बोनतोनि बल्हा वळकना बारेमते कोन्नि पोल्लें
5
1 पेद्दा वयम मनकन तेराहताप वळ्कुमा, गानि ओन नीवा बाबाल इन्कुंचि ओन्कु तेल्पिचि वेहा. सिन्नोर्कुन तम्मुर इन्कुंचि ओरतोनि व्यवहार कीम. 2 अल्हेन पेद्दा वयम मुर्ताह्कुन यावह्क इन्कुंचि आनि सिन्ना वयम मुर्ताह्कुन सेल्लेह्क इन्कुंचि पुरागा पवित्र मंचेके अवुंकु तेल्पिचि वेहा. 3 बव मुर्ताह्क अय्ते निजम मुंडामोसि मंतां, अवुना निमे कदर कीम. 4 ओक्कला बद्दना मुंडामोस्ता मुर्तळकु मर्क-मियाह्क आयि, तंगमर्क-मियाह्कगिंटा मत्ते, मोदाला ओर बेस बक्तिते ताकसेके सतता परिवारतुन पोस कियमळ करियगोम. आनि सतता तल्लुर-बाबो ओराहाटीं कीता मंचितनमता रुनम तिरिचनाहाटीं, ओर्क मंचितनमतुन मल्हाचि हियगोम. बारित्ते इल्हा कियमळ पेनदुक नच्चनालायक मंता. 5 बद मुरतळ अय्ते निजमते मुंडामोसि, बोरे दिक्कु हिल्लका उंदे मनंता, अद मुरतळ दाना आसे पेनदापोर्रो इर्सि, नर्का-पल्हीं पेनदुक विनंतिं, पारतनां कीसेके मनंता. 6 गानि बद मुरतळ अय्ते सिराप सुकमता आसेते पिसंता, अद मुरतळ पिस्सि मंचिगुडा हाता लेक्कातेन वांता. 7 इंचि बोरे तप्पुने दोर्काकोंटा मननाहाटीं, इव पोल्लेना बारेमतेगुडा अंटोर विस्वासुल्कुंक आदेस हीम. 8 ओक्कला बोरन्ना ओना हेडमीतोर्कुन बेस हूळकुनाकोंटे, विसेस कीसि सतता लोतोर्कुन बेस हूळकुनाकोंटे, ओर विस्वासमता कदर कियवोर आंतोर. अचोने आयका विस्वासम कियवोंकन्ना एक्को कराब मनकना लेक्काते वांतोर.9 मुंडामोस्ता मुरतटा वय्सु अरवै वर्सांकन्ना तक्को मनानय्ते, आ मुरतटा पोर्रोल मुंडामोस्ता मुर्ताह्कुना रजिस्टरते रासानायो. अचोने आयका आ मुरतळ मुन्ने वरोने मुय्दोन मरमिं आसि मत्तद आयगोम. 10 इंका अद मुरतळ बेस कबाह्कुने बेस पोर्रोल तर्कुंचि मनगोम, मर्क-मियाह्कुन पोस कीतद आयगोम, वाता हेळमितोरा सेवा कीतद आयगोम, पवित्र लोकुल्कुना काल्क नोरतद आयगोम, तकलिपने मत्तोर्कुंक सहायम कीतद आयगोम आनि अन्नि परिस्तितिने बेस कबाह्क कियालय अप्पजेपतद आयगोम.
11 गानि लेय्यातनमते मुंडामोस्ता मुर्ताह्कुना पोर्रोल अद रजिस्टरते रासमा. बारित्ते बस्के अय्ते अवुना मेंदुलता इच्चां एक्को आसि, किरिस्तुना पोर्रोटा विस्वासम तक्को आंता, अस्के अवुंक मरमिं आयाना इच्चा आंता. 12 इल्हा अव अवुना मोदाटा निरनायमताल तप्पिच्कुंचि सिक्साता आदेस तरकुंतां. 13 अचोने आयका लोन-लोन तिरियना अलबट अर्सि लंडुंक हेडंतां. सिराप लंडुंक हेडमळे आयो, गानि हेके-हीकेटा जोलीं केंजंता, वेरेतोरा कबाह्कुने कय कुच्चंतां आनि बव पोल्लें अय्ते अव वळकना आयोनो, असोंटा पोल्लें वळकालय दल्गंतां. 14 अदुनहाटीं लेय्यातनमते मुंडामोस्ता मुर्ताह्क मरमिं आसि, पिलाल्कुन कंचेके संसारम कियना इंचि नावा इच्चा मंता. अल्हा कीते पगातोर्कुंक तप्पुक दोस्सना मोका दोर्को. 15 नना इल्हा वेहना कारनम बतल इत्ते, कोन्नि मुर्ताह्क हर्रि तप्सि देय्यम हरदे ताकसंतां.
16 बदन्ना विस्वासि मुरतटा लोन ओक्कला मुंडामोस्ता मुर्ताह्क मत्ते, अवुंक आ लोता विस्वासिमुरतळे कुद्दु सहायम कियगोम, अवुना मोता चर्चुनपोर्रो वाटानायो. अस्के निजमते मुंडामोसि मत्ता मुर्ताह्कुंक चर्च सहायम कियगोम.
17 चर्च ताकसानोरव्टेटाल बोरय्ते बेस चर्च ताकसंतोरो, ओन्कु वेल्ले कदर हियगोम. विसेस कीसि बोरय्ते प्रचार कियालय आनि कराहलय कस्टपळंतोरो ओन्कु रोंड अंताल्क कदर दोर्कुगोम. 18 बारित्ते, “बंति तिराहनेंके कोंदाता मुस्किरकु मूस्का बुट्टि दोहामन्नि,”a आनि “बूतिगानकु बूति दोर्कना,”b इंचि दर्मसास्त्रम वेहंता.
19 चर्च ताकसाना पेद्दा मनकना पोर्रो बोरन्ना दोसेम दोसते, इव्वुर-मुव्वुरन्ना गवाइदार्क हिल्वद निमे अद दोसेमतुन नम्मुमा. 20 बस्केळ्क पापम कीसेक मनानोन अंटोरा मुन्ने तेरहा. अस्के कळमातोर अल्हा कियाकोंटा वेर्रेते मनांतुर. 21 पेनू, किरिस्तु येसु आनि पेन पेरता पेनदा दूतन मुन्ने इर्सि नना नीकु गट्टिगा आदेस हीसेक गदा, बदे उंदि बाजुन पियाकोंटा, सिन्ना-पेद्दा इनाकोंटा निमे इव नियमकुन पीसि ताका.
22 चर्चता पेद्दा मनकल इंचि निल्हानाहाटीं, बोन पोर्रेन गाबर आसि कय इरमा. आनि वेरेतोरा पापाल्कुने निमे पालिगाड आयमा. इंका निवद निमे बस्केळ्क पवित्र ईर्कुन.
23 सिराप एरे उंचेके मन्मा, नीवा पीर साप मननाहाटीं आनि इंका वेरे बिमार्क ऊके-ऊके वायाकोंटा मननाहाटीं, अस्के-अस्के अंगुर पानकम उंचेके होन.