कपालमपोर्रो सिक्का तंचि हिलवोरापोर्रो वायना गंडाल्कु
9
1 पजा हेय्युंगो दूता तूताकोम उह्कता, अस्के मब्बुनाल उंदि सुक्का बूमिपोर्रो अर्ता. आ सुक्काक वेल्लेन लोत मत्ता पोक्काता चाबि हीतद नना हूळतन. 2 आ सुक्का, लोत मत्ता पोक्काता तल्पुन तेंडता, अस्के पेद्दा बट्टिताल पेय्साना पोयालेह्का आ पोक्काताल पोया पेय्सता. दानहेंदाल पोड्दु, वडि हीकट आसोत्तां. 3 आ पोयाताल गोल्लाबामा पुळ्कु पेय्सि बूमिपोर्रो वातां. बूमिपोर्रोटा मिच्चोंक बसोंटा ताकत मंतनो असोंटदे ताकत अवुंक हियमळ जर्गता. 4 आ गोल्लाबामांकु, बूमिपोर्रोटा जाळितुन आयि, बवे पच्चटा पोर्कां, मराकुन आयि, नासडेम कियानायो. बोरा कपालमपोर्रो अय्ते पेनदा सिक्का तंचि हिल्लेनो सिराप ओर्कुने नासडेम कियाना इंचि वेहामळ जर्गता. 5 मनकलोर्कुन हव्काना अदिकारम अय्ते अवुंक हिल्ले, गानि हेय्युं नेल्कुनदाका ओर्कुन तकलिपते अराहना अदिकारम हियमळ जर्गता. अवुनाहेंदाल आयाना तकलिप, मनकन मिच्चो कस्कुते बल्हा मनंता अल्हा मत्ता. 6 अव रोजकुने लोकुल्क हामुरतुन पह्कांतुर, गानि ओर्कु हामुर दोर्को. हामुर कोरांतुर गानि ओर्कु हामुर दोर्को.7 आ गोल्लाबामां, लडाइहाटीं तयार कीता गुर्राल्कुनलेसि दिस्सेक मत्तां. अवुना तल्लानपोर्रो बंगारमता किरिटम दोसताप मत्ता. अवुना मोकाल्क मनकलोरा मोकाल्कुनलेसीं दिस्सेक मत्तां. 8 अवुना केल्कु मुर्ताह्कुना केल्कुनलेसि मत्तां. आनि अवुना पल्कु सिंहमता पल्कुनलेसि मत्ता. 9 अव कच्चिता अंगिं केरसि मत्तां. अवुना रेक्काना आवाज अय्ते, लडाइ कियालय वित्तना वेल्लेन गुर्राल्कुना रताल्कुनलेसि मत्ता. 10 अवुंक मिच्चोनलेसीं तोकां, कोंडिं मत्तां. मनकलोर्कुन हेय्युं नेल्कुनदाका तकलिपते अराहचि इर्राना ताकत, अवुना तोकानेन मत्ता. 11 वेल्लेन लोत पोक्काता दूता, अवुंक राजाल आसि मत्ता. हिब्रु बासाते दान अबदोन आनि ग्रीक बासाते अपुलोन इंचि इंतुर. 12 इद मोदाटा गंडम पेय्सि होत्ता. मुन्ने इंका रोंडु गंडाल्कु वायानव मंतां.
हारुंगो तूताकोम उह्कमळ
13 हारुंगो दूता तूताकोम उह्कता, अस्के पेनदा मुन्ने मत्ता बंगारमता गद्देता नालूं कोह्कुनाल उंदि लेंग नना केंजतन. 14 आ लेंग, तूताकोम पीसि मत्ता हारुंगो दूतातुन, “परात इनना पेद्दा बेरेटगा दोहासि मत्ता नालूं दूतान होळसीम,” इंचि इत्ता. 15 अदे वेला, अदे रोजु, अदे नेल्ला, अदे वर्साताहाटीं होळसालय पेन अवुन तयार कीसि मत्ता. बूमिपोर्रोटा लोकुल्कुना मूड बागाल्कुनाल उंदि बागम लोकुल्कुन हव्कानाहाटीं आ नालूं दूतन होळसियमळ जर्गता. 16 आ गुर्राल्कुनपोर्रो वायना सिपाइल्कु लेक्काते पुरा इरवै कोट्कु मत्तुर इत्तद नना केंजतन. 17 नना हूळता दर्सनमते, आ गुर्राल्कुनपोर्रो उद्दिस मत्तोर केरता कच्चिता अंगिं, तळमितलेसीं रगारगा, नेळि पंडि रंगुनलेसीं पच्चगा आनि गंदकम रंगुनव मत्तां. अवुना तल्लां सिंहमता तल्लानलेसीं दिस्सेक मत्तां. इंका अवुना तोडदाल तळमि, पोया, गंदकम पेय्सेक मत्ता. 18 आ मूड गंडाल्कुनाहेंदाल इत्ते, गुर्राल्कुना तोडदाल पेय्सना तळमि, पोया, गंदकम इवुनाहेंदाल बूमिपोर्रोटा मूड बागाल्कुना लोकुल्कुनाल उंदि बागम लोकुल्कुन हव्कीसि पोहमळ जर्गता. 19 आ गुर्राल्कुना ताकत अवुना तोड्डिने, तोकाने मत्ता. अवुना तोकांक तरास तल्लानलेसीं तल्लां मत्ताहाटीं, अव लोकुल्कुन कस्कीसि ओर्कुन तिप्पल्क किय्युंदूं. 20 अव गंडाल्कुनाहेंदाल अचोने तिप्पल्क वायिनागानि बोरय्ते हाया हिल्लुरो, ओर ओरा कराब कबाह्कुनाल मनसु मार्सकुन्ना हिल्लुर. ओर देय्याल्कुन इत्ते, वळ्का पर्रुवव, केंजा पर्रुवव, ताका पर्रुवव बंगारम, एंडि, रागि, बंडा, कट्टेतोनि तयार कीता बोम्मन मोळ्कसेकेन मत्तुर. 21 अचोने आयका लोकुल्कुन हव्कमळ, होदें कियमळ, बोगमतनाल्क कियमळ, दोंगातनाल्क कियमळ इसोंटा कबाह्कुनालगुडा मनसु मार्सकुन्ना हिल्लुर.