/Kiikuumut Paawulō kuwō Rooma
27
1 Nēē mii paani /kaakeetil kilē keepa kōōroo Itali, /kēēmēti Chuulyaas nyoo kiiryoonchinii askari chēpō *Kayisaari Paawulō ākōō piich walak choo kii rātootēēn. 2 Keelaang' :achaan mēēlii nyēpō kōōroo Atiramiitam nyoo kiimii kuwēētii akuuryoong'ootēy nkōō wōloo kiiryoong'ootēērēē :mēēliinēk walak nkōō araa tapan nyēpō kōōroo Eesya. Kiikutāsootēy keey ākōō Aristaarkō, chiich nyēpō Makeetoonnya nyoo kiichōōnēē Teesaloonika.3 Pērēētuu nyi kiituupēy, kee-it Siitōn. Ku-irchi :Chuulyaas Paawulō nyaa karaam āmu kichāmchi kuwō wōloo kiimii :choorweeyichiich /sikēētō kiyoo kiimārēy. 4 Keelaang' :achaan mēēli nkōō yoonēē akeetas taay keepa. Āmu kii ōōw :yoomēt, kēē-ēēlchi keey kamas pō Kuprō. 5 Kii nēē kisiirtō kōōroo Kiliikya ākōō Pampulya, kee-it kōōr nyēpō Muura nyoo kiimii kōōroo Lukiiya.
6 Kinyōōrchi yoonēē :Chuulyaas nyoo kiiryoonchinii askari mēēlii aka nyēpō Aleekisaantrya nyoo kiimii kuwēētii Itali. Kuulaang'eech mēēliinoonēē. 7 Keepa muutyō nkōō pērēētuus chaa chaang' āmu kiimii :yoomēt nyoo nyikiis nyoo ki-ir paanta kukōrōmiit ākōy kee-it Niitō. Kii nēē nyikisiit :yoomēē nyoo matakeetas taay, keewarak keey akeepa kamas pō Kirēētē nyoo kiimā ōōw :yoomēt, ākēēsiirtō Salamoonē. 8 Keepa araa tapan nyēpō araaray āmu kii nyikiis :yoomēt ākōy kee-it ārii aka yoo /kiikikuurēē ‘Yoo /Kisāruunēē mēēliin’ nyoo kilēēkitēē kōōr nyēpō Laseeya. 9 Kiikiikusiirtō :pērēētuus chaa chaang' akiikartit kōōrēē nyoo kiimaakuurookēē /keepa paan nyoo lōōw. Kumwoochi nyuun :Paawulō pichoochēē kilē, 10 “Murēchu, kaaroo kilē mii kurāyiituuy :paani. Nee takeetas taay kuululuukēē :mēēlii akupētyō :tukuuk walak choo mii mēēlii ākēēpoot mpō sopēēnyoon.” 11 Nyoo kātātēērēy :Chuulyaas ng'alēēpō Paawulō, kuteer kiyoo kiimwoorēy :chiichi pō mēēlii ākōō chiitō nyoo ōōw nyoo kiiryoonchinii mēēlii. Kutay kiyoo kiimwoochi :Paawulō. 12 Kii mā karaam kēēryoonchēērēē yoonēē kiikimii pērēētuus chaa chaang'. Kucham nyuun :piich chaa chaang' keetyam keekees araa kamas pō Kirēētē ākōy Pōnikis sikeepa kēēmuung'ēē wōliinēē ākōy kusiirtō :āroo chēpō kērtiityō. Kii ārii aka nyoonēē nyaa karaam yoo kiiryoonchēērēē mēēliinēk.
