/Kiikiityaaytaareeneech ng'ātuut chēpō Muusa
7
1 Tuupchēēnichuuch, akwaan Yāwuutik choo ānkēt ng'ātuut chēpō *Muusa, moonkēt :akwaan kilē pāyuuy kipaat :ng'ātuut chiich nēē tākusopoot? 2 Ānkēt akwaan kilē mwoorēy :ng'ātuut kilē maraat :cheepyooso nyoo āpoot kutēpō nkōō saanteenyiin nēē tākusopoot. Ku nēē ma :saanteenyiin, ku maakurataat cheepyoosoonoonēē. 3 Ku nēē tākusopoot :saantee aku-āp keey :cheepyoosoonoonēē nkōō chiich aka, ku kaaku-ir ng'ōōki. Ku nēē ma :saanteenyiin, ku kaakuutyaaka :cheepyoosoonoonēē ku-āp keey nkōō chiich aka. Ku nēē āp :chiich, kumaa-ir ng'ōōki.4 Tuupchēēnichuuch, ng'ālyoon kunyi: /kiikuutyaaytaareenaak kaamuuka nyēpō ng'ātuut paani kiima :Yēēsu akipō akwaan. Ātyookiisyēēkwaan soopōyiitu chiitō aka. Chiichoonēē ku *Kiriistō nyoo /kiikuung'eeta meerat. Ku paannyēēnyi nyuun, āmuukēy a-ir kir nyoo chāmēy :Iriin. 5 Kii nēē tākupāytooyēēch :ātēpuutēchooch chēpō ng'ōōki, ku kiing'ēētng'ēētēēch :ng'ātuut kee-ira ng'al choo āpuuy meerat. 6 /Kiikeetyaaytaareeneech nyuun paannyēēnyi ng'ātuutēchoochēē kiirateech sikēē-irchii Iriin pāyit nkōō oor nyoo rēēl nyēpō Toomirmiir. Mā kilēē taay paani kiikutuupēy ng'ātuut choo sirootēēn.
Pooryoo :ng'ōōki ākōō :ng'ātuut
7 Ara nee nyuun, rāāchō :ng'ātuut? Acha sōō, mālēē nyoonēē mpō kiitēēn. Ntā kiimoonkēt :aneen ng'ātuut chēpō *Muusa oo, ntā kyoosōwuyaa kilē ng'ōōki ku nee? Āmwooraa kilēē nyoonēē āmu ntā kiimāmwoorēy :ng'ātuutēchoochēē kilē, “Mēērōōti ng'at koong' kiipō chiich” ntā kiimaasōwuuy kilē ng'at koong' ku kir nyaa ra. 8 Ng'ātuutēchwēēchu choo ki-ir kunyōōru :ng'ōōki pārooyin nyoo kiipaytaan aku-iran ānyōōru ng'at koong' aka tōkōl nyaa ra. Nēē moomii :ng'ātuut, ku māting'ēy :ng'ōōki kaamuuka.
9 Kitoomō āsōwaa ng'ātuut, ku kiimooting'ēy kaa-iimuut nkōō sopoontanyuun. Ku paani kyoowaasōwaa ng'ātuut, āsōwaa ng'ōōki ākoonyōōru nyaril nkōō sopoontanyuun. 10 Ku :ng'ātuut nyuun choo kiitā-āpkoon sopoon, ku-āpkoon meerat. 11 Kinyōōru :ng'ōōki pārooyin nkōō ng'ātuutēchoochēē kuupootān, akuparan. 12 Mpō ntā kiipāyiisyēērō :ng'ōōki ng'ātuut kuparan, kutākutiliilō :ng'ātuut, man aku kāroomō.
13 Nēē kāroomō :ng'ātuut oo, ku-āpkaa meerat kilē nee? Acha sōō, mā lēē nyoonēē! Kiimā :ng'ātuut chu kyoopkoon meerat. Kii ng'ōōki, āmu kiipāyiisyēērō :ng'ōōki ng'ātuut nyaa karaam ku-āpkaa meerat. Ng'uutuuy nyoonēē kilē raacha :ng'ōōki nyoo māting' /keemwa.
14 Kiipkaana :ng'ātuut chēpō *Muusa wōloo mii :Iriin aku nēē taarataat :aneena nkōō ātēpuutēchuuch chēpō kēny ku taarataat nkōō ng'ōōki. 15 Moonkēt :aneen nyuun kiyoo ā-iraa, āmu kir nyoo āmāraa kilē ntā a-ir, kumoo-iraa. Kiyi ā-iraa nyuun ku kiyi āsāsaa. 16 Ku nēē a-iraa kir nyoo āsāsaa, āchāmaa kilē pō man :ng'ātuut nēē mwoorēy kilē ra kiyoonēē. 17 Ku mā :aneen nyuun man nyi āmii ā-irēy kir nyaa ra. Ng'ōōki nyoo pāywoon :nyi mii ku-irēy tukun chaa raacheen. 18 Ānkēt :aneen kilē nēē taarataat nkōō ātēpuutēchuuch chēpō kēny, ku moomuukaa a-ir kir nyaa karaam, āmu mpō ntā apkaat :aneen kilē taa-ir kir nyaa karaam, ku moomuukaa a-ir. 19 Kir nyoo ā-iraa ku mā kir nyaa karaam nyoo āmāraa a-ir, mpō tukun chēpō ng'ōōki choo moomāraa a-ir, ātāsaa taay ā-irēy. 20 Nēē ā-iraa kir nyoo moomāraa a-ir, ku mā :aneen nyoo ā-iraa. Ng'ōōki nyoo pāywoon nyoo irēy ng'aleechoochēē.
21 Kunyuun, man ku :nyi: Nēē āmāraa a-ir kir nyaa karaam, kuchōōnchoon :ng'ōōki kilē weel. 22 Nkōō kāāpkootuutēchuuch, āpāypāchinii ng'ātuut chēpō Iriin, 23 aku nyuun, ātēēraa kaamuuka aka nkōō pōōrtanyuun nyoo mii pooryoot nkōō kāāpkootuutēchuuch. Rātaa :nyoonēē nkōō ng'ōōki choo mii kupāyiisyēērēē pōōrtanyuun. 24-25 Kunyuun āting'ēy ng'ātuut chēpō Iriin nkōō kāāpkootuutēchuuch akutakupāywoon :ng'ōōki. Kyoopētitō ānō kēny? Ng'oo nyoo muukēy kusāruunēēnoon sōpooni āpuuy meerat? Āmwoochinii nyuun kōōnkēy Iriin kipunuunō Kiptaayaantēēnyoon Yēēsu *Kiriistō nyoo muukēy kusāruunō piich nyarili.