Ākoonyitō pāytooyiik
13
1 Maraat ākoonyit piich choo pāytooyook āmu pāyuunāt aka tōkōl nyoo mii ng'wēny ku kikōōnuuy :Iriin. 2 Ku chiich aka tōkōl nyoo kwiintoochinii kaamuuka nyēpō kāāntōōy choo mii ng'wēny kumii :chiichoonēē kukwiintoochinii kir nyoo kiikutil :Iriin akuurwoochinii :Iriin chiichoonēē. 3 Āmwooraa kilēē nyoonēē āmu :piich choo irēy tukun choo kāroomēēn kumēēwārēy kāāntōōyiikwaak. Piich choo irēy tukun chaa raacheen chu wārēy kāāntōōyiikwaak. Nēē mārēy simēēwārēy kāāntōōy i-ir ng'al chēpō man sikuuloosuun. 4 Pāyiisyēēchinii :pichoochēē Iriin siku-iruun nyaa karaam. Ku nēē ir ng'al chaa raacheen kuurookēē iwāriisyō, āmu ting'ēy :kāāntōōy kaamuuka kukōōnin siitēt. Irchinii :akwaaneek Iriin pāyit nyēpō man sikuutē chiich nyoo irēy ng'al chaa raacheen siitēt. 5 Maraat nyuun kēētuupēy kir nyoo mārwēēch :kāāntōōy. Mākutuupēy kipaat āmu muukēy kukōōnēēch :Iriin siitēt, acha, mālēē nyoonēē. Ituup āmu kuunkēt kilē karaam kee-ir kilēē nyoonēē.6 Kiyoonēē mpō nyoo irook ātētō *kōōti, āmu irchinii :kāāntōōyichoochēē Iriin pāyit kuukiilchinii keey pāyiisyōōnoonēē. 7 Karaam a-ir tukun choo mākootēēn a-ir. Maraat akwarta *kōōti akaawar choo nyooluuy keewar, ākookoonyit piich choo rookēē /kēēkoonyit.
Ng'ātuut nyēpō choomnyoot kuurumēy ng'ātuut tōkōl
8 Raaytee pēsēn aka tōkōl nyoo kirookiin king'ētu choomnyoot, āmu chiich aka tōkōl nyoo chāmēy piich, ku kaaku-ir kir nyoo mwoorēy :ng'ātuut. 9 Aroo kee ng'ātuut: ‘Mēēsiir karwa,’ ‘mēērumiisyō,’ ‘mēēchōōrsyō,’ ‘āmēērōōti ng'at koong' kiipō chiich’ nkōō ng'ātuut walak tōkōl choo miitō.† Rumēy :ng'ātuutyooni ākoong'o chwēēchu tōkōl. Ng'ātuutyoonoonēē ku nyi mwoorēy kilē, “Icham piich walak kilēē wōloo ichāmtooy keey.”† 10 Nēē ichāmēy chiich, ku mēē-irchinii tukun chaa raacheen. Choomnyoot nyuun kuusiltooy kiyoo mārēy :ng'ātuut.
Kēēmāng'iisyēē sopoon nyoo rēēl
11 Ānkēt akwaan wōloo lēē ng'wēnyu pērēētuusyēchu. Ku āng'ēētyēē nyuun ākookiilchi keey sopoon nyēpō piich chēpō *Kiriistō āmu kiikulōōwiit kung'eetee aran Yēēsu aku lēēkit kuchō :Yēēsu paannyēēnyi kuumuteech keepa kēēmāng'iisyēē nkōō inyeentee. 12 Mii kurookēy :tuurin akimii ku-ituuy :lēpooyin. Kēē-istoorēē keey nyuun tukun chēpō tuurin akeenam chēpō lēpooyin. 13 Kēēmāng'iisyēē sopoon nyoo tookuunoot kilēē :pērēēt. Atayee keey tuumwēy choo ā-āmēy ākōy kusiirtō nkōō mpō pōōkito, takal choo ā-irēy ākōō koor ntā ku murēn ākōō takal walak. Mookwiintoochi keey āmoorōōti keey ng'at koong'. 14 Kanya kupāywook :Kiptaayaan Yēēsu *Kiriistō amaaran a-ir mākuut chēpō ng'ōōki.