Ita musti trenar tamata ovi rtaha fareta
1 Terang a valing averi,
tamata iki watan musti not-orang tamata ovi rtaha fareta ra,
tevek wol tamata isa vali ni ngrebat ma nfareta,
wean i Ubu wol nala ngrebat verin ia.
Tamata ovi rtaha fareta bisma rfareta,
tevek Ubu nfadoku roak ma rfareta.
2 Wean inyai bi tamata iki watan nangal fareta ra,
na ia nangal vali afa ovi Ubu nfadoku roak a.
Notu wean inyai,
na veka ntuan inukun.
3 Tamata ovi rotu afa ovi lolin ra wol rbobar fareta ra.
Na'uk tamata ovi rotu afa ovi sian ra,
ira rbobar fareta ra.
Ba wean i inabira ma wol byobar fareta ra,
na myotu watan afa ovi lolin ra,
na ira veka rfadawang mia.
4 Tamata ovi rtaha fareta reluk Ubu Ni tamata sansinir,
ovu rkarya ma na'a bira lolin.
Na'uk wean i myotu afa ovi sian ra,
na musti byobar ira,
tevek rira ngrebat ma rukun tamata ra.
Ira reluk Ubu Ni tamata sansinir ma rukun tamata ovi rotu afa ovi sian ra.
5 Ba wean inyai,
na mia musti myot-orang afa ovi fareta rfalak ra,
boma wol rfaturu rira ngrova verin mia.
Nlia ntali inyai,
na myot-orang afa ovi rfalak ra,
tevek mkya'a roak na'a ralabira ila'a ra ne,
afa avyai kena.
6 Wean inyai vali bi byahir kulu,
tevek na'ut i fareta ra rfabana rira karya ra,
na ira rkarya verin Ubu.
7 Ba myala verin fareta afa ovi inovan ma myala verin ira.
Byahir munuk babahir kulu ovi fareta ra rfadoku ma byahir.
Msyoak nulu fareta ra ovu fyaturu vali bira sialang a verin ira.
Tamata ovi torang Yesus musti tsilobang ita
8 Byahir bira utan ra na'ut amar i byolan roak a.
Na'uk msyilobang mia lalawatan,
tevek tamata iki watan nlobang tamata liak,
na ia not-orang roak afa ovi rfadoku roak na'a Musa Ni inukun ra.
9 Musa ni inukun ra rfalak ne,
“Mia tamata ovi msyifa roak,
deka mtyuba ovu tamata ovi wol awarira verin mia,
deka msyifedan,
deka byori,
deka byo'itea afa ovi tamata liak rira.”
Inukun avyai ovu inukun liak ra munuk lahir ihirira ra rna'a roak inukun ini:
“Mlobang tamata liak ra wean watan i mlobang tenam a.”*
10 Wean i tamata isa nlobang tamata liak ra,
na ia veka wol notu afa ovi sian ra verin ira.
Ba wean i tamata iki watan nlobang tamata liak,
na ia not-orang munuk roak Musa ni inukun ra.
11 Mia musti myotu wean inyai,
tevek mkya'a roak ne,
naran roak ni amar a ma deka weadida tamata ovi rtuba watan,
na'uk byatar ma myorang urun Yesus.
Tevek amar i beti torang Yesus nti roak,
ovu amar i Ubu veka nsikat ita tali dida salasilan ra,
ma dida vava'at kakiwal,
sarseri roak.
12 Ita bisma tfalak ne,
dida vava'at fiang ini wean i ovan a mnanat roak,
ovu lyawan sarseri roak.
Ba tatalik lahir ma deka totu afa ovi sian ra,
wean tamata ovi rira vava'at ra rna'a watan dedan ralan.
Na'uk dida vava'at rna'a lyawan ralan,
ba musti totu a'uk afa ovi lolin ra,
wean i tataha minak ma al tangal afa ovi sian ra.
13 Afa ovi totu na'a dida vava'at ra musti wean lahir tamata ovi rira vava'at ra rna'a roak lyawan ralan.
Deka boranavut ita ovu deka totu snoba i boranavut ita ma taktufan,
deka tsifa tia ma watan,
deka taktufan urun ma totu watan afa ovi wol inovan ra,
deka tsingarahi ovu deka tbo'itea afa ovi tamata rira.
14 Na'uk myorang watan afa ovi Duila'a Yesus Kristus notu ra.
Deka myorang kikyai bira ininan sian ovi rotu ma myotu salasilan.