Kumii :Pēētērō ākōō Chowaana taayuu kōōkwoo Yāwuutik
4
1 Kutākumii :Pēētērō ākōō Chowaana kung'āloolchinii piich, kupkoonchi *:tisiik ākōō chiich nyoo kiipāytooy piich choo kiiriipēy *Kōpō Iriin ākōō *Satukaay walak. 2 Maacham :pichoochēē kiyoo kiimii :Pēētērō ākōō Chowaana kuunēētēy āmu kiinēētēy aku-āmchinii piich kilē muukēy king'eet :chiich nkōō meerat kupunuunō Yēēsu. 3 Kinam :pichoochēē Pēētērō ākōō Chowaana akupa kukārchi kō ākōy kuyyeech āmu kiikiikwiimēn kōōrēē. 4 Kiiran :piich chaa chaang' choo kiiteer ng'aleechoochēē kiimwooruuy :Pēētērō ākōō Chowaana. Kitāsu keey :piich choo kiiran ng'ālyoontoo Iriin kilēku ēlup muut.5 Paani kāwō kuyyeech kōōrēē, kutuuyēēchi Chēērusālēēm :pāytooy chēpō Yāwuutik, kāāntōōy ākōō koonēēt chēpō ng'ātuut. 6 Kutuuyō ākōō *Anaas, *Tisiintēē nyoo Ōōw, ākōō *Kayaapa, Chowaana, Aleekisaanta ākōō piich walak choo kii pō kōpō *Tisiintēē nyi Ōōw. 7 /Kiikuumut Pēētērō ākōō Chowaana kupa wōloo kiimii :pichoochēē. Kutoowu :pichoochēē kuteep mpō Pēētērō kilē, “Kaamuuka nyēpō ng'oo nyi kaa-iree ng'aleechu?” 8 Kimwoochi :Pēētērō pichoochēē nkōō kaamuuka nyēpō Toomirmiir nyoo tiliil kilē, “Pāytooyiichu pō piich ākōō kāāntōōy: 9 kaateepeeneech ng'al āmu kākii-irchi kir nyaa karaam chiichi mēēmuukēy kung'eet? Āmārēēkwaan āsōwuu wōloo /kākiisooptō? 10 Akanya āmwoorwook ākōō piich tōkōl chēpō *Israayeel kilē /kākiisoop chiichi nkōō kaamuuka nyēpō kaarinaa Yēēsu nyēpō Naasareet nyoo *Meesaaya. Kyaakarkaat :akwaan Yēēsu nkōō kimurtooyoon aku kiing'eeta nyuun :Iriin meerat. 11 Yēēsu nyi ng'āloolēē :siruut paani mwoorēy kilē,
‘Korta nyoo kyootāyēy :tēēkiik
nyi kiilēku tēlēkuutaa koot.’†
12 Māmii :chiich aka nkōō kōōrēē tōkōl nyoo kiikōōnu :Iriin nyoo muukēy kusārwēēch. Yēēsu ākityōōn nyoo muukēy kusārwēēch.”
13 Kikwong' :kōōkwoonoonēē pō Yāwuutik nkōō nyakanat nyoo kiiting'ēy :Pēētērō ākōō Chowaana mpō ntā kii piich choo kii mā sōōmānootēēn. Kusōwu :pichoochēē nkōō yoonēē kilē kiipēētootēy :mpō Pēētērō ākōō Yēēsu. 14 Kilēē paani kiiro :akwaaneek chiichoonēē /kiikiisoop kimii kuuryoong'ēy ākōō Pēētērō ākōō Chowaana, ku kiimoomii :kiyoo kiitākumwooru :pichoochēē. 15 Kimwoochi :pichoochēē Pēētērō ākōō Chowaana kilē kupeera kōyoonēē pō kiirwook. Paani kaakupeera :mpō Pēētērō koot, kung'āloolchi keey :pichoochēē. 16 Kuteep keey :pichoochēē kilē, “Ki-irta nee pichu? Kaakusōwu :chiich aka tōkōl nyoo māng'ēy Chēērusālēēm kilē kaakii-ir :pichu ng'ālyoon nyēpō kwōng'uut, ama kuumuukēy kēētiiyō. 17 Kunyuun oo, sumatakutēēru :ng'ālyoontooni nkōō kwēēnuu piich akuyāmu kōōrēē, ku nyooluuy /keekar koong' pichu kumēē-ōōchi keey ku-āmchi piich lōkōōy nkōō kaarinaa Yēēsu.”
