No nyawraaɗo nguru laaɓinirtee
14
1 Joomiraaɗo haaldi e Muusaa wi'i:— 2 Inan yamiroore dow nyawraaɗo nguru nyannde laaɓintee. O yaaree to almaami. 3 Almaami oon wurtoo ley hoɗorde ndeen de hiinya mo. Si tawii o daɗii e nyawu nguun fu, 4 almaami yamiran laaɓinteeɗo oon waddanee pooli ɗiɗi laaɓuɗi e leggal seddere e ɓoggol boɗewol e liccal lekki hisopi. 5 O yamira foondu go'aɓurdu nduun hirsee dow heeɗoore wondunde e ndiyam laaɓuɗam. 6 Foondu ɗiɗaɓurdu nduun du, o hooƴida ɗum e leggal seddere ngaal e ɓoggol ngool e liccal hisopi ngaal, o suuwa ɗum fuu ley ƴiiƴam foondu hirsaandu dow ndiyam laaɓuɗam nduun. 7 O misa ɗam dow laaɓinteeɗo oon kile jeɗɗi. Caggal ɗuum, o holla joomum laaɓii de o yoofa foondu wuurndu nduun fiira naata ladde.
8 Laaɓinteeɗo oon lonna kaddule muuɗum, femmba leeɓi ɓanndum fuu de laatoo laaɓuɗo. Caggal ɗuum imo waawi wartude ley hoɗorde ndeen ammaa o heddoo yaasin hukum makko faa waɗa balɗe jeɗɗi. 9 Nyalaande jeɗɗaɓerde ndeen, o femmba hoore makko e waare makko e leeɓi gite makko e leeɓi ɓanndu makko fuu. O lonna kaddule makko, o lootoo de o yeccoo o laaɓuɗo.
10 Nyalaande jeetataɓerde ndeen, o wadda jawɗi ɗiɗi e mbortu ngu ndunngu ngootu tawa ɗi fuu ɗi ngalaa malal. Tawta sadaka kilooji jeenay conndi ɓoosidaandi e nebbam e nebbam feccere liitere. 11 Almaami laaɓinoowo oon yaara o kanko e sadakaaji makko ɗiin fuu yeeso Joomiraaɗo dammbugal hukum Ceniiɗo. 12 Almaami waɗa jawgel gootel e feccere liitere nebbam ɗaam sadaka njoɓdi hakke. O ɓanta sadaka oon fuu yeeso Joomiraaɗo. 13 O hirsa jawgel ngeel to kirsamaaji sadaka yaafeede e buleteeɗi kirsetee, ley nokkuure seniinde toon. Sadaka njoɓdi hakke e mo yaafeede oon fuu wo almaami jeyi. Wo ɗum huunde seniinde sanne. 14 Almaami itta ƴiiƴam kirsamaari sadaka njoɓdi hakke ndiin de wuja dow mbaggudi nowru laaɓinteeɗo oon nyaamru, e dow honndu muuɗum wordu ndu junngo nyaamo e ndu koyngal nyaamal. 15 Almaami watta nebbam ɗaam nder junngo muuɗum nano. 16 Ndeen suuwa sappordu muuɗum nyaamru ley nebbam ngonɗam nder junngo muuɗum nano ɗaam de misa kile jeɗɗi yeeso Joomiraaɗo. 17 Almaami itta seeɗa nebbam keddiiɗam e junngo muuɗum ɗaam wuja dow mbaggudi nowru makko nyaamru e dow honndu makko wordu ndu junngo nyaamo e ndu koyngal nyaamal dow ɗo wujunoo ƴiiƴam sadaka njoɓdi hakke ɗoon. 18 Almaami watta nebbam kedditiiɗam ley junngo muuɗum ɗaam dow hoore makko. Ɗum fuu wo faa o laatoo laaɓuɗo yeeso Joomiraaɗo. 19 Caggal ɗuum, almaami waɗa sadaka yaafeede oon. Noon o waɗiranta joomum faa laatoo laaɓuɗo. O hirsa kirsamaari mbuleteendi ndiin. 20 O sakka dow sakkirde ndeen sadaka buleteeɗo e mo conndi, faa joomum laatoo laaɓuɗo.
No talkaajo nyawraaɗo nguru laaɓinirtee
21 Si tawii laaɓinteeɗo oon wo talkaajo, walaa baawɗe fu, wadda njawdiri ɓanteteendi yeeso Joomiraaɗo saabe sadaka njoɓdi hakke faa laaɓinee. O ɓeyda e sadaka oon kilooji tati conndi ɗaatundi ɓoosidaandi e nebbam e nebbam feccere liitere. 22 Katin o ɓeyda buugaali ɗiɗi maa nyaabe ɗiɗi fodde ko o heɓi waddude. Wooturu waɗee sadaka yaafeede, heddiindu du, sadaka buleteeɗo.
