येसु मना पेद्‍दा पेर्मल आंदुर
8
1 इदवेरदाका वेहासेक वाता पोल्‍लेता मेन पोल्‍ले बतल इत्‍ते, स्वर्गमते अन्‍निट्‍कन्‍ना ताकतवार पेनदा तिना बाजूंक राज्येम कियालय बोरय्ते उद्‍दिस मंतोरो, ओरे मावाहाटीं पेद्‍दा पेर्मल आतोर.a 2 आनि अन्‍निट्‍कन्‍ना पवित्र जेगाते इंका कुद्‍दु पेने निल्हाता निजम डेराते येसु पेद्‍दा पेर्मल आसि पेनदा सेवा कींतोर. 3 हरेक पेद्‍दा पेर्माना कबळ अय्ते पेनदुक मोक्‍कु हियमळ, पलारम वाटमळ आंद. अल्हेने मावा पेद्‍दा पेर्मल येसुनगागुडा मोक्‍कु हियालय बतलन्‍ना मनमळ अवसरम मंता.
4 मूसाना नियम परकारम पलारम वाटानोर बूमिपोर्रो वेल्‍लेन पेर्मालोर मंतुर. अदुनहाटीं येसु बूमिपोर्रो मंचि मत्‍ते, पेर्मलगुडा आयाकोन्‍नेर. 5 पेनदा डेरा निल्हाका मुन्‍ने पेन मूसांक, “निमे गुट्‍टापोर्रो नावातोनि मत्‍तस्के नना नीकु बद नक्‍से अय्ते हुपिस्तनो, बरोबर अल्हेने नाहाटीं डेरा निल्हा,” इंचि वेहचि मत्‍ता. दीना अर्तम बतल इत्‍ते, पोर्रो स्वर्गमते मंदना पेनदा डेराता निडालेह्केन, इद बूमिते पेर्मालोर सेवा कियाना जेगा मनंता.b 6 गानि इंदके माकुन पेनदा पूना करारते कल्‍पानोर येसे आंदुर. इद करार, मुन्‍नेटा पडाना करारकन्‍ना बच्‍चोनो बेस मंता. अद बल्हा इत्‍ते, पूना करारते पेन वेहता पोल्‍लें, मुन्‍नेटा पडाना करारते मत्‍ता पोल्‍लेंकन्‍ना बच्‍चोनो बेस मंतां, इल्हा इद बूमिते मनना पेर्मालोर्कन्‍ना येसुंक वेल्‍ले बेस दोर्कता.
7 ओक्‍कला पडाना करारते बतले तप्पु हिलाकोंटा मंचि मत्‍ते, पूना करारता अवसरमे अर्राकोनवड. 8 गानि पेन दाना लोकुल्कुनगा दोसेल्क दिसतस्के ओर्कुन इल्हा इत्‍ता:
“हूळाट, नना इस्राएल राज्येमतोनि आनि यहुदिया राज्येमतोनि
पूना करार कियाना रोजकु वासेकेन मंतां.
9 नना ओरा तादो-बाबुर्कुन कय पीसि इजिप्‍त देसेमताल पलाते तच्‍चि मत्‍तन.
अस्के ओरतोनि कीता करारलेह्का इद पूना करार मन्‍नो.
नना ओरतोनि कीता करार परकारम ओर ताका हिल्‍लुर,
अदुनहाटीं नना ओर्कुन लेक्‍का किय्योन.”
10 “गानि अव रोजकु वीडसोत्‍ता पज्जो,
नना इस्राएल लोकुल्कुनतोनि कियाना पूना करार इल्हा मनंता.
नना नावा नियमकुन ओरा मनसुल्कुने रासि,
अवुन ओरा बुद्‍दिते इर्रानालायक कींतन.
नना ओरा पेनदुन आकन, ओर नावा लोकुल्क आयानुर.”
11 “अद वेलाते सिन्‍नाल्क-पेद्‍दाल्क अंटोरे नाकुन एरपाट कीसि मनांतुर,
अदुनहाटीं, पेनदुन एरपाट कीम्टु, इंचि
लोता पक्‍कातोर्क आयि जीवातोर्क आयि
ओर-ओरा नाटेनोर्क वेहना अवसरम हिल्‍ले.”
12 “बारित्‍ते, ओर कियाना तप्पुड कबाह्कुन नना दयाते मापि कीकन
आनि ओरा पापाल्कुन मर्रा बस्केन मति किय्योन,”c
इंचि रासतद मंता. 13 इदुन पेन “पूना करार” इत्‍ताहाटीं मोदाटा करार कबळ्क ओज्जाकोंटा आसि पडानद आसोत्‍ता. आनि बद अय्ते कबळ्क ओज्जोनो अदुन पोहेपींता.