No Abiiyam laamorii dow Yahuuda
(2 Kabaaruuji 13:1-3, 22-23)
15
1 Ley hitaande sappo e jetataɓerde laamu Yerobo'am ɓii Nebat, Abiiyam laamii Yahuuda. 2 O laamii ley Urusaliima duuɓi tati. Inniiko wo Ma'aka ɓii Abiisalom. 3 O jokkii hakkeeji ɗi baabiraaɓe makko ngaɗannoo yeeso makko. O yiɗiraay Joomiraaɗo, Laamɗo makko e ɓernde makko fuu hono no maamiiko Daawda noon. 4 Ammaa saabe Daawda, Joomiraaɗo Laamɗo makko hokki mo ƴuwdi njaynoori yeeso muuɗum faa abada. Joomiraaɗo hokki mo ɓiɗɗo gorko faa laamu heddo ley Urusaliima. 5 Sabo Daawda waɗii ko wooɗi yeeso Joomiraaɗo, o luttaay jamirooje muuɗum haddi nguurndam makko fuu, si wanaa e kabaaru Uriya Hitiyankeejo oon. 6-7 Wolde wonnoonde hakkunde Robo'am e Yerobo'am ndeen, na heddii ley nguurndam Abiiyam fuu. Kabaaru Abiiyam keddiiɗo e ko waɗi fuu, na winndaa ley Dewtere Kabaaruuji Kaanankooɓe Yahuuda. 8 Abiiyam maayi, hawritowi e maamiraaɓe muuɗum. O uwaa hakkunde muɓɓen ley Galluure maamiiko Daawda. Ɓiyiiko Asa loomti mo laamii.No Asa laamorii dow Yahuuda
(2 Kabaaruuji 14:1-2; 15:16–16:14)
9 E ley hitaande noogayaɓerde laamu Yerobo'am kaananke Israa'iila, Asa laamii dow Yahuuda. 10 O laamorii duuɓi 41 ley Urusaliima. Maamiiko debbo wo Ma'aka ɓii Abiisalom. 11 Asa golli ko fonnditii yeeso Joomiraaɗo hono maamum Daawda. 12 O riiwi waɗooɓe woykuuru saabe tooruuji muɓɓen ɓeen, o halki tooruuji ɗi baabiiko waɗunoo fuu. 13 Katin du o itti maamiiko Ma'aka e teddeengal muuɗum sabo kam nyiɓanno tooru Asera alhaali nyiddiniiɗo. Asa itti tooru nduun de wuli ndu ley gooruwol Kederon. 14 Ammaa nokkuuje cakkirɗe kalkaaka. Fay e noon fuu Asa na woodi ɓernde laaɓunde yeeso Joomiraaɗo haddi nguurndam muuɗum fuu. 15 O nanni ley suudu Dewal Joomiraaɗo dokke makko ceniiɗe e dokke baabiiko ceniiɗe, ɗum woni kaŋŋe e cardi e kujje feere feere.
16 Wolde na woodi hakkunde Asa e Ba'asa kaananke Israa'iila haddi nguurndam maɓɓe fuu. 17 Ba'asa kaananke Israa'iila oon wari faa haɓda e Yahuuda. Ba'asa nyiɓi wuro Rama faa o haɗa yimɓe wurtaade e naatude to Asa kaananke Yahuuda. 18 Ndeen Asa hooƴi jawdi, ɗum woni cardi e kaŋŋe keddiindi ley suudu Dewal Joomiraaɗo e ley suudu laamordu muuɗum fuu de hokki ndi gollanooɓe muuɗum faa njaara ndi to Ben-Hadad ɓii Tabarimon, taan Hejoyon, kaananke Siiriya jooɗiiɗo Damas. O neli du oon wi'e:
19 — Accaa ngadden amaana hono no bammaa e baaba am ngaddunoo. Inan miɗo nelde dokkal kaŋŋe e cardi. Taƴaa amaana gonɗo hakkunde maaɗa e Ba'asa kaananke Israa'iila faa dilla woɗɗoo kam.
20 Ben-Hadad hettindanii kaananke Asa, neli hooreeɓe sordaasiiɓe muuɗum dow galluuje Israa'iila. Ɓe njaalii Iyon e Dan e Abel-Bayti-Ma'aka e Kinaret e leydi Naftali fuu. 21 Wakkati Ba'asa nannoo kabaaru oon fu, seli nyiɓugol wuro Rama, dilli jooɗowii Tirsa. 22 Ndeen kaananke Asa hawrondini yimɓe Yahuuda fuu, fay gooto o yoppaay. Ɓe kooƴi kaaƴe e leɗɗe ɗe kaananke Ba'asa oon nyiɓiranno wuro Rama. Ɓe nyiɓiroyɗe Geba ley leydi Benyamin e Mispa. 23 Kabaaru Asa keddiiɗo e baawɗe muuɗum e galluuje ɗe nyiɓii e ko waɗi fuu, na winndaa ley dewtere Kabaaruuji Nyalaaɗe Kaanankooɓe Yahuuda. Wakkati naywaaku makko, koyɗe naawi mo. 24 Asa maayi, hawritowi e maamiraaɓe muuɗum. O uwaa hakkunde muɓɓen ley Galluure maamiiko Daawda. Yehosafat loomti mo laamii.
No Nadab laamorii dow Israa'iila
25 Ley hitaande ɗiɗaɓerde laamu Asa kaananke Yahuuda, Nadab ɓii Yerobo'am laamii Israa'iila. O laamii dow Israa'iila duuɓi ɗiɗi. 26 O waɗi ko boni yeeso Joomiraaɗo, o jokki laawol baabiiko e hakke mo watti yimɓe Israa'iila oon. 27 Ba'asa ɓii Ahiya mo lenyol Isakar oon, na dawra faa waɗa kaananke Nadab oon ko boni. Ba'asa wari mo ley wuro Filistiyankooɓe wi'eteengo Gibeton. Tawi wakkati oon Nadab e Israa'iilankooɓe na piilii wuro ngoon. 28 Ndelle Ba'asa wari mo ley hitaande tataɓerde laamu Asa kaananke Yahuuda, de loomti mo laamii. 29 Illa puɗɗam laamu makko, o wari yimɓe lenyol Yerobo'am fuu. O heddaay fay gooto. O halki ɓe fuu faa haala ka Joomiraaɗo haalirnoo e hunnduko maccuɗo muuɗum Ahiya mo wuro Silo kaan tabita. 30 Ɗum fuu ɗum waɗii sabo Yerobo'am waɗii hakke, luttini yimɓe Israa'iila du, faa ɓe naati ley hakke oon. Saabe ɗuum o umminiri tikkere Joomiraaɗo, Laamɗo Israa'iila.
31 Kabaaru Nadab keddiiɗo e ko waɗi fuu na winndaa ley Dewtere Kabaaruuji Kaanankooɓe Israa'iila.
32 Wolde na wonnoo hakkunde Asa e Ba'asa kaananke Israa'iila haddi nguurndam maɓɓe fuu.
No Ba'asa laamorii dow Israa'iila