Kiwēētiiy :Paawulō Chēērusālēēm
21
1 Kii nēē kaakēēpēēsyō ākōō pichoochēē, keepa keelaang' mēēli akeechuul ākōy Kōōsi. Paani kāwō kuyyeech kōōrēē, keenam paan ākōy Rootees, nēē mii pērēētuu nyēpō sōmōk, keepa ākōy Pataara. 2 Keepa kēēnyōōrchi mēēli Pataara nyoo kiimii kuwēētii Pōyinikē nyoo mii kōōroo Siirya. Keelaang' nyuun mēēliinoonēē akeepa. 3 Kii nēē kuuroo Kuprō, kēēsiirtō keepa araa kamas pō lēt keetang' kōōroo Siirya. Nēē mii lētuun kee-it kōōroo Tiirō āmu kiimii :tukun walak mēēlii choo kiimārēy /kēētōōrchi yoonēē. 4 Kii nēē kunyōōru piich chēpō *Kiriistō nkōō wōloonēē, kēētēpi ākōō akwaaneek pērēētuus tisap. Kimwoochi :pichoochēē Paawulō kupunuunō Toomirmiir nyoo Tiliil kilē māwō Chēērusālēēm. 5 Kii nēē rook :pērēētuusyēchoochēē, kuuyoomiistēēch :tuupiichoochēē tōkōl kupootō chēēpyōōsōōkwaak ākōō mpō laakōōkwaak. Keepa kēēkutung'ēē tapan nyēpō araaray akeesaa. 6 Kii nēē kaakēēmwoochi keey saaysērē, kēēpēēsyō akeepa keelaang' mēēliinyoon. Kuwārākiisyō :piichuuchō walak tōkōl kēēstoonikwaak.7 Kiikutas :achaan taay nkōō paantanyoon kung'eetee Tiirō ākōy kee-it Toleemay. Kiikiitaakwees tuupchēēnichooch choo kiimii Toleemay ākēēpērēnēē wōloonēē pērēētuu ākoong'o. 8 Paani kāwō kuyyeech kōōrēē, keenam paan ākōy kee-it Kayisareeya. Kii nēē ku-it Kayisareeya, keepa kaa āmtooyiintēē aka nyoo /kiikikuurēē Pilip nyoo kii ākoong'o nkōō choo lēē tisap choo /kiikulēwēnēy nkōō Chēērusālēēm. 9 Kiiting'ēy :chiichoonēē tiipiichiich ang'wan choo maaku-āp. Kiing'āloolēy :tiipiichoochēē ng'al choo kiing'uutinii :Toomirmiir nyoo Tiliil.
10 Paani kiikaakēēpērēnēē wōloonēē pērēētuus choo matyaan, ku-ituuna Chuuteeya :ng'ālooltooyiintēē aka nyoo /kiikikuurēē Akaapō. 11 Kuchō yoo kiikumiichaan akunam ang'waa Paawulō nyoo kiirātēē keey moo. Kunam :chiichoonēē ang'waanoonēē akurata ēēruunēchiich nkōō kēēlyēēchiich akimwa kilē, “Mwoorēy :Toomirmiir nyoo Tiliil kilē, ‘Rātēy :Yāwuutik chēpō Chēērusālēēm chiichi pō :ang'waani kilēē nyēēnyi, akuutētō kuwō ēēruun chēpō piich choo mālēē Yāwuutik.’ ”
12 Kii nēē kaakeeteer ng'aleechoochēē pō chiichoonēē, kēēriirchi nkōō piich walak choo kiimii yoonēē Paawulō kilē māwō Chēērusālēēm. 13 Kuwālwēēch :Paawulō kilē, “Āmu nee sooriirsōōt akaa-iraan aa-iim keey? Moochēpoot :aneen kupaat keeratan, āchēpoot :aneen mpō āmēērchi Chēērusālēēm akipō Kiptaayaan Yēēsu.” 14 Kii nēē maatakeemuuk keesaarsaar Paawulō, kēēmētō akeemwaa kilē, “Kanya ki-ira kilēē wōloo mārtooy :Iriin.”
