12
1 Āmārēy atas taay alas keey mpō ntā mākōōnuuy kir. Akanyaan, atas taay ang'alaala ng'oong'uut ākōō tukun choo kiikung'uutwoon :Kiptaayaan. 2-3 Ānkēt chiipō *Kiriistō nyoo /kiiku-āp kuwō im kēnyiis taman nkōō ang'wan choo kiikusiirto. Nēē kitākumii pōōrtanyiin ntā kiimoomii, ku moonkēt, aku nkēt :Iriin. 4 Ānkēt kilē kiiwō Paratisō akiteer ng'al chēpō kwōng'uut choo māting' /keemwa. 5 Āmuukēy alas keey akipō kiyoonēē ki-ira nkōō chiichoonēē aku moolāsēy keey nyuun akipō aneentee. Ālāsēy keey kipaat akipō tāwārēēryēēnyuun. 6 Mpō ntoolē alas keey ku mēēlē aneen sālwō āmu āmii āmwoorēy man. Aku ātāyēē keey nyoonēē simeepkaat :chiich kilē akaraam :aneen kusiir wōloo lēē kiyoo ā-irēy ākōō nyoo āmwoorēy.7 Pō kwōng'uut :ng'oong'uutēchoochēē. Kunyuun oo, simaalas keey ku /kiikutē kata pōōrtanyuun nyoo kiiyooku *Syeetaani keepareenaan. 8 Kyoosoom Kiptaayaan kunyil sōmōk kilē kung'ustawaan kiyi. 9 Kumwoorwoon kilē, “Yāmiin :chamateenyuun āmu ōōw :kaamuukeenyuun nkōō wōloo mii :tāwārēēryō.” Kunyuun, apaypay alas keey akipō tāwārēēryēēnyuun sikutēpō :kaamuukaa *Kiriistō kipootoon. 10 Kiyoonēē nyoo iroon apaypayiit nkōō tāwārēēryēēnyuun, nkōō muulēt, nkōō ng'al choo nyikiisēēn, nkōō usāt, nkōō nyaril aka tōkōl akipō *Kiriistō. Āmu, nēē atawarar, ku paanoonēē yoo akiiloot.
Kii-iim :Paawulō ātēpoo :piipō Kōōriintō
11 Aneen sālwō āmu ālāsēy keey, aku akwaan choo kyaa-iraan āloosu keey nyoo kātoolooswoon. Mpō ntā moomuukēy a-ir kir aneentee ku maaneen manang' kusiir akwaaneek choo toroorēy keey kilē *kāāyooytooyiik. 12 Kyaa-irwaak nkōō murtaar nyoo ōōw tukun choo ng'uutuuy kilē aneen *kāāyooytooyiin nyēpō man. Ki-iriisyō :tukun chēpō kwōng'uut choo muukiisōōt kipaat ki-iriisyō nkōō kaamuukaa Iriin. 13 Kir nyoo maa-irwaak nyoo kyoo-irchi kaaniiseen walak ku moo-āpkook nyikiisin. Asoomook nyuun kilē ānyōōwoon kaat nkōō lēēluutyoonoonēē.
14 Aku aniin paannyēēnyi, āchēpoot āruutoowook nyēpō sōmōk amēēlē ā-irēy kunyikisiityook āmu kiyoo āmārēy ku mā tukuukwook aku āmārook ākwoonēēk. Mēēsiintoochinii :laakōōk sikiikwaak kir, aku sikiik :choo siintoochinii laakōōk. 15 Kunyuun apaypay kitya ākōōnu keey ākoopāyiisyēērēē tukuuchuuch tōkōl choo āting'ēy akipō akwaan. Ara, nēē āchāmook :aneen kilē siiny oo, āchāmoon kiitēēn kipaat? 16 Ānkēt :akwaan kilē kiimaa-āpkook nyikiisin, aku muukēy nyuun /keemwa kilē kyaachireeriitwaa ākōōmēlmēēlook. 17 Ātēēpēy kilē oo, kiimēlmēēlook :pichu kyooyookwook? 18 Kyoosoom Tiitō kuchō wōloonēē, ākooyooku kuchō nkōō tuupchēē aka. Ara kiimēlmēēlook :Tiitō? Acha mālēē nyoonēē, āmu kupāyiisyēy nkōō Tiitō akukarkeey ātēpēēnyoon.
19 Āmuukēēkwaan āpkootēy kilē kumwoorēy ng'aleechoochēē tōkōl keereetee keey. Mālēē nyoonēē mpō kiitēēn. Lēyyē, kiikung'āloolwook ng'aleechu kilēē kipāyitiin chēpō *Kiriistō akēēnkēt kilē nkēt :Iriin. Choo kutuupchō, kir aka tōkōl nyoo ku-irēy, kēē-irēy kilē kēēkiilook. 20 Āting'ēy kāwāriisyō kilē nēē āchōōn ku āmuukēy ānyōōrwook ku moomii ātēpiisōōt kilēē wōloo āmārtooyaa, aku moopāypāchiniikwaan kiyoo āmwoorwook. Āwārēy ānyōōrwook āting'ēē keey kwiintaan ākōō ng'atkoong', ānārēēchinii keey, aku akwaan suuy, āmuulēy keey, ā-āmēē keey seemseem, ākoolāsēy keey aku kyoochuunchuunnyō. 21 Āting'ēy kāwāriisyō mpō kilē nēē koo areer awarakee ku āpkoon :Iriin āchō ng'wēny nkōō taayuung'woong', aku ā-iimēy keey akipō piich chaa chaang' choo kiisip ku-ir ng'ōōki akutoomō kuwāliisyō kumētō takal.