Tamata ovi myorang Yesus, wean i bira fikiran ra wol wear isa, na deka msyifasala mia
1 Terang a valing averi,
mtyorung ma myala tamata i ni inorang verin Yesus wol nangrebat obin a,
ovu lolin watan.
Deka msyingarahi ovu ia na'a afa ovi nfikir ra.
2 Tamata ovi rorang Yesus,
boku rorang ne,
bisma ra'an afamtahan afaka watan.
Na'uk tamata ovi rira inorang wol nangrebat obin,
ira rorang ne,
bisma ra'an watan sayur.
3 Tamata i na'an afaka watan,
deka nfalak sian tamata i na'an watan sayur,
tevek Ubu ntorung roak ma nala ia ma neluk yanan.
Wean vali inyai verin tamata i na'an watan sayur,
deka nfasala tamata i na'an afaka watan,
tevek Ubu ntorung ma nala vali ia ma neluk yanan.
4 Deka fyasala tamata liak ni tamata sansinir a.
Duan a veka ka'i nfadoku ne,
nkarya ma lolin te wahal.
Wean vali inyai verin terabir-valibira tamata ovi rorang Yesus.
Duila'a neluk duarira,
ba Ia sa'i nvolan ne,
iki kena te sala ia.
Ia veka nlobang Ni tamata sansinir a ma not-nala ni karya a,
tevek Duila'a Ni ngrebat a.
5 Tamata boku ranovak ne,
amar isa lolin lia amar liak ra ma rasdovu ira ma rfadawang Ubu,
na'uk boku ranovak vali ne,
amar ra munuk wearira isa watan.
Ba fara lokat tamata norang urun ne,
afa i nanovak yai kena.
6 Tamata i nanovak ne,
amar isa lolin lia amar liak ra ma rasdovu ira ma rfadawang Ubu,
na nanovak wean inyai ma nalang Duila'a.
Tamata i na'an afaka watan notu wean inyai ma nalang Duila'a,
tevek inan ma nfalak fara weninyai verin Ubu na'a afamtahan avyai.
Tamata i na'an watan sayur,
ia notu wean inyai,
tevek inan ma nalang Duila'a,
ovu vali nfalak fara weninyai verin Ubu.
7 Tali did tinemun,
na wol tamata isa vali na'a ni vava'at a,
ka'i nfikir watan tenan a.
Wol tamata isa vali nmata tevek afa ovi ralan nfalak ra watan.
8 Ba velik ne veka tmata te tva'at,
na torang a'uk afa ovi Ubu ralan nfalak ra,
ovu Ia Ni watan ita.
9 Wean inyai bi,
Kristus nmata ovu nva'at ewal roak,
boma Ia neluk Duila'a verin tamata ovi rva'at ra ovu tamata ovi rmata roak a.
10 Ba deka mane tamata boku tali mia fyasala terabir-valibira ra,
ovu vali deka fyalak sian ira,
tevek ita munuk veka tdiri Ubu wahan ralan a,
na'a wan i ndoku ma nfareta ma nfaleka inukun verin ita.
11 Rtulis roak na'a Surat Ralan ne,
“Duila'a nfalak ne,
‘Kena urun ma tamata ra munuk veka rsangatur na'a wahang ralan a,
ovu ira munuk lahir veka rtorung ne,
Ubu Ya'a.’ ”*
12 Wean inyai,
na lokat ita veka tdiri Ubu wahan ralan a,
ma tfalak munuk dida afa ovi totu ra,
ovu afakinimi totu afa avyai.
Deka myotu ma terabir-valibira ra rotu salasilan
13 Wean inyai,
na deka tsifasala ita!
Na'uk ni lolin a tanovak ma totu wean ini:
Deka totu afa ovi rotu ma terad a valid ra rotu salasilan.
14 Ya'a ning vava'at isa roak ovu Duila'a Yesus,
ba orang urun ne,
afamtahan afaka watan,
Ubu wol nfalak teri ma deka ta'an.
Na'uk wean i tamata isa norang ne,
afamtahan boku Ubu nfalak teri ma deka na'an,
na inyai kena ma deka na'an.
15 Wean i motu ma teram-valim isa ralan nwa'uk,
tevek afa ovi muan ra,
na afa ovi motu ra rfaturu roak ne,
wol mlobang ia.
Deka muan afamtahan i not-visal teram-valim ra ma wol rorang roak Ubu,
tevek Kristus nmata roak ma al nakvanak ira.
16 Ba deka myotu afa ovi mnyarin ne lolin,
na'uk notu ma terabir-valibira ra rleka na'a salasilan,
ma tamata liak rfalak sian mia.
17 Wean i Ubu nfareta wean lahir Raja na'a dida vava'at ra,
na totu afa ovi Ubu ralan nfalak a,
ovu dida vava'at ra malinan ovu tamata liak,
ovu vali raladida lolin.
Ubu inan ma totu munuk afa avyai nlia tali dida fana'an fanenu ra.
Ita tfarnuang munuk afa avyai,
tevek Ubu Ni Roh nkarya na'a raladida ra.
18 Torang Kristus wean inyai na'a afa ovi totu ra,
na notu ma Ubu ralan lolin,
ovu vali tamata ra ralang ita.
19 Wean inyai,
na ita musti tkiwal lalawatan ma totu afa ovi rotu ma dida vava'at ra malinan ovu terad a valid ra,
ovu vali tsifangrebat ita na'a dida inorang.
20 Deka tali afamtahan ovi minovak ne,
bisma mian,
na myotu ma tamata liak rleka na'a salasilan,
ma rira inorang na'a Ubu wol rangrebat roak.
Afamtahan ra munuk Ubu wol nfalak teri ma deka ta'an,
na'uk sian urun verin tamata i na'an afamtahan ovi rotu ma tamata ra rotu salasilan.
21 Ni lolin a deka mian afwatan ihin,
myenu anggur te afa ovi rotu ma minavut,
te myotu afa ovi rotu ma tamata ovi rorang Yesus rotu salasilan.
22 Ba terang a valing averi,
afa ovi myorang na'a bira fana'an-fanenu ra,
na mia ovu Ubu sa'i mkya'a afa avyai.
Lolin urun verin tamata i wol ka'i nfasala tenan a,
na'ut i notu afa ovi nanovak ne kena.
23 Wean i ralabira raruan ma mian afa isa,
na'uk mian watan afa yai,
na Ubu nukun mia,
tevek wol myorang afa ovi mkya'a roak ne,
kena.
Wean i totu afaka watan,
na'uk wol torang ne,
afa ovi totu ra kena,
na inyai salasilan roak.