Paulus ni surat verin tamata ovi rorang Yesus rira sidovung a na'a kota Filipi
Paulus nala salam verin tamata ovi rorang Yesus na'a kota Filipi
1 Surat ini ntali ya'a Paulus.
Timotius nana'a ini ovu ya'a,
ma amrua ameluk sansinir verin Kristus Yesus.
Utulis surat ini verin tamata ovi myeluk dawan kareda ovi byan-ulu na'a bira sidovung ra,
* ovu verin dawan kareda ovi myeluk diaken.
Surat ini vali verin mia munuk tamata inorang ovi ralabira isa roak ovu Kristus Yesus na'a kota Filipi.
2 Amaflurut verin Yamadida Ubila'a ovu Duila'a Yesus Kristus ma fara nala Ni rala lolin a verin mia,
ma bira vava'at ra malinan watan.
Paulus naflurut verin tamata ovi rorang Yesus
3 Wean i ungnanang mia,
na ufalak fara weninyai lalawatan verin Ubu i uraning a.
4 Lokat amar i uflurut verin mia munuk,
na uflurut lalawatan ovu ralang lolin.
5 Ya'a uflurut ovu ralang lolin,
tevek tali amar i beti myorang Yesus ma naran amar ini,
na mlyobang roak ya'a ma tfamalik Ni Ivar Lolin a.
6 Ubu sa'i notu lan karya lolin ini na'a ralabira ra.
Ya'a orang urun ne,
Ia veka notu lalawatan karya yai,
ti naran i roak a na'a amar i Yesus Kristus veka nma ewal a.
7 Wean urun inyai bi ungnanang munuk mia,
tevek mnya'a ralang a.
Ubu nfaturu Ni rala lolin verin ita ma mlyobang roak ya'a ma tkarya ma tfamalik Ni Ivar Lolin a.
Myotu wean inyai,
na'ut i una'a bu'i ralan te na'a amar ovi rti roak veli,
na ufalyawang verin tamata ovi rfalak sian Ivar Lolin yai,
ovu ufaturu lahir ne,
Ivar yai kena munuk.
8 Umaseak urun mia ovu ulobang mia,
wean Kristus Yesus nlobang mia.
Ubu nka'a ne,
afa ovi ufalak ra kena.
9 Uflurut verin Ubu ma fara bira rala lolin a ntafal,
boma mkya'a ma mlyobang terad a valid ra,
ovu fyan-aran ma minovak nala afa ovi kena ra,
ovu afa ovi wol kena ra na'a afaka watan.
10-11 Ba uflurut wean inyai,
ma bis mkya'a ma fyili ne inba lolin,
boma bira vava'at ra veka rmerat urun ovu wol bira sala,
boma tamata ra deka rfasala mia na'ut amar i Kristus veka nma ewal a.
Uflurut vali ma ti naran amar yai,
na bira vava'at a veka nngora lahir ovu bira afa lolin ovi myotu ovu ralabira urun a.
Yesus Kristus a'uk sa'i not-nala ma bira vava'at ra wean inyai.
Tamata ra rsi'ik ma veka rfadawang Ubu ovu raraning Ia,
tevek Ni dawan a.
Paulus ralan a lolin, tevek rfamalik Yesus
12 Ya'a inak ma mkya'a ne,
susa ovi rvotuk roak na'a ning vava'at a,
rotu ma tamata rivun rarenar ovu rorang Ubu Ni Ivar Lolin a.
13 Lyawan roak verin suldadu ovi rwanar Kaisar Roma ni rahan dawan a,
ovu vali tamata ra munuk na'a kota ini ne,
ra'abu'i ya'a tevek eluk tamata sansinir verin Kristus.
14 Ra'abu'i ya'a,
notu ma tamata ovi rorang Yesus na'a kota ini rarea lahir i wean inba ma Ubu nlobang ya'a,
ma etal dawan rira inorang a ntafal na'a Duila'a.
Ira wol rbobar,
ba rabrahi watan ma rfamalik Ubu Ni Ivar Lolin a.
15-16 Kena ma tamata inorang boku ralarira lolin ma rfamalik Kristus,
tevek inar ma rlobang ya'a ma amfamalik Ubu Ni Ivar Lolin a.
Tamata avyai rfamalik Kristus,
tevek rira silobang verin Ubu ovu verin ya'a,
ovu rka'a roak ne,
Ubu nfadoku ya'a ma ufabana Ni karya a,
boma ufaturu lahir ne,
Ivar Lolin yai kena.
