आबद्दम कराहनोर
2
1 अय्ना अस्केगुडा लोकुल्कुना नड्डुम आबद्दम पेनदा कबुरतोर मत्तुर, अल्हेने मीवा नड्डुमगुडा आबद्दम कराहनोर मंदानुर. ओर नासडेम कियाना नियमाल्कुन मक्किस पीसि वांतुर आनि बोरय्ते सामि ओर्कुन अस्तोर, ओनगुडा ओर ओप्कुन्नुर. इल्हा ओरद-ओरे नासडेमतुन बिराना ओरापोर्रो तरकुंतुर. 2 वेल्ले लोकुल्क ओरा सिग्गु हिल्वा कबाह्कुन हूळसि ओरालेह्केन कियानुर. ओरासंटोराहाटींगे सत्तेमता हर्रि बदनाम आंता. 3 आबद्दम कराहनोर, आस्तिताहाटीं तिय्यटा पोल्लें वेह्चि मीकुन ओरा पायदाहाटीं वाळकुंतुर. ओर्क हीता सिक्साता आदेस मुन्नेटाले तयारे मंता, ओरा नासडेम कूर्कसेके हिल्ले.4 बारित्ते, बस्के अय्ते पेनदा दूतां पापम कीतां, अस्के पेन अवुनगुडा होळसा हिल्ले. न्यायमता रोजु वायानादाका अवुन नरकमते हिकटता पोक्काने वाटसि इरता. 5 अच्चोरे आयाका पेन एनकटा कालमता दुनियातुनगुडा होळसा हिल्ले, अद कालमते बक्ति हिल्वा लोकुल्कुना दुनियापोर्रो पेद्दा कम्मुळतुन वायागोटता. गानि सत्तेमता पोल्लें वेहता नोहानतोनि एडुरकुन पिस्सागोटता. 6-7 अल्हेने सदोम आनि गामोरा सहरकुने सत्तेमंतुड लोत इनानोर मत्तोर. ओर आ सहरता दुस्ट लोकुल्कुना कराब कबाह्कुनाल वेल्ले दुक्कमते मनुंदुर. अदुनहाटीं पेन ओन सिक्साताल पिस्सागोटता आनि आ सहरकुन बूळदि कीसि पोहता. इल्हा बोरय्ते बक्ति हिलाका पिसंतुर ओर्कु इसोंटा सिक्सा वांता इंचि उदाहरनलेसिं हूपिस्ता. 8 बारित्ते आ सत्तेमंतुड ओरा नड्डुम मत्ताहाटीं ओर्कुन हूळसि, ओरां पोल्लें केंजसि, ओर कियाना रोता कबाह्क ओना जीवाक रोज-रोज इरगा बादा अन्पिच्चुंदु. 9 इल्हा, बक्तिगल्लोर्कुन परिक्सानाल बल्हा कापाळना आनि बक्ति हिल्वोर्कुन न्यायमता रोजुनदाका सिक्साते बल्हा वाटसि इर्राना इत्तद सामिंक तेळियसे मंता. 10 विसेस कीसि, बोरय्ते पापमते आनि मेंदुलता आसेता अदिकारते मंतुर, ओर गर्रा आनि जिद्दिते मंचि स्वर्गमकु संबंदिंचि मत्तोर्कुनगुडा तेर्हालय वेरियुर. 11 पेनदा दूतां अय्ते ओरकन्ना एक्को ताकत, बलम मत्तव आंदूं, अय्ना सामिना मुन्ने ओरा बारेमते तेराहनसोंटा पोल्लें वळ्कों. 12 गानि ईर ई पोल्लेना बारेमते तेल्वि हिल्वोर आंदुर, पीसि हव्कालये पुटतव बुद्दि हिल्वा जिवरासिनसंटोर आंदुर. अवुनलेसिंगे ईरगुडा नासडेम आंतुर. 13 ओरा तप्पुड कबाह्कुन पीसि ओर्कु पलम दोर्कंता. पोद्दला मौज-मजां कियमळतेन वेल्लेन कुसि मंता इन्कुंतुर. ओर मीवातोनि कलियसि गाटो तिनानेंकेगुडा अल्हेन कीसि ओर ओरा मजां येतसेके मनंतुर. अदुनहाटीं ओर मीवा नड्डुम उंदि डाग आनि मच्चालेह्कातोर आंदुर. 14 ओरा कळ्क बोगमतनमते निंडिस मंतां. ओर पापम कियाका मन्ना पर्रुर. विस्वासमते गट्टिगा हिल्वोर्कुन नळेह कीसि पापमते अरहंतुर. ओरा मनसु आस्तिक अल्वट आसि मंता. ओर सापनेमते मत्तोरा मर्क आंदुर, 15 ओर सवरटा हर्रि होळसि तप्सोत्तोर आंदुर, बोअरना मर्रि बिलाम इननोना हर्रि पीतुर. बिलामुंकु कराब कबाह्कुना कूलि पसंद मत्ता. 16 गानि ओर कीता कराब कबाह्कुनाहाटीं ओनकु तेळियागोट्सि वेहमळ जर्गता. वळ्का वायवा उंदि गाळदि मनकना लेंगुने आ पेनदा कबुरतोना मुर्कातनमतुन आपता. 17 ओर एर हिल्वा कुहिं आनि तुपान वाते तेहकुंचि होनना मब्बु तेर्पें आंदुर. ओराहाटीं बस्केळ्क हीकट मनना उंदि जागा तयार कीसि मंता. 18 बारित्ते ओर बताके ओज्जुवा पोंगुळ पोल्लें वळ्कसेके मनंतुर, तप्पुड हर्रि ताकानोरव्टेटाल तप्पिच्कुंचि इंदके-इंदकेने बेसता हर्दे वातोर्कुन, ओर ओरा मेंदुल्ता रोता आसेना हेंदाल बोगमतनमते अर्हांतुर. 19 ओर कुद्दे कराब कबाह्कुना दासुल्क आसि, इंकावरोन असोंटा गतिताल तेंडांतोम इंचि पोल्ले हींतुर. बारित्ते वरोर मनकन बतलय्ते गेल्संतनो, ओर अदुना दासुड आसि मनंतोर. 20 ओरगिंटा मना सामि मुक्ति हियना येसु किरिस्तुना तेल्विता हेंदाल दुनियाता कराब कबाह्कुनाल पलाते अर्तंका, मर्रा अवे कराब कबाह्कुने हिरकीसि अवुना लोपोने ताकते, ओना गति मुन्नेटा गतिकन्ना आकिरता गति वेल्ले कराब मनंता. 21 बारित्ते ओर सत्तेमता हरदुन एरपाट कीसि, ओर्क हीता पवित्र आदेसताल तप्सोन्मळकन्ना, अद हर्रि ओर्कु तेळियका मनमळे बेस मत्ता. 22 इद ओरा बारेमते, “नय अद कक्कुतदुन तिनालय मर्रा मल्लंता, बेस नोर्ता पद्दि मर्रा बुर्दातेन पोर्लंता,” इनना निजम सात्रम परकारम जर्गता.