Ā-irchii chiich aka tōkōl nyaa karaam
6
1 Tuupchēēnichuuch, nēē ir :chiich ng'ōōki, ā-isu muutyō :akwaan choo kyookiilyō nkōō Toomirmiir nyoo Tiliil ākooriipēy keey, āmu muukēē mpō /keetyamaak. 2 Ātoorētēy keey nēē nyikisiityook :ng'ala. Nēē a-ir kilēē nyoonēē, ātuupēy kiyoo mwoorēy :ng'ātuut chēpō *Kiriistō. 3 Nēē pkootēy :chiich kilē akaykay kusiir piikō walak, aku makaykay, ku kēēmēlmēēl keey :chiichoonēē. 4 Mārēy i-ir :chiich kir nyoo maraat i-ir, si nēē ng'at iting'ēy kir nyoo ilāsēy keey simēētēēniityō keey nkōō chiitō aka. 5 Āmwooraa kilēē nyoonēē āmu kālāpēy :chiich aka tōkōl nyariltanyiin. 6 Piich tōkōl choo mii /kēēnēētēy ng'ālyoontoo Iriin, ku maraat kichārchinii tukun choo ting'ēy koonēētiikwaak.7 Amaakany /kēēmēlmēēlook. Moomii :chiich nyoo muukēy kuumēlmēēl Iriin. Kāsēy :chiich kir nyoo kiitōōtēy. 8 Chiich nyoo irēy tukun kilēē wōli mārtooy mākuut chēpō pōōrtanyiin, ku kāsēy :chiichoonēē meerat akipō mākuut chēpō pōōrtanyiin. Ku :nyoo irēy tukun kilēē wōloo mārtooy Toomirmiir nyoo Tiliil, kukāsēy :chiichoonēē *sopoon nyēpō ākōy kupunuunō Toomirmiiryoonoonēē. 9 Kimākuchoosyō kēē-irēy tukun choo kāroomēēn, āmu paani ka-it :pērēētuuni kiikuchēp :Iriin, kēēkāsēy kir nyoo kiikutoot nēē mākuchoosyō. 10 Ku nēē tākēēting'ēy nyuun pārooyin, akany kēē-irchii piich tukun choo kāroomēēn, aku kusiir tōkōl, kēē-irchi piich choo kiikutiirō keey Iriin.
Ng'alēēpō lēt
11 Aroo kee wōloo āsirtooy aneentee parwaani nkōō siruut choo ēēchēēn āpāyiisyēērēē ēēruunēchuuch.
12 Piich choo mārēy kung'uutuunō wōli pō saang' kilē kāroomō, choo mii kukārook koong' kilē /kēēmurook. Kir kipaat nyoo irēy akwaaneek siku-ir kilēē nyoonēē, ku /simāku-us akipō kimurtooyoontoo *Kiriistō. 13 Āmwoorēy kilēē nyoonēē āmu māriipēy mpō :pichoochēē /kumurēy ng'ātuut tōkōl. Mārēy kipaat kilē /kēēmurook sikulas keey kilē /kaakēēmurook.
14 Lēyyē, mā ākōy alasaa keey kir aka, ālāsēēyaa keey kimurtooyoontoo Kiptaayaantēēnyoon Yēēsu *Kiriistō. Āmu kiima :Yēēsu nkōō kimurtooyoon, ku sopoon nyaanyaa ku maakukarkeey nkōō sopoon nyēpō piich choo tuupēy ātēpuut chēpō ng'wēnyuuni aku mā :aneen mpō kir nkōō wōloo mii :pichoochēē. 15 Mātoorētēy kir nēē /kumur chiich ntā nēē /mākumur. Kir nyoo maraat ku kunyōōru :chiich sopoon nyoo rēēl. 16 Lēyyē, kanya kuutō :Iriin kaalya piich tōkōl choo tuupēy ng'aleechu akuupēēruur. Piich chēpō Iriin chēpō man :pichoochēē.
17 Kung'eetee aniinee kitas taay, moomāraa takuu-iman :chiich, āmu āting'ēy pēēruutēy nkōō pōōrtanyuun choo kyoonyōōru āmu kyaamtaataa ng'ālyoontoo Yēēsu.
18 Tuupchēēnichuuch, kuupēēruurook :Kiptaayaantēēnyoon Yēēsu *Kiriistō. Lēē nyoonēē.