गोर्रे पोरि एडुं सिक्‍कान लेहमळं
6
1 पजा एडुं सिक्‍कानाल उंदि सिक्‍कातुन आ गोर्रे पोरि नेम्‍हाचि विच्‍चुता. अस्के जीवाते मत्‍ता आ नालुं जिवरासिनाल उंदि जिवरासि, पिडगु वाटते वायानसोंटा आवाजते, “वा” इत्‍तद नना केंजतन. 2 आनि अगा नाकु उंदि तेल्‍ला गुर्रम दिसता, दान पोर्रो वरोर बानम पीसि उद्‍दिस मत्‍तोर. ओन्कु उंदि किरिटम हियमळ जर्गता. ओर लडाइं गेल्सतोर, अय्नागानि इंका गेल्साना इंचि पेय्सतोर 3 गोर्रे पोरि रोंडो सिक्‍कातुन नेम्‍हाचि विच्‍चुता अस्के, जीवाते मत्‍ता आ नालुं जिवरासिनाल रोंडो जिवरासि, “वा” इंचि इत्‍तद नना केंजतन. 4 अस्के उंदि एर्राटा गुर्रम पलाते पेय्सानद नना हूळतन. लोकुल्कु वरोंक-वरोर हव्कुकुनना इंचि, अद गुर्रमपोर्रो उद्‍दिस मत्‍तोन्कु, बूमि पोर्रोटाल सांतितुन येतकुनना अदिकारम हियमळ जर्गता. ओन्कु उंदि पेद्‍दा तलवार हियमळ जर्गता. 5 बस्के अय्ते गोर्रे पोरि मुडो सिक्‍का तंचि मत्‍ता पुस्तकमतुन नेम्‍हाचि कोलांचता, अस्के मुडो जिवरासि, “वा” इत्‍तद नना केंजतन. आनि नाकु अगा उंदि कर्रे रंगुना गुर्रम दिसता. आ गुर्रमपोर्रो उद्‍दिस मत्‍तोना कय्दे उंदि तराजु मत्‍ता. 6 अच्‍चोटेने, जीवाते मत्‍ता आ नालुं जिवरासिना नड्‍डुमताल, “उंदि रोजुना कूलि कोत्‍ताने, उंदि किलो गोह्कु दोर्कंता, इंका अचोने कोत्‍ताने मूड किलोना जोन्‍नां दोर्कंता. गानि नियदुन आनि अंगुर पानकमतुन नासडेम कियमा,” इंचि उंदि लेंग केंजा वाता. 7 गोर्रे पोरि नालूंगो सिक्‍कातुन नेम्‍हाचि विच्‍चुतस्के जीवाते मत्‍ता आ नालुं जिवरासिनाल नालूंगो जिवरासि, “वा” इत्‍तद नना केंजतन. 8 पजा नाकु अगा उंदि पस्पु रंगुना गुर्रम दिस्ता. आ गुर्रमपोर्रो उद्‍दिस मत्‍तोना पोर्रोल हामुर; आनि ओना पजो-पजो नरकम वासेक मत्‍ता. ओन्कु बूमिता नालुं बागाल्कुनाल उंदि बागमपोर्रोटा लोकुल्कुन तलवारते, कर्वुने, बीमार्कुने आनि केडाता जिवरासिन हेंदाल नासडेम कियाना अदिकारम हियमळ जर्गता. 9 गोर्रे पोरि हेय्युंगो सिक्‍कातुन नेम्‍हाचि विच्‍चुतस्के मोक्‍कु हिय्यना गद्‍दे हिळु पेनदा पोल्‍लें लोकुल्कुंक वेहताहाटीं आनि ओरा गवाइ वेहताहाटीं हव्कीसि मत्‍तोर्कुना आत्मान हूळतन. 10 आ आत्मां पेद्‍दा आवाजते, “ए सामि, पवित्र आनि सत्‍तेम मनानोन, माकुन हव्कुता बूमिपोर्रोटा लोकुल्कुना न्यायम निमे बस्के कींतिन? ओरा न्यायम कीसि मावा नेत्‍तुरता बदला बस्के एतांतिन?” इंचि वरगेयालय दल्‍गतां. 11 पजा ओर्क अंटोर्क तेल्‍ला कपडीं हिसि ओर्कुन, “बदवेरदाका अय्ते मिवा दंटातुर सेवकुल्कुन आनि मिवा दादालुर्कुन मीवालेसिं हव्कानुर, इल्हा हायानुरा लेक्‍कां पुरागा आयानदाका मिमेट गळसेप आराम कीम्टु” इंचि वेहतोर. 12 गोर्रे पोरि हारुंगो सिक्‍कातुन नेम्‍हाचि विच्‍चुता, अस्के पेद्‍दा बूकंप आतद नना हूळतन. अस्के पोड्दु कर्रे गोंगोळिलेसीं कर्रेगा आनि वेळसिअंता बारे नेत्‍तुरलेसीं एर्रगा आता. 13 पेद्‍दा वडि दुमारम वाते तोया मराता पंडि बल्हा हिड अर्रंता, अल्हेने सुक्‍कां मब्बुनाल बूमिपोर्रो अर्तां. 14 मब्बु उंदि कागदेम गुंडळांचताप आसोत्‍ता. अल्हेन हरेक गुट्‍टा आनि दिबे अवुना जागानाल जर्गतां. 15 अस्के बूमिपोर्रोटा राजालोर, अदिकारिल्क, सायाबुल्कु, सिरमंतुल्कु, बलमगल्‍लोर्क, गुलामिते मत्‍तोर, गुलामिते हिल्वोर, इल्हा अंटोर लोकुल्कु गुट्‍टाना बुयाराल्कुने आनि पेद्‍दा बंडान सोर्रेने होंचि मकतुर. 16 मक्‍कीसि गुट्‍टां आनि बंडानतोनि, “मापोर्रो अर्सि, राजगद्‍देपोर्रो उद्‍दिस मत्‍तोना नदरताल आनि गोर्रे पोरिता होंगुनाल माकुन मक्‍किचटु. 17 बारित्‍ते, पेनदा होंग हुप्‍सना कतरनाक रोजु एवता. ओरा मुन्‍ने बोर नित्‍ता परांतुर?” इंचि इनालय दल्‍गतुर.