Yoomēt nyoo ōōw mu araaray
13 Kii nēē toowu kuchō :yoomēt nyaa kuskus nyoo kichōōnēē kamas pō taay, kuupkaat :akwaaneek kilē kaakunyōōru kiyoo kiimārēy. Kuutyaak nyuun mēēlii akutas taay nkōō paantang'waang' kukēēsootēy tapan nyēpō Kirēētē. 14 Nyoo matyaan, kuchō :yoomēt nyoo nyikiis nyoo kichōōnēē kamas pō Kirēētē. 15 Kitiiwu :yoomoonoonēē mēēlii ākōy keechamta keey keetang' wōli kiiwēētii. 16 Kii nēē kisiirtō kamas pō taay nyēpō kōōr nyoo kiikwēēn :pēr nyoo /kiikikuurēē Kawuuta, keetyam nkōō wururin nyoo ōōw ākōy kēēchuutu mēēlii nyi mining' kuchō ārii. 17 Kurat :pichoochēē mēēlii nyi ōōw kuyaam kilē ‘rwany’ simeeryeew :yoomēt. Āmu kiiwar :pichoochēē kilē kiimuukēy ku-āp :yoomēt mēēlii ākōy ku-it asyaak choo kiimii pēr ng'wēny nkōō tapan nyēpō Liipya, kuuchuchuuk kir nyoo kiitookēy yoomēt kuchō ng'wēny. Kumēti yoomēt ku-āpootō mēēlii. 18 Kitas taay yoomoonoonēē kunyikisiit ākōy kutoowu :pichoochēē pērēētuu nyi kiituupēy kunam tukuuk walak choo kiimii mēēlii akuwiirta kilē sikukuskusiit :mēēlii. 19 Nēē mii pērēētuuni kituupēy nyoonēē, kuwiirta mpō tukun choo kipāyiisyēērēē nkōō mēēlii. 20 Kiituuluunkēn :kōōrēē nkōō pērēētuus chaa chaang' nyoo /kiimaakēērōōsēy asiis ntā ku kookeel. Kitas taay :yoomēē kunyikisiit ākōy kumēēro :mukuuliiriichooch kilē maakuumuukēē /tākēēsārwēēch.
21 Paani kiikiikutēpi :pichoochēē pērēētuus chaa chaang' kimaa-am kir, kuuryoong' :Paawulō nkōō taayuung'waang' akilē, “Murēchu, ntā kyaateeraan paani kyoomwoorwook kilē mākupēērēē Kirēētē ntā kāmā-āmēēch :kir ntā kēēpoot kir aka tōkōl. 22 Wōloo nyuun oo, āmwoorwook paannyēēnyi kilē ākiilyō, āmu moomii :chiich nkōō achaan nyoo mēērēy. Kir kupaat nyoo muukēy kuululuuka ku mēēliini. 23 Ānkēt :aneen kiyoo āmwoorwook āmu kāchōōnchoon *:malayiika ooro kwēēn nyoo chōōnēē wōloo mii :Iriin nyoo ātiirēē keey ākoopāyiisyēēchinii akuchō kumwoorwoon kilē, 24 ‘Paawulō, amēēwāriisyō. /Kiimutiin ākōy taayuu kōōkwoo *Kayisaari, aku āmu chamataa Iriin nyoo ting'ēēniin /kēēsāruuy pichu āpēētii tōkōl.’ 25 Kunyuun oo, murēchu, ākiilyēē āmu ātiirēē keey Iriin kilē irēē kilēē paani /kākumwoorwoon. 26 Wōloo nyuun kupa /kēēwiirchinēēch kōōrēē aka nyoo kiikwēēn :pēr.”
