16
1 Konngol Joomiraaɗo wari to Yehu ɓii Hanaani wi'i ɗum yottina ngol Ba'asa. Inan ko ngol wi'i:2 — Mi ittii ma e sollaare leydi faa mi waɗe hooreejo yimɓe am Israa'iila. De a jokkii laawol Yerobo'am, a nanni yimɓe am Israa'iilankooɓe ley hakke faa mi tikkanii ɓe. 3 Ndaar, mi halkete aan e ƴuwdi maaɗa fuu, mi waɗan ƴuwdi maa hono ƴuwdi Yerobo'am ɓii Nebat. 4 Koreeji maa maayɗo ley wuro fuu, dawaaɗi nyaamata ɗum, maayɗo ley ladde du, pooli nyaamata ɗum.
5 Kabaaru Ba'asa keddiiɗo e baawɗe muuɗum e ko waɗi fuu na winndaa ley Dewtere Kabaaruuji Kaanankooɓe Israa'iila. 6 Ba'asa maayi, hawritowi e maamiraaɓe muuɗum. O mooɓaa wuro Tirsa. Ɓiyiiko Ela loomti mo laamii.
7 Katin e hunnduko annabi Yehu ɓii Hanaani, konngol Joomiraaɗo yottorinoo dow Ba'asa e suudu muuɗum saabe bonanda mawɗo mo o waɗunoo yeeso Joomiraaɗo faa ummini tikkere muuɗum hono no Yerobo'am waɗirnoo noon. Wooɗi du saabe o halkiinoo ƴuwdi Yerobo'am.
No Ela laamorii dow Israa'iila
8 Ela ɓii Ba'asa oon laamii dow Israa'iila ley wuro Tirsa, hitaande noogay e jeegaɓerde laamu Asa kaananke Yahuuda. Ela laamorii duuɓi ɗiɗi. 9 Ammaa golloowo makko Simri, hooreejo feccere torkooji pucci makko, dabi warude mo. Wakkati oon Ela na wonnoo wuro Tirsa, imo sulii saabe o yarii doro ley suudu Arsa. Arsa oon wo hooreejo laamordu makko ley wuro ngoon. 10 Simri naati, tappi mo faa o maayi, de loomti mo laamii. Ɗum fuu ɗum waɗii ley hitaande noogay e jeɗɗaɓerde laamu Asa kaananke Yahuuda.
11 Nde Simri jooɗinoo dow jooɗorgal laamu fu, wari ƴuwdi Ba'asa fuu, yoppaay fay gorko gooto wanaa suka wanaa mawɗo hakkunde koreeji makko e banndiraaɓe makko fuu. 12 Noon Simri halkiri ƴuwdi Ba'asa fuu, o tabintini ko Joomiraaɗo wi'unoo dow Ba'asa e hunnduko annabi Yehu. 13 Hakkeeji Ba'asa e ɓiyum Ela ɗiin ngaddi jukkungo ngoon. Ɓe ngatti yimɓe Israa'iila du e hakke, ɓe tikkiniri Joomiraaɗo, Laamɗo Israa'iila e tooruuji maɓɓe ɓoli. 14 Kabaaru Ela keddiiɗo e ko waɗi fuu, na winndaa ley Dewtere Kabaaruuji Kaanankooɓe Israa'iila.
No Simri laamorii dow Israa'iila
15 Ley hitaande noogay e jeɗɗaɓerde laamu Asa kaananke Yahuuda, Simri laamorii balɗe jeɗɗi ley Tirsa. Tawi sordaasiiɓe na ngoni ɗakkol wuro Gibeton faa kaɓda e wuro ngoon, ingo jeyaa e gure Filistiyankooɓe. 16 Sordaasiiɓe ɓeen nani kabaaru Simri waɗii dabare faa warii kaananke. Nyannde ndeen Israa'iilankooɓe fuu paamiri ley hoɗorde muɓɓen de ngaɗi Omiri, hooreejo sordaasiiɓe oon kaananke. 17 Ndeen Omiri e Israa'iilankooɓe fuu ndilli Gibeton. Ɓe njehi ɓe piilowi wuro Tirsa ngoon. 18 Nde Simri yi'unoo sordaasiiɓe na piilii wuro ngoon fu, naati ley suudu reenirdu wonndu nder suudu laamordu de wuli ndu dow muuɗum faa maayi. 19 Ɗum fuu ɗum hewtake mo saabe hakkeeji makko e bonanda mo o waɗi yeeso Joomiraaɗo. Imo jokkunoo laawol Yerobo'am, imo waɗannoo hakke, imo wattannoo Israa'iilankooɓe du, ley hakke. 20 Kabaaru Simri keddiiɗo e dabare muuɗum bonde fuu na winndaa ley Dewtere Kabaaruuji Kaanankooɓe Israa'iila.