18 /Kēēkuur :mpō Pēētērō kuureer kō /ākēēmwoochi matakung'alaala ntā kuunēētiisyō nkōō kaarinaa Yēēsu. 19 Kumwoochi :Pēētērō ākōō Chowaana pichoochēē kilē, “Atila kir nyēpō man nkōō taayuu Iriin; /kēēkoonyitook ntā /kēēkoonyit Iriin. 20 Āmu mākutāyēy keemwaa kiyoo kiikeerootee :koonyiichooch akeeteeree :iitiichooch.”
21 Kitas taay kipōlchi :pichoochēē mpō Pēētērō /akeetyaayta kupēēchi keey. Kii moomii kiyoo kiimuukēy ki-irta āmu kiimii :piich tōkōl kuuloosuuy Iriin nkōō kiyoo kii-ira. 22 Kiiting'ēy :chiichoonēē /kiikiisoop nkōō oor nyēpō kwōng'uut kēnyiis choo siirēy artam.
Kisooyēy :piich chēpō Kiriistō kunyōōru kiimnān
23 Paani /kapakeetyaayta Pēētērō ākōō Chowaana, kuureer wōloo kiimii :piikwaak akupa kimwoochi ng'aleechu kiimwoorēy *:tisiik choo ēēchēēn ākōō kāāntōōy.
24 Kii nēē teer :pichoochēē ng'aleechoochēē, kusa tōkōl nkōō kuut ākoong'o kilē, “Kiptaayaan, Iriin nyoo kii-ir im, ng'wēny ākōō araaray, ākōō tukun tōkōl choo mii wōloonēē. 25 Kiing'āloolchiinō :Toomirmiiryēēng'uung' nyoo tiliil paapeenyoon Tāwuti kipāyityoontēēng'uung' kilē,
‘Āmu nee sikuululuukiisyō :piich?
Āmu nee sikuupkootēy :piich ng'al choo mā-itinii?
26 Kiichēp keey :pāytooy chēpō ng'wēny
akuurum keey :kāāntōōy
sikupooryēērō Iriin
akutay nyoo kiikuutapaan :inyeentee.’†
27 Man, kiinam keey nkōō kōōrooni *:Ērōōtē ākōō Pōōntyō *Pilaato ākōō piich choo mālēē Yāwuutik ākōō Yāwuutik. Kusas kipāyityoontēēng'uung' nyoo tiliil, Yēēsu nyoo kiitapaan kilēku *Meesaaya. 28 Kunam keey kilēku kir ākoong'o aku-ir kiyoo kiisip itil nkōō kaamuukēēng'uung' ākōō makēēng'uung' kilē irēē. 29 Kunyuun oo, Kiptaayaan, iroo karweeng'waang' pō koong', ākiikōōnēēch kipāyitiinēkuuk kaamuuka kee-amtee ng'ālyoontēēng'uung' nkōō nyakanatee tōkōl. 30 Iyooku kaamuukeeng'uung' kuusoop piich akii-ir tukun chēpō kwōng'uut nkōō kaarinaa kipāyityoontēēng'uung' Yēēsu nyoo tiliil.”
31 Paani keewaang' :pichoochēē kusa, kuutimtiimō :kōyoonēē kēēmii :akwaaneek kutuusōōt. /Keenyiriit :akwaaneek tōkōl Toomirmiir nyoo Tiliil aku-amtaata ng'ālyoontoo Iriin nkōō nyakanat.
Kimāng'iisyēy :piich chēpō Kiriistō kilēē kir ākoong'o
32 Kinam keey :piich tōkōl choo kiikiikucham ng'ālyoontoo Iriin kilēku kir ākoong'o. Māmii :chiich nyoo kiimwoorēy kilē nyaanyiin kir aka tōkōl nyoo kiiting'ēy. Kiichārēy kir aka tōkōl nyoo kiiting'ēy. 33 Kimwaarta *:kāāyooytooyiik nkōō kaamuuka nyoo ōōw kilē kiing'eeta :Yēēsu meerat, akuupēēruur :Iriin akwaaneek tōkōl. 34 Kii moomii :chiich nkōō akwaaneek nyoo kiimāting'ēy kir. Choo kiiting'ēy pareen ākōō koorin, ku kyooltooy 35 aku-āp rōōpiyēēk kuutē *kāāyooytooyiik /tākēēchārchi chiich aka tōkōl nyoo kiiting'ēy nyaril.