दासुल्कुनाहाटीं कोन्नि नियम्कु
6
1 बोरय्ते दासि कबळ कीसेके मंतुरो, ओर अंटोर ओरा मालकुल्कुन अन्नि तीरकुना मान-मर्यादालायक इन्कुनगोम. अस्केने पेनदा पोर्रोल आनि कराहता पोल्ले बदनाम आयाकोंटा मनंता. 2 इंका बोर दासुल्कुना मालकुल्क अय्ते विस्वासमते मंतुर, आ दासुल्क ओरा मालकुल्कुन, मना विस्वासि दादल इंचि सिन्नगा हूळानायो. मीवा सेवाता पायदा येतानोरगुडा मीवसोंटा पावरमगल्ला विस्वासुल्क आंदुर. इंचि ओरद इंका एक्को सेवा कियना. इसोंटव पोल्लें निमे ओर्क करहा आनि गट्टि दैरनेम हीम.आबद्दम बोदा आनि निजम दनम बारेमते कोन्नि पोल्लें
3 इंका ओक्कला बोरन्ना ई पोल्लें तप्पा वेरे कराहनय्ते, आनि मना सामि येसु किरिस्तुना निजम पोल्लेन पियाकोंटा, ओर वेहता बक्तितुन ओप्कुनाकोंटे, 4 ओर इरगा गर्राते निंडिस मंतोर आनि ओन्कु बतले तेळियो. असंटोर लोल्लिं आनि पोल्लेन पीसि जग्डाल्क कियना बिमार आसि मंतोर. दीनहेंदाल अय्ते कळ्क पोतमळ, जग्डम, अपमानम, कराब अनमानाल्क तयार आंता. 5 आनि इसोंटोरा नड्डुम बस्केळ्क लोल्लिं-जग्डाल्क आसेकेन मनंतां. इंका इसंटोरा बुद्दि हेळसोंचि, ओर निजमताल लक्कु आतोर आंद. अदुनहाटीं ओर पेनदा बक्तितुन कमाइ कियना उंदि हर्रि इन्कुंतुर.
6 पेनदा बक्ति समादानमते कियमळे पेद्दा दनम आंद. 7 बारित्ते मनम ई दुनियाते वायनेंके बतल तर्रा हिल्लोम आनि इगेटाल होननेंकेगुडा बतले ओया परोम. 8 अदुनहाटीं मनगा तिनालय तिंडि आनि केरालय कपडिं मत्ते, अव्टेन मनम समादानम मनना. 9 गानि सिरमंत आंतोम इन्कुनना लोकुल्कु कतरनाक परिक्साने, उर्रिने, अम्सरम हिल्वव वेल्लेन नुकसान कियनसोंटा इच्चाने हिरकंतुर. असोंटा इच्चां मनकलोर्कुन हेळाह्चि नासडेम कींतां. 10 बारित्ते कोत्तन पोर्रोटा पावरम, अन्नि रकाल्कुना सेड्डातनाल्कुंक हर्रि पुट्टिचंता. बचुटूरो लोकुल्क ओरा इच्चान दोर्किच्कुननाहाटीं विस्वासमताल तप्सोत्तुर आनि ओरा पिसवरते वेल्लेन दुक्कमतुन संपादिंच्कुंतुर.
तिमोतिंकु पौलुसना आकिर आदेसकु
11 गानि निमे पेनदा बक्ति कियाना मनकन आंदिन. इव अन्नि सेड्डातनाल्कुनाल लक्कु मंचेके नितिते, बक्तिते, विस्वासमते, पावरमते, सहनमते आनि सादातनम पज्जो ताका. 12 नीवा विस्वासमतुन दक्किच्कुनालय बेस लडाइ कीसेके मन्नु, बस्केळ्क पिस्सना पिसवरतुन गट्टिगा पीसि ताका, इद पिसवरहाटींगे नीकुन केयमळ जर्गता. ई मंचि पोल्लेतुन निमे वेल्लेन मंदि गवाइदार्कुना मुन्ने ओप्कुत्तिन. 13-14 अन्निटवुन जीवाते इर्रना पेनदा मुन्ने आनि पुंतुस पिलातुसना मुन्ने बेस गवाइ हीता किरिस्तु येसुना मुन्ने, नना नीकु आदेस हीसेक गदा, मना सामि येसु किरिस्तु मर्रा वायनदाका, निमे ई आदेसतुन बदे तप्पु डागु आनि दोसेम अंटाकोंटा कापाळसेके इर्रा. 15 आनि राजुल्कुना राजु, सामिल्कुना सामि, अन्निन पोर्रो अदिकारम इर्रना आ पेद्दा कदरगल्लोडे, बरोबर वेलाकु ओन मनाकु हुप्संतोर. 16 ओन्कु बस्केन हामुर हिल्ले. मनम बोरे होना परोम असोंटा वेल्गुने ओर मनंतोर. ओन इदवेरादाका बोरे हूळा हिल्लुर आनि बस्केने हूळा परुर इंका. अंटवुंकन्ना बलमाता आ पेनदुके पीळि-पीळिनदाका कदर दोर्कि. आमीन.
17 ई दुनियाते मनना सिरमंत लोकुल्क, गर्रा किया मन्नि. आनि नासडेम आसि होनना दनम पोर्रो आसे इर्राकोंटा, जीवाते मनना पेनदापोर्रो विस्वासम इर्राना. आ पेने मना आनंदमहाटीं गावाले मत्तव आ अन्नि बेसतावुन इरगा हींता, इंचि ओर्क आदेस हीम. 18 इचोने आयका इंका ओर्क आदेस हीम गदा, ओर बेस कबाह्क कीसेक मनना, बेस कबाह्क कीसे सिरमंत आयाना. मनागा मत्तादुनाल अव्सरम मत्तोंक, पंचि हियालय बस्केळ्क मनसुनाल तयार मनगोम. 19 इल्हा कीसेके मत्ते, मुन्नेटा पिसवरहाटीं ओर उंदि बेस पुनादि तयार कीकुंतुर, आनि बस्केळ्क पिस्सना पिसवर पिस्सेक मनंतुर.