23 Nyalaande jeetataɓerde, o wadda sadakaaji ɗiin fuu to almaami dammbugal hukum Ceniiɗo yeeso Joomiraaɗo. 24 Almaami hooƴa njawdiri njoɓdi hakke ndiin tawta feccere liitere nebbam ɗaam, ɓanta ɗum yeeso Joomiraaɗo de waɗa sadaka. 25 O hirsa njawdiri sadaka njoɓdi hakke ndiin. O itta ƴiiƴam mayri, o wuja dow mbaggudi nowru laaɓinteeɗo oon nyaamru e dow honndu muuɗum wordu ndu junngo nyaamo e ndu koyngal nyaamal. 26 O watta nebbam nder newre junngo makko nano. 27 O suuwa honndu makko nyaamru nder nebbam ngonɗam ley junngo makko nano ɗaam de o misa kile jeɗɗi yeeso Joomiraaɗo. 28 O itta nebbam ngonɗam ley junngo makko ɗaam o wuja dow mbaggudi nowru muuɗum nyaamru e dow honndu muuɗum wordu ndu junngo nyaamo e ndu koyngal nyaamal dow ɗo o wujunoo ƴiiƴam kirsamaari njoɓdi hakke ɗoon. 29 Almaami rufa nebbam keddiiɗam e junngo muuɗum ɗaam dow hoore makko faa o laatoo laaɓuɗo yeeso Joomiraaɗo. 30 Ndeen o waɗa buugaali ɗiɗi ɗiin maa nyaabe ɗiɗi ɗeen sadaka, fodde ko o heɓi waddude. 31 Wooturu waɗee sadaka yaafeede, heddiindu du, sadaka buleteeɗo yaada e sadaka conndi. Noon Almaami waɗiranta o faa o laatoo laaɓuɗo yeeso Joomiraaɗo.
32 Ɗee ngoni jamirooje dow nyawraaɗo nguru mo walaa baawɗe heɓude ko jeyi waddude faa laaɓinee.
No cuuɗi laaɓinirtee e puundi
33 Joomiraaɗo haaldi e Muusaa e Haaruuna wi'i: 34 Nde njottoyɗon Kanaana, leydi ndi kokkammi on njooɗoɗon ndiin, si mi wattii puundi gomma dow maadi suudu ley leydi ndi njeytoyton ndiin fu, 35 jom ɓaade ndeen yaha haalanowa almaami wi'a ɗum:
— Puundi gomma funti dow maadi suudu am.
36 Almaami yamiran ko woni ley suudu nduun fuu wurtinee de kam e hoore muuɗum naata ley mayru faa hiinya puundi ndiin. Noon waɗata taa ko tawanoo ley mayru fuu laatoo ko tuuni. 37 O hiinya puundi ndiin. Si ndi laatake hono huɗo hecco maa ndi wojjitii maa nokkuure ndeen luggii fu, 38 o wurtoo suudu nduun de o ommba ndu faa waɗa balɗe jeɗɗi. 39 Nyalaande jeɗɗaɓerde ndeen, o yeccoo ley mayru. Si o tawii puundi ndiin yaajii dow maadiiji mayru fu, 40 o yamiran kaaƴe nokkuure ndeen ittee paɗɗee yaasin galluure ndeen ley nokkuure tuunde. 41 O waɗa ley suudu nduun fuu heefee de leydi ndiin faɗɗee yaasin galluure ndeen ley nokkuure tuunde. 42 Kaaƴe goɗɗe ngaddee luttita arandeeje ɗeen wooɗi du, suudu nduun bolgoree loope goɗɗe.
43 Si puundi ndiin yeccake funti ley suudu nduun caggal ko kaaƴe nokkuure ndeen ittanoo e ko bolgitoraa loope ɗuum fu, 44 sey almaami yeccoo hiinya ndu katin. Si tawii puundi ndiin yaaji dow maadiiji suudu nduun fu, wo ɗum puundi mbonndi. Ndelle suudu nduun wo tuundu. 45 Ndu fusee de kaaƴe mayru e leɗɗe mayru e loope ɗe ndu mahiranoo fuu paɗɗowee yaasin galluure ley nokkuure tuunde. 46 Naatuɗo suudu nduun ley balɗe ɗe ndu jeyi ommbeede ɗeen fuu laatoto tuunɗo faa hewta futuro. 47 Pukkiiɗo maa nyaamuɗo ley mayru fu, sey lonna kaddule muuɗum.
48 Ammaa si almaami naatii ley suudu nduun de tawii puundi ndiin yeccaaki caggal ko ndu moƴƴintinaa ɗuum fu, hollan wo ndu laaɓundu, sabo puundi ndiin waatii. 49 Inan no suudu nduun laaɓinirtee: Almaami hooƴa pooli ɗiɗi e leggal seddere e ɓoggol boɗewol e hisopi. 50 O hirsa foondu wooturu dow heeɗoore wonndunde e ndiyam laaɓuɗam. 51 O hooƴa leggal seddere ngaal e hisopi oon e ɓoggol ngool e foondu heddiindu nduun, o suuwa ley ƴiiƴam foondu hirsaandu nduun e ndiyam laaɓuɗam ɗaam de o misa dow suudu nduun kile jeɗɗi. 52 Wo noon suudu nduun laaɓinirtee e ƴiiƴam foondu nduun e ndiyam laaɓuɗam ɗaam e foondu heddiindu nduun e leggal seddere ngaal e ɓoggol boɗewol ngool e hisopi oon. 53 O yoofa foondu heddiindu nduun yaasin galluure ndeen fiira naata ladde. Noon suudu nduun laaɓinirtee de laatoo laaɓundu.