15 Paani kaakung'at :ng'aleechu, keerat keey akeepa ākōy Chēērusālēēm. 16 Kiikupa nkōō :tuupiik walak choo kiimāng'ēy Kayisareeya. Kupa kuumuteech kaa Munasooni, wōloo kiikupa kēēruuyō lang'atuunoonēē. Kiichōōnēē :chiichi Kuprō aku inyeentee ku ākoong'o nkōō piich choo kiisip kuuran Yēēsu.
Kimii :Paawulō Chēērusālēēm
17 Kii nēē ku-it :achaan Chēērusālēēm, kutaakeech :tuupchēēnichooch nkōō pāypooyō nyoo ōōw. 18 Kii nēē yyeech kōōrēē, keepa nkōō Paawulō pakeeroo Chēēmis. Kiimii :kāāntōōy tōkōl wōloonēē. 19 Kuutaakwees :Paawulō pichoochēē akurārchi ng'ālyoon aka tōkōl nyoo kiiku-irchi :Iriin piich choo mālēē Yāwuutik ākōō pāyit nyoo kii-ir :inyeentee.
20 Paani kateer :pichoochēē ng'aleechoochēē, kuuloosu Iriin. Kumwoochi :pichoochēē Paawulō kilē, “Keeroo sōō wēēriinyoon kilē mii :Yāwuutik choo itēy ēlupuus choo makurar choo kiikuuran Yēēsu akutākutuupēy ng'ātuut chēpō *Muusa. 21 /Kiikēēmwoochi kilē kiinēēt :inyēēn Yāwuutik tōkōl choo māng'ēy nkōō piich choo mālēē Yāwuutik kumētō ng'ātuut chēpō *Muusa, amaamur laakōōkwaak amatuup ātēpuut chēpō Yāwuutik. 22 Ara /ku-ir nee nyuun? Man kilē tēērēy :pichoochēē kilē kaa-ichōōn. 23 Kir nyoo miitō, ku i-ir kiyoo kimwooruun. Miitō :piich yēēnyi choo lēē ang'wan choo kiikuuyoomiis Iriin. 24 Wiyō nkōō pichu ākōy *Kōpō Iriin akiwō itas taay nkōō akwaaneek ātiliil keey akiitētō kir aka tōkōl nyoo kumārēy nkōō tuumoonēē /sikēētilchi pichoochēē mētēwēyiikwaak. Nēē ir kilēē nyoonēē, kusōwu :chiich aka tōkōl kilē moomii :man ng'al tōkōl choo /kiikēēmwoochi akipō inyēēn. Sōwuuy kilē imii :inyēēn ituupēy ng'ātuut chēpō *Muusa. 25 Piich choo mālēē Yāwuutik akiikuuran Yēēsu, ku kaakēēsirchi ākēēmwoochi kukir keey āmiisyō nyoo mā *lipoop nyoo /kakisat /ākēētapaan kupoyiit kaanamōōn, kimaa-am kērēti, ntā ku pēēny nyēpō tyoony aka tōkōl nyoo /kakunam kaat /akeekeet, ama-ir takal.”
26 Kucham nyuun :Paawulō ku-ir kilēē paani kiikumwoochi. Kii nēē yyeech kōōrēē, kuwō :Paawulō nkōō pichoochēē akupa kuutiliil keey. Kii nēē kaakuutiliil keey, kupa tōkōl *Kōpō Iriin. Kumwoochi :Paawulō piich pērēētuu nyoo rookēy :tuumoonēē /ākēē-irchinii chiich aka tōkōl kōrōs.