Na'uk kena vali ma tamata inorang boku rfamalik Kristus verin tamata liak ra,
tevek wol inar ma rsi'ik ning lolin a,
ovu inar ma tamata ra wol rorang afa ovi ufalak ra,
ma rorang watan afa ovi rfalak ra.
17 Tamata avyai rfamalik Kristus,
tevek rfikir a'uk tenarira ra ovu rira fikiran ovi wol lolin ra.
Ira ranovak ne,
rotu wean inyai,
na veka nfalemang ila'a ya'a na'a bu'i ralan ini.
18 Ira rotu wean inyai,
na'uk wol akataka verin ya'a.
Velik ne rdava linga'an liak ovu rira fikiran ovi wol kena ra,
te inar ma rlobang ya'a,
na'uk ya'a ralang lolin watan.
Ralang a lolin watan,
tevek rfamalik Ubu Ni vaivatul ra na'a Kristus.
Ba ralang veka lolin lalawatan,
19 tevek uka'a ne,
tali bira falurut ra ovu Yesus Kristus Ni Roh nlobang ya'a ma veka nfatalik ya'a tali sian ovi rkena ya'a na'a ini.*
20 Inak urun ovu ufaklo'i a'uk ning vava'at a verin Ubu,
boma otu munuk akataka,
na wol uma'it ma ufalak lahir ne,
Kristus dawan Ia.
Fiang ini ovu amar ovi rti roak veli,
na ubrahi watan ma ufamalik Kristus,
tevek alang Ia.
Inak ma otu lalawatan wean inyai,
velik ne veka umata te uva'at.
21 Ufadoku munuk ning vava'at a na'a Kristus,
boma alang watan Ia.
Wean i umata,
na utung lia i uva'at a!
22 Na'uk wean i uva'at na'a lanit ivavan ini obin,
na bis otu karya i Kristus nala roak verin ya'a,
ma tamata rivun rorang Ia.
Ba wol uka'a ne,
veka ufili inba.
23 Ya'a utuan linga'an irua,
ba wol uka'a ne,
veka ahu inba.
Linga'an i ula lalean a,
inak ma uti talik lanit ivavan ini ma una'a ovu Kristus,
tevek inyai lolin lia munuk verin ya'a.
24 Na'uk ni lolin a ufili linga'an i nban-muri a,
ma uva'at watan na'a lanit ivavan ini,
boma bisma ulobang mia.
25 Ya'a orang urun wean inyai.
Ba veka una'a ma itmunuk ewal,
boma ulobang mia ma bira inorang a ntafal ma nangrebat,
ovu inabira lolin urun,
tevek myorang Duila'a.
26 Wean i ewal ya'a ma itmunuk,
na veka mtyafal ma inabira lolin urun,
tevek afa ovi Yesus Kristus notu verin ya'a.
27 Ba fiang ini nlia tali inyai,
na bira vava'at a musti myot-orang munuk afa ovi inovan verin tamata ovi rorang roak Ubu Ni Ivar Lolin i nfamalik Kristus.
Ba wean i uma ewal,
na bis usi'ik ne,
wol msyuka mia,
ba bira dardirin ra rna'a watan Ubu Ni Roh a,
te wean i wol uma roak,
na urenar vali wean inyai.
Myotu vali ma ralabira isa,
boma myangal nala tamata ovi rfalak sian Ni Ivar Lolin a,
ovu deka mifla talik bira inorang a.
28 Mia musti mibrahi ovu deka byobar tamata ovi rangal mia.
Wean inyai,
na fyaturu roak ne,
ira veka ramwear watan,
na'uk Ubu veka nsikat mia tali bira salasilan ra ma bira vava'at kakiwal,
tevek Ia ka'i notu ma wean inyai.
29 Mingnanang,
tevek Ubu naflahar roak mia ma myorang Kristus.
Ia naflahar vali mia ma mtyuan susa na'a bira vava'at ra,
tevek myorang Ia.
30 Fiang ini tamata boku rangal mia wean lahir i rangal vali ya'a.
Na'ut i una'a Filipi obin,
na msyi'ik roak susa avyai,
ovu fiang ini rotu vali susa avyai verin ya'a na'a ini,
ma mryenar vali roak wean inyai.