Snurak ma ta'an vai isa ovu tfakabava tenadida ra wean Kristus
1 Kristus nfangrebat ralabira ra na'a bira vava'at ra ovu Ia,
ovu vali Ia nlobang urun mia ma nfaloling roak ralabira ra.
Ubu Ni Roh notu ma ralabira isa ovu Ia,
ovu vali nlobang mia ma nfaturu Ni silobang a verin mia.
2 Ba myotu ma ralang lolin urun wean ini:
mian vai isa ovu myotu ma ralabira isa watan na'a bira fikiran ra ovu msyilobang mia,
ovu vali myotu ma bira vava'at ra malinan watan.
3 Deka fyakaratat tenabira ra,
ovu vali deka myotu ma tamata ra rfadawang mia.
Na'uk fyakabava tenabira ra ma myalang tamata liak ra ne,
ira lolin lia mia.
4 Msyi'ik vali tamata liak ra ma uturira,
deka mane msyi'ik watan tenabira ra.
5 Na'a bira vava'at ra,
na bira fikiran ra ovu afa ovi minovak na'a ralabira ra musti wean afa ovi Yesus nfikir roak a.
6 Kena urun ma Yesus Ubu Ia na'a afakataka munuk,
na'uk Ia wol ntang na'a ralan a,
ma ntahang teri ne,
Ni dakdokun a sam lahir ovu Ubu.
7 Na'ut i neluk tamata,
na Ia wol ntahang teri afa yai,
na'uk ka'i nfakabava tenan a ma wean i neluk tamata sansinir.*
8 Ia notu roak ma felan a wean watan tamata ra.
Ia nfakabava tenan a ovu notu lalawatan afa ovi Ubu nfalak ra,
ti naran i rbaku Ia na'a aa walwalur a ma nmata,
wean i rbaku tamata sian ra na'a aa walwalur a.
9 Yesus notu wean inyai,
bi Ubu nfadawang urun Ia ovu nalang Ia ma nala van i dawan lia munuk a verin Ia,
10 boma tamata ra munuk,
ovu afa ovi rva'at na'a lanit ratan,
ovu ovi rna'a lanit ivavan ini,
ovu vali ovi rna'a letvava rsangatur verin Yesus.
11 Ira munuk veka rtorung ma rfalak ne,
“Yesus Kristus Duila'a Ia.”
Afa yai notu ma ira munuk ralang ovu raraning Yamadida Ubila'a.
Tamata ovi rorang Yesus musti rotu afa ovi nfalak ra, boma rfaturu afa ovi Ubu ralan nfalak verin tamata liak ra
12 Ba wean inyai,
na terang a valing ovi ulobang urun mia;
na'ut i itmunuk obin a,
na myorang lalawatan afa ovi air roak verin mia.
Fiang ini era verin mia ma mtyafal vali ma myotu munuk wean inyai,
ma inovan ovu tamata ovi Ubu nsikat roak ira tali rira salasilan ra,
ma rira vava'at kakiwal.
Myotu wean inyai ovu ralabira urun ma myalang urun Ia,
velik ne tsifaroa ita.*
13 Myotu wean inyai,
tevek Ubu nkarya na'a ralabira ra,
boma inabira ma myotu afa ovi rfaloling Ubu ralan a,
ovu Ia nlobang mia ma myot-nala afa avyai.
14 Ba wean i mkyarya afaka watan,
na deka mifngamu'ur ovu deka msyingarahi,*
15 boma tamata ra wol bisma rfasala nala mia,
tevek bira vava'at ra rmerat,
ovu sian a wol nana'a tenabira ra.
Myotu wean inyai,
na fyaturu roak ne,
Ubu yanan urun mia,
ovu vali bira vava'at ra rmerat ovu kena na'a tamata kuldawan ovu tamata salasilan fruarira ra.
Mia musti myeluk lyawan verin ira,
wean nara ovi ryeba lanit ivavan a.
16 Mia vali musti fyamalik verin tamata liak ra na'a Ivar i nala vava'at ngorva'an verin tamata ra,
boma ya'a bisma ralang a dawan na'ut amar i Kristus veka nma ewal a.
Myotu wean inyai,
na fyaturu roak ne,
ning karya ovu ning farea verin mia wol mane rleka ma lolan watan.
17 Bira inorang verin Ubu ovu bira karya verin Ia,
neluk bira korban ovi rfaloling Ubu ralan a.
Wean i Ubu ralan nfalak ma rfedan ya'a ma ning vava'at a neluk persembahan al ntafal afa ovi myala verin Ia,
na ya'a ralang a lolin urun.
Ya'a veka ovu vali mia munuk ma totu inad lolin,
tevek bira inorang nangrebat urun.*
18 Mia musti inabira lolin urun wean ini,
ovu myovu vali ya'a ma totu inad lolin.
Timotius ovu Epafroditus
19 Wean i Duila'a Yesus ralan nfalak,
na inak urun,
ma veka usinir lahir Timotius ma ti nalola mia ma nfaloling ralabira ra,
ovu vali bisma urenar bira ivar a tali ia ma ralang a lolin.
20 Timotius a'uk ralan isa ovu ya'a ma nlobang mia ovu ralan urun.
21 Tamata liak ra munuk rfikir a'uk tenarira ra,
ovu wol rfikir afa ovi Yesus ralan a nfalak a.*
22 Mia ka'i msyi'ik roak ne,
Timotius iva'un urun ma nlobang ya'a,
wean kasiko'u nlobang yaman a.
Ia nlobang ya'a ma amfamalik Ubu Ni Ivar Lolin.
23 Wean i lyawan roak verin ya'a na'a afa ovi veka rvotuk na'a ning vava'at a,
na veka ufadoku lahir ma Timotius ti nalola mia.
24 Ya'a orang ne,
Duila'a veka nlobang ya'a ma wol mnanat,
na rfatalik ya'a tali ini ma uti lahir ma ulola mia.
25 Msyinir roak terad a valid Epafroditus ma nma ini ma nfatuang ya'a na'a ning karya ra,
ovu ntaha afa ovi wol rna'a ya'a.
Na'uk unovak vali ne,
lolin urun ma usinir ia ma newal ia ti nlobang ewal mia.
Ia nkarya ma dawan ovu ya'a ma amfamalik Ubu Ni Ivar Lolin a.
Ia nkarya ovu ya'a wean suldadu i ntahang ralan na'a ni susa ra.*
26 Ia inan urun ma ntuan bir tinemun,
ovu ralan a lalau vali,
tevek mryenar roak ivar ne,
nawar ia.
27 Kena urun,
tevek nawar ma kedan a watan,
na nmata.
Na'uk Ubu nlobang ia ovu vali notu ma lolin ewal ia tali ni suhut a.
Ubu wol nlobang watan ia,
na'uk nlobang vali ya'a,
boma ralang a deka ntafal ma lalau lalawatan.
28 Wean inyai,
bi ufarlan ma usinir ia ma nti nalola mia,
boma wean i msyi'ik roak ia,
na ralabira ra veka lolin ewal,
ovu vali ning fikiran a veka malinan.
29 Ba mtyorung ovu inabira lolin urun ma myala ia wean i tala terad a valid ra na'a Duila'a,
ovu myalang ia,
ovu vali tamata ovi wean ia.
30 Lan ana,
kedan watan na nmata,
tevek nkarya verin Kristus.
Ia wol nbobar ma nmata ma nlobang ya'a,
ma al nkati bir tinemun na'a afa ovi wol bis myotu ra.