Kuuryēēwēy :yoomēt mēēlii
27 Nēē mii ooro kwēēn nkōō lang'atuu nyēpō taman nkōō ang'wan kumii :yoomēē ku-āpēēch tapan nkōō tapan kēētiltooy Araaray pō Atiriiya, kuupkaat :pichu kiimii mēēlii kilē kii lēēkitiit kōōrō nyoo yaamaat. 28 Kuwiirta :pichoochēē kir nyoo nyikiis nyoo /kiikirāti ang'wa kuchuut pēr āmu kiimārēy kusōwu lōōwin pō pērēēk. Kinyōōru kilē kii koor nyoo kii-itēy kēēlyēn pokol ākoong'o nkōō tiptēm kuwō ng'wēny. Nyoo matyaan, kuureer kuuchuunta ang'waanoonēē, kuuro kilē kii koor nyoo kii-itēy kēēlyēn tāmānwook sokool kuwō ng'wēny. 29 Kimuyō :akwaaneek kilē kiimuukēy ku-āp :yoomēt mēēlii kutur raatōōy nkōō tapan nyēpō araaray. Kunam kāriin ang'wan choo nyikiisēēn akuuchuunta kuchuut pēr kilē sikuuryoong' mēēlii, akusa kilē kuyyēēchi. 30 Kuutyam :kipāyitiin chēpō mēēlii kumētō mēēlii. Kuurēēytoorēē mēēlii nyoo mining' nyoo kiimii nyi ōōw kuwō pēr ku-irtooy keey kilē kiimii kuwiirtooy tukun choo nyikiisēēn choo kii-irēy mēēlii kuuryoong', ākōō kiimārēy kumwēr kupēēchi keey mu mēēlii. 31 Kumwoochi :Paawulō Chuulyaas ākōō askariik kilē, “Nēē mā tēpi :pichu mēēliini, ku moosopsōōt.” 32 Kutil :askariik ang'ōōk chu /kiikiikeerata mēēlii nyi mining' akumētō mēēliinoonēē ku-āp :pēr.
33 Kii nēē mārēy kuurir :kōōrēē, kusaarsaar :Paawulō akwaaneek tōkōl kilē, “Murēchu! Nkōō pērēētuus taman nkōō ang'wan choo kaakusiirtō, ku kāātēpi ākooruusōōt kuut ama kir aka tōkōl nyoo kaa-am. 34 Paannyēēnyi nyuun, ku āsoomook kilē ā-āmiisyēē. Maraat ā-āmiisyēē soosopyēē. Moomii :chiich mpō ākoong'o nkōō achaan nyoo mēērēy.” 35 Paani keewaang' :Paawulō kumwa ng'aleechu, kunam makatyaan akimwoochi Iriin kōōnkēy nkōō taayuu pichoochēē tōkōl. Kupuutil makatyaantee akitoowu ku-am. 36 Kiikiil keey :pichoochēē aku-āmiisyō tōkōl. 37 Kiiku-itēy tōkōl choo kiikimii mēēlii pokol ārēēny nkōō tāmānwook tisap nkōō lo. 38 Paani kiikiiku-āmiisyō :pichoochēē tōkōl kupiryoonchō, kuwiirchi nkaanuuk araaray sikukuskusiit mēēlii.
39 Kii nēē yyeech :kōōrēē, kimaakuumuuk :akwaaneek kusōwu kōōrēē nyoo kiiro, kuurō ārii aka yoo lēē tōōt akiiruruuchi :pēr asyaak. Kutil kilē kipa kukany kuuryoong'ō :mēēlii yoonēē nēē muukēē. 40 Kuutyaayta ang'ōōk choo /kirātēē kāriin choo kii-irēy mēēlii kuuryoong' akuutyaak tukun choo /kuwārākoowārākēē mēēlii. Kunam sira nyoo tookēy yoomēt akuutō im siku-āp :yoomēt mēēlii kuwō kuuryoong'o tapan nyēpō araaray. 41 Paani kayit :mēēlii yoo kiituuyēēchinii :araaraytiina ārēēny, kuluk :mēēlii asyaak choo kiimii pēr ng'wēny akunamta yoonēē. Kiinamta :mēēlii asyaak kamas pō taay. Kutumchi :yoomēt mēēlii pēr kamas pō lēt kuti kuuryeewa.
42 Kichēp :askariik kilē kuukeet piich tōkōl choo kii rātootēēn simāpir pēr akimwēr kupēēchi keey. 43 Kiimārēy :Chuulyaas kisāru Paawulō tāmakuukeet. Kutaya nyuun askariik kimeekeet pichoochēē kii rātootēēn kilēē wōloo kiikaakuchēptō. Kumwoochi piich choo kiimuukēy kupir pēr kilē kuuntoroor kupirootō pēr ākōy tapan wōloo yaamaat. 44 Kumwoochi choo kiing'ētu kuutyam kupeera keet choo kiiputuunō keey mēēlii. Ku-it :piikō tōkōl kōōr nyaa yaamaat amaa-am :kir chiich aka tōkōl.