एडुंगो सिक्कातुन कोलांचमळं
8
1 गोर्रे पोरि एडुंगो सिक्कातुन नेम्हाचि विच्चुतस्के स्वर्गमते सगम गंटादाका सुम-साम आता. 2 अस्के पेनदा मुन्ने नित्तिसि मननव एडुं दूतन नना हूळतन. आनि अवुंक एडुं तूताकोम्कु हियमळ जर्गता. 3 अगा इंकुंदि पेनदा दूता गद्देतगा वासि नित्तुता. दाना कय्दे बंगारमता गुगलेम कुळका मत्ता. दान्कु राजगद्दे मुन्ने मनना बंगारमता गद्देपोर्रो अंटोर पेनदा लोकुल्कुना पारतनातोने गुगलेम होळगनाहाटिंक वेल्लेन गुगलेम हियमळ जर्गता. 4 अस्के पेनदा दूताना कयदाल अद गुगलेमता पोया पेनदा लोकुल्कुना पारतनातोने पेनदागा एवता. 5 आ दूता दूपमता कुळकाते गद्देतगा मत्ता तळमितुन निहाचि अदुन बूमि पोर्रो पोच्चीता, अदुनहेंदाल मब्बु गळ- गळा इंचेके उरुमलय दल्गता, मेर्समळ आनि बुकंप आतां.एडुं दूताल्कु अवुना तूताकोम्कु उह्कमळ
6 अस्के तूताकोम पीसि मत्ता अव एडुं दूता तूताकोम्कु उह्कालय तयार आतां. 7 मोदाटा दूता तूताकोम उह्कता, अस्के नेत्तुर कलियसि मत्ता बंडां आनि तळमि बूमिपोर्रो अर्ता. अर्तस्के बूमिता मूड बागाल्कुनाल उंदि बागम आनि मराकुना मूड बागाल्कुनाल उंदि बागम कर्विसोत्ता. इंका पच्चाटा जाळिगुळा पुरागा वेसोत्ता. 8 रोंडो दूता तूताकोम उह्कता; अस्के तळमितोनि पोत्सेके मत्ता उंदि पेद्दा गुट्टातसोंटद बतलो समुद्रमते वाटमळ जर्गता. दानहेंदाल समुद्रमता मूंड बागाल्कुनाल उंदि बागम नेत्तुरतालेसि आसोत्ता. 9 अदुनहेंदाल समुद्रमते जीवाते मत्ता जिवरासिना मूंड बागाल्कुनाल उंदि बागम जिवरासि हासोत्तां. आनि समुद्रमते मत्ता जहाजकुना मूंड बागाल्कुनाल उंदि बागम नासडेम आता.
10 पेनदा मूडो दूता तूताकोम उह्कता, अस्के मब्बुनाल डिव्टितलेसि पोतसेके उंदि पेद्दा सुक्का बूमि पोर्रो अर्ता. अद सुक्का मूंड बागाल्कुनाल उंदि बागम बेरेह्कु आनि एता उटानपोर्रो अर्ता. 11 अद सुक्काता पोर्रोल कयमुल. दानहेंदाल एता मूंड बागाल्कुनाल उंदि बागम एर कयमुल आसोत्ता. अद एर उट्टाहाटिंक वेल्लेन मन्कालोर हासोत्तुर. 12 नालूंगो दूता तूताकोम उह्कता, अस्के पोड्दु, वेडसि आनि सुक्कां इवुना मूंड बागाल्कुनाल उंदि बागम नासडेम आता. अदुनहाटीं अवुना मूंड बागाल्कुनाल उंदि बागम हीकट आता. पोद्दाला-नर्कागुडा मूंड बागाल्कुनाल उंदि बागम हीकट आसोत्ता. 13 पजो उंदि गुव्वा डेगातुन मब्बुन नड्डुमताल परियसेक वायनद हूळतन अद जोरते इल्हा इनानद केंजतन: “इंदके मूंड दूतां अवुना तूताकोम उह्कानादे मंता, अव अवुना तूताकोम उह्कतस्के बूमिपोर्रो मनना अंटोर्क इरगा गोसा आयार! गोसा आयार! गोसा आयार!”