No Omiri laamorii dow Israa'iila
21 Caggal ɗuum, leydi Israa'iila fecci pecce ɗiɗi. Woɓɓe maɓɓe njinngani Tibini ɓii Ginat faa ngaɗa ɗum kaananke, heddiiɓe du ndewi Omiri. 22 Ammaa yimɓe jokkuɓe Omiri ɓeen njaalii ɓe Tibini. Tibini maayi, de Omiri laamii. 23 Ley hitaande capanɗe tati e go'aɓerde laamu Asa kaananke Yahuuda, Omiri laati kaananke Israa'iila. O laamorii duuɓi 12 dow Israa'iila. O jooɗorii duuɓi jeegom ley huɓeere Tirsa. 24 O soodiri waamnde Samariya e junngo Semer, talantiiji cardi ɗiɗi (ɗum na hawra e kilooji 70). O nyiɓii wuro dow waamnde ndeen, o inndiri ngo Samariya, innde Semer jeynooɗo nde oon.
25 Omiri waɗi ko boni yeeso Joomiraaɗo. Hakke makko oon ɓurii hakkeeji kaanankooɓe artiiɓe mo fuu. 26 O jokkii laawol Yerobo'am ɓii Nebat, imo waɗa hakkeeji, imo luttina yimɓe Israa'iila du. O tikkiniri Joomiraaɗo, Laamɗo Israa'iila e tooruuji makko meereeji. 27 Kabaaru Omiri keddiiɗo e golleeji muuɗum mawɗi e ko waɗi fuu na winndaa ley Dewtere Kabaaruuji Kaanankooɓe Israa'iila. 28 Omiri maayi, hawritowi e maamiraaɓe muuɗum. O uwaa ley Samariya. Ɓiyiiko Ahabi loomti mo laamii.
No Ahabi laamorii Israa'iila
29 Ley hitaande capanɗe tati e jeetataɓerde laamu Asa kaananke Yahuuda, Ahabi ɓii Omiri oon laamii dow Israa'iila. O laamorii duuɓi 22 ley galluure Samariya. 30 Ahabi oon waɗi ko boni yeeso Joomiraaɗo. Bonanda makko faltake bonanda kaanankooɓe artiiɓe mo fuu. 31 Ko o jokki hakkeeji Yerobo'am ɗuum, heƴaay mo. O ɓeydi hakke katin, o dewli Yesabel ɓii Etba'al kaananke Sidoninkooɓe. O yehi o ɗowtanowi tooru Ba'al, o sujidani ndu. 32 O nyiɓani tooru Ba'al nduun hirsirde ley suudu ndu o nyiɓannoo ɗum ley Samariya nduun. 33 Ahabi waɗani tooru Asera bimmbeere. O tikkini Joomiraaɗo, Laamɗo Israa'iila. O ɓernini ɗum faa ɓuri kaanankooɓe Israa'iila artiiɓe mo fuu. 34 Wakkati oon gorko bi'eteeɗo Hiyel mo Baytila nyiɓitii galluure Yeriko. Nde o joƴƴinnoo maadi mayre fu, hammadiijo makko Abiram maayi. Katin du, nde o darnunoo dammbuɗe kokuwol galluure ndeen fu, koddaajo makko Seguba maayi. Noon ɗum tabintiniri konngol ngol Joomiraaɗo haaldunoo e hunnduko Yoosuwa ɓii Nuun* ngool.