/Kēēnāmēy :Paawulō
27 Kii nēē riik kurook :pērēētuusyēchoochēē lēē tisap, kuuro :Yāwuutik walak choo kiipō kōōroo Eesya :Paawulō kumii *Kōpō Iriin. Ku-ir :Yāwuutichoochēē piich kutoowu riiri akunam Paawulō. 28 Kupōlyo :Yāwuutichoochēē kilē, “Murēchu pō *Israayeel, āsārwēēch! Chiichi nyi nēētootēy piich tōkōl nkōō kamasta aka tōkōl kung'āloolēē nkōō oor nyaa ra piichooch, ng'ātuutēchooch ākōō mpō Kōyēēnyi pō Iriin. Aku mā nyoonēē ākityōōn nyi ka-ir :chiichi, keemutu mpō piich chēpō Kirik kupka yēēnyi kunaamta simnyoon Kōyi tiliil.” 29 (Kiimwoorēy kilēē nyoonēē, āmu kiikiikusip kuurō :akwaaneek Turōōpiimō, chiich nyoo kiipō kōōroo Ēpēēsō kumii ākōō Paawulō Chēērusālēēm. Kiipkootēy :akwaaneek kilē kiikiikuumut :Paawulō chiichoonēē kuwō *Kōpō Iriin).
30 Kitoowu keey :riiri mu Chēērusālēēm tōkōl akipō ng'aleechoochēē. Kumwēruunō :piich kamasta aka tōkōl akunam Paawulō akuuchuut kung'eetee Kōyoonēē pō Iriin /akeekar kurkootiik kilē weel. 31 Kimii :pichoochēē kuupkootēy kilē kuukeet Paawulō, ku-iti :ng'aleechoochēē chiich nyoo ōōw nyoo kiiryoonchinii askari chēpō Rooma kilē kiitoowu keey :riiri mu Chēērusālēēm. 32 Kunam :chiichoonēē askariik walak choo ēēchēēn nkōō choo mēnkēēchēēn akimwēr wōloo kiimii pooryoot. Paani keero :pichoochēē kii-irēy pooryoot chiichoonēē kiiryoonchinii askari chēpō Rooma nkōō askariichiich, kusiisyō nyoo maatakulap Paawulō. 33 Kinam :kāāntōōyiintoonoonēē kiipō askari Paawulō akimwaarta /keerata āng'ōōpō kāriin ārēēny. Aku nēē ng'at, kuteep piich kilē, “Ng'oo :chiichi, aku ka-ir nee?” 34 Kimwa :pichoochēē taang'taang'. Kiimwoorēy :piich walak chu, kumwoorēy :walak chuuchō. Kimaakumuuk :kāāntōōyiintoonoonēē kunyōōru ng'ālyoon nyēpō man. Āmu kiipōlyō :pichoochēē, kumwaarta :kāāntōōyiintoonoonēē /keemut Paawulō kuwō kaa askari nyoo kiiriipoot. 35 Paani ka-it yoo kiikuloontoorēē takeepa kaa askariik, kukōrōmiituuy :pichoochēē pō Chēērusālēēm. Kunam nyuun :askari Paawulō akukalap. 36 Kiituupootēy :piich Paawulō akupōlootēy kilē, “Akeeta chiichi.”
King'āloolchinii :Paawulō piich
37 Paani kikiikuriik /keechuut Paawulō kaa askari, kumwoochi chiichi kiiryoonchinii askariichoochēē kilē, “Nēē meekanyaan āmwooruun ng'ālyoon?” Kuteep :chiichoonēē kilē, “Ing'āloolēy kuutii Kirik? 38 Mēēnyēēn chiipō Miisiri nyoo kiing'eet pooryoot akiintōrōōrchi piich choo lēē ēlup ang'wan choo kiikēētēy piich kupa suur kwēēn nkōō pērēētuus choo ng'ērin choo kaakusiirtō?” 39 Kiwālchi :Paawulō kilē, “Aneen Yāwuutyoon nyēpō kōōroo Taarsō nyoo tookuunootēēn nkōō Kiliikya. Kaykay kanyaan āng'āloolchi pichu.” 40 Paani /kaakēēchāmchi kung'āloolchi pichoochēē, kuuryoong'ō yoo kiikuloontoorēē /sikeepa kaa askariichoochēē akimwoochiinō piich ēēruunyiin kusiisyō. Paani kāsiisyō :pichoochēē, kumwoochi :Paawulō nkōō kuutiing'waang' pō Ipuraanik kilē,