4
1 Choo kituupchō, āchāmook aku āmoon ēēmō akwaan, āmu apaypay akipō akwaan ākāānyōōruuy :aneen mālāk āmu pāyit nyoo kyaa-ir :aneen. Choorwayiichuuch, ānāmchii keey nyuun Kiptaayaan.Ātēpii mu kaalya
2 Āsoomēy chēēpyōōsōōchu ārēēny Eewootya nkōō Suntikēē kilē āchoomnyēē āmu āpō tōkōl Kiptaayaan. 3 Aku inyēēn, chiinyuun Siisiko,a toorētō kuchoomnyō :chēēpyōōsōōchu āmu kiikuukiil keey ākōō akwaaneek keemwaarta lōkōōy choo kāroomēēn kipootō Kilēmēēnti ākōō piichuuch choo kiikupāyiisyēy tōkōl choo mii :kaariikwaak kiitapuu sopoon.
4 Āpāypāyiituu nkōō Kiptaayaan pērēētuus tōkōl. Ākoomwoorēy kuureer kilē āpāypāyiituu. 5 Akanya kuuro :piich tōkōl tāloosyēēng'woong'. Lēēkit kuchō :Kiptaayaan. 6 Āmoo-iimchi keey kir aka tōkōl, aku āsoomō Iriin kir aka tōkōl nyoo mooting'ēy, nēē āsoomēy, āmwoochinii inyeentee kōōnkēy nkōō tōkōl choo kiiku-ir. 7 Nēē a-ir kilēē nyoonēē kuriipkook :kaalyaa Iriin kāāpkootuutēkwook ākōō mukuuliiriikwook saatuupa Yēēsu *Kiriistō. Ōōw :kaalyaanoonēē nyoo mā-itinii :kāāpkootuutēpō piich.
8 Kunyuun oo, choo kituupchō, āpkootēyii tukuuchu: ng'alēēpō man, tukun choo /kuukoonyitēy, choo chuulootēēn, choo tiliilēēn, choo nāmēy koong', choo /kupāypāychinii, choo kāroomēēn, nkōō choo /kiiloosuuy. 9 Āpāyiisyēērēē tukun choo kyaaneeteenaan keey ntā choo kyoomwoorwook ntā choo kyaaroo ā-iraa. Nēē a-ir kilēē nyoonēē kuupēēruurook Iriin nyoo kōōnuuy kaalya.
Kiimwoochi :Paawulō kōōnkēy piipō Pilipi
10 Apaypay kitya ākooloosuuy Kiptaayaan, āmu kyookōōnoon tukun kuureer mpō ntā kiikiikusiirtō :pērēētuus chaa chaang'. Ānkēt kilē kiimooting'ēēkwaan pārooyin, mpō ntā kyoomārēy ātoorētoon. 11 Moomwooraa ng'aleechu āmārēy kir. Kyaaneetaa keey kuyaman choo āting'ēy nēē chaang' ntā ku ng'ērin. 12 Kyoo-ānkēt wōloo lēē nēē mooting'ēy kir ntā āting'ēy tukun tōkōl. Kyaaneet keey ātēpēē kilēē yoo āpiryoong'oot āmii wōltō aka tōkōl, nēē /kakupayan ntā ku nēē āmoon :piri, āting'ēy chaa chaang' ntā ku choo ng'ērin. 13 Āting'ēy kaamuuka amuuyta tukuuchoochēē tōkōl kipunuunō inyeentee nyoo kōōnoon kaamuuka. 14 Aku nyuun oo, kii karamiit mpō ātoorētoon nkōō nyāriluutēchuuch.
15 Ānkēt :akwaan piipō Pilipi kilē kii nēē a-amtaata lōkōōy choo kāroomēēn ākoowēērō Makeetoonnya, ku moomii :kaaniisa nyoo kiitoorētān. 16 Mpō paani kimooting'ēy kir āmii Teesaloonika, ku kyootoorētoon āsip ārēēny. 17 Mēēlē āmārēy kilē /kēēkōōnān kir, aku kiyoo āpāypāchinii ku mālāk nyoo ānyōōruukwaan akipō toorētēēng'woong'. 18 Aku paanyēēnyi, ku kyoonyōōrwaa kiyoo āmārēy aku siirēy mpō. Āting'ēy kir aka tōkōl, āmu kyoopkoon :Eepapurotiitō tukuuchoochēē kyookōōnoon. Lēē :tukuuchoochēē kōrōs choo ānyinyēēn choo /kākupēēlchi Iriin choo chāmēy :inyeentee akipāypāchinii. 19 Kōōnook :Iriin kiyoo mooting'ēy kupunuunō Yēēsu *Kiriistō, āmu pō mōkōrnoonti tōkōl inyeentee. 20 Kutōrōriit :Iriin nyoo Apoonyoon ākōy nkōō ākōy. Lēē nyoonēē.
Kooyoomiisō