Kikuurēy :Yēēsu Pēētērō nyēpō ārēēny
21
1 Nēē mii lētuun, kuureer :Yēēsu kung'uuti keey kiineetanik nkōō araaray pō Kalilaaya.a 2 Kiineetanichoochēē kiimii tōkōl ku: Siimnyōn Pēētērō, Toomaas nyoo /kiikikuurēē Sārāmwō, Naatanyēēl (murooni kiipō Kaana nkōō Kalilaaya), wēēchiipō Sēpētaayo nkōō kiineetanik walak ārēēny. 3 Kumwoochi :Pēētērō kiineetanik chuuchō walak kilē, “Murēchu, āmāraa āwō anamaata kaaraak.” Kilē :chuuchō walak, “Kupēētiichaan mpō nkōō inyēēn.” Kulaang' :pichoochēē mēēli akupa. Kumaakunam kir lang'atuunoonēē tōkōl.4 Kii nēē yyeech kōōrēē, kuuryoong'ō :Yēēsu tapan nyēpō araaray. Kiimēēnkēt :kiineetanik kilē kii inyeentee :nyoonēē. 5 Kukuur :Yēēsu pichoochēē akuteep kilē, “Murēchu, kaanam kēny kir mpō ākoong'o?” Kuwālchi kilē, “Acha! Moomii kir.” 6 Kumwoochi :Yēēsu kilē, “Āwiirchii kee neetit pēr akaakany kusyap kamaspō ēēruu taay nyēpō mēēlii saanama kaaraak.” Kuwiirchi :pichoochēē neetit araaray. Paani mārēy kuuchuut neetit kuwō mēēlii, kimaakuumuuk āmu kiikiikunam :neetoonēē kaaraak chaa chaang'. 7 Kumwoochi :kiineetanaani kiichāmēy :Yēēsu Pēētērō kilē, “Kiptaayaan :nyoonēē!” Paani kateer