.
Paulus nfalak fara weninyai verin Ubu, tevek tamata ovi rorang Yesus na'a kota Tesalonika rira vava'at ra lolin
2 Ami amfalak fara weninyai lalawatan verin Ubu tevek mia,
ovu vali na'a mami falurut ra,
na amfalak narabira ra munuk.
3 Wean i amaflurut verin Yamadida Ubila'a,
na amangnanang lalawatan bira karya lolin ra verin tamata liak ra.
Afa avyai rfaturu bira inorang a verin Yesus Kristus.
Bira rala lolin verin tamata liak nfaturu vali ne,
mlyobang Ubu,
ovu vali fyaklo'i a'uk bira vava'at ra verin Duila'a Yesus Kristus,
ba bira inorang nangrebat.
4 Terang a valing averi na'a Yesus Kristus,
amka'a roak ne,
Ubu nlobang ovu nfili mia verin Ia.
5 Amka'a afa yai,
tevek Ubu Ni Ivar Lolin i amfamalik roak verin mia,
wol mane vaivatul watan,
na'uk ngrebat i ntali Ubu Ni Roh nkarya na'a ralamami ra,
ovu amorang urun vaivatul ovi amfamalik yai.
Mia mkya'a roak ne,
na'ut i itmunuk a,
na mami vava'at ra rfalyawang lahir Ivar Lolin i amala verin mia.
6 Mia myorang roak afa ovi amfalak ra ovu amotu ra,
ovu vali myorang afa ovi Duila'a nfalak ra.
Velik ne tamata ra rwi-rwa mia,
na'uk ralabira ra lolin watan ma mryenar Ubu Ni Ivar Lolin a.
Ubu Ni Roh notu vali ma inabira lolin urun.
7 Ba bira vava'at ra rotu ma tamata ovi rorang Yesus na'a propinsi Makedonia ovu propinsi Akhaya rot-orang afa ovi myotu ra.
8 Fiang ini fyamalik Ubu,
ma Ni vaivatul ra rafla soru roak.
Wol mane na'a Makedonia ovu Akhaya watan,
na'uk na'a wan inba watan tamata ra rka'a bira inorang na'a Ubu.
Ba ami wol amfamalik roak verin ira na'a bira inorang a,
9 tevek na'a wan inba watan,
na tamata ra ka'i rfamalik mia na'a i wean inba ma myorang Ivar Lolin i amala verin mia.
Ira rfamalik vali ne,
lan ana myahil roak ma wol mryaning bira walut ra,
ma fiang ini,
na mryaning a'uk Ubu i sa'i kena Ia ovu nva'at.
10 Ira rfamalik vali ne,
wean inba ma mnyaban watan amar i Ubu Yanan a Yesus veka ntali lanit ratan nma lanit ivavan a.
Ubu nfava'at ewal roak Ia tali matmatan.
Yesus a'uk sa'i nsikat ita tali dida salasilan ra,
boma Ubu Ni ngrova i veka nfaturu yai,
deka nkena ita.
Tamata Yunani rira walut vata boku (1 Tesalonika 1:9)