येसु मर्रा वांतोर
3
1 पावरमगल्ला दादालोर-अक्काह्कुनिटा! इद रोंडोवा सिट्टि नना मीक रासतन. इव रोंडु सिट्टिने मीवा पवित्र मनसुन जागर्तते इर्राट इंचि नना मति कीसि हीतन. 2 अदुनहाटीं मिमेट पवित्र पेनदा कबुरतोर मुन्नेने वेहचि मत्ता पोल्लेन आनि प्रेरितुल्कुना हेंदाल वेहतव सामि आनि मुक्ति हियानोना आदेसकुन मति इर्रागोम. 3 आकिर रोजकुने मीकुन कारेड्डाल्क कियानोर वायानुर, वासि ओर ओरा कराब इच्चाना परकारम ताकानुर, इद पोल्ले मीक मुन्ने तेळियमळ गावाले. 4 इंका ओर वासि, “ओर मर्रा वांतोर इंचि हीता पोल्ले बतल आता? मावा एनकटा पेद्दाल्क अय्ते हासोत्तुर, आनि दुनिया पुटतस्केटाल अन्नि पोल्लें बल्हा मत्तव अल्हे मंतां,” इंचि मीकुन पूसकींतुर. 5 इंका ओर, वेल्लेन वर्सां मुन्ने पेन दाना पोल्लेतोनि बूमितुन, मब्बुन येताल पुटिस्ता. पुट्टिचि एतुन वेरे कीसि निल्हाता, इद पोल्ले ओर्क तेळियसिगुडा मति मर्गंतुर. 6 एता हेंदाले अद कालमता दुनिया कम्मुळते मुळगिसि नासडेम आता. 7 गानि इंदके मनना मब्बु आनि बूमितुन, अदे पोल्लेते तळमितोनि नासडेम कियाना रोजुनदाका कापाळसि इरसेक मंता. आनि बक्ति हिल्वोरा न्यायम आनि नासडेम आयाना रोजुनदाका अल्हेन मनंता.8 गानि पावरमतोरिटा! सामिनगा उंदि रोजु वेय वर्सानालेसिं आनि वेय वर्सां उंदि रोजुनलेसिं मनंता इद उंदि पोल्लेतुन मति मर्गमटु. 9 सामि हीता पोल्ले पूरा कियालय ओर आल्सेम कीसेक मंतोर इंचि इच्चुर इंतुर, ओर अल्हा आल्सेम कीसेक हिल्लोर. गानि बोरे मनकल नासडेम आयाकोंटा, अंटोर्क ओरा मनसु मार्सुकुनना मोका दोर्कना इंचि मीवा बारेमते ओर्सुकुंचेके मंतोर.
10 गानि सामि मर्रा वायाना रोजु दोंगानलेसिं वांता. अस्के मब्बु पेद्दा आवाजतोनि दिसाकुंटा आंता. मब्बुने मंदनव अन्नि तळमिते कर्गिस दांतां आनि बूमि, बूमिपोर्रो मत्तव अन्नि वेसि दांतां. 11 इवन्नि नासडेम आयाना मंतां, अदुनहाटीं मिमेट पवित्रमते आनि पेनदा पिस्वरते बल्हा मंदगोम, विचारम कीम्टु. 12 पेन वायाना रोजुनाहाटीं मिमेट एदुर हूळसेके मंतिर, अद बिराना वायाना इंचि कोरसेके मंटु. अद रोजु मब्बु तळमिते वेसि नासडेम आंता आनि अवुने मत्तव अन्नि बारे तळमि दगडाकु कर्गिस दांतां. 13 गानि पेन हीता पोल्ले परकारम मनम पूना मब्बु, पूना बूमिताहाटीं एदुर हूळसेक मंतोम. अगा सत्तेमे निल्सि मनंता.
14 अदुनहाटीं पावरमतोरिटा, मिमेट इवुनाहाटीं एदुर हूळसेक मंतिट, अय्ते पेनदा मुन्ने सांतिते, डाग हिलाकुंटा, तप्पु हिलाकुंटा मनालय कोसिस कीम्टु. 15 मना सामिना ओप्के पीसि मनमळ मना मुक्तिहाटींगे इंचि इनकुंटु. सामि हीता बुद्दि परकारमे मना पावरमगला पौलुस दादल मीक इव पोल्लें रासतोर. 16 इवुना बारेमते ओर ओना अन्नि सिट्टिने रासतोर. गानि अव्टेटाल इच्चुं पोल्लें तेळियालय वेल्लेन कस्टम मंतां. करियवोर, उंदि पोल्लेते निल्सि मनवोर, वेरे दर्मसास्त्रमते मत्ता पोल्लेन कीताप इवुनगुडा कींतुर. अल्हा कीसि ओरा नासडेमतुन ओरे तरकुंतुर.
17 अदुनहाटीं पावरमतोरिटा! मीक इव पोल्लें मुन्नेटाले एरपाट मंतां, निति हिल्वा लोकुल्कुना तप्पुकुने हिरकीसि, मीवा गट्टिगा निल्सि मत्ता हर्दाल तप्पीसि होनाकोंटा हुसारते मंटु. 18 मना सामि आनि मुक्ति हियना येसु किरिस्तुना कृपाते, तेल्विते मिमेट बेरस्सेके होंटु. इंदके आनि बस्केळ्क ओन्के पेद्दातनम दोर्किकांटि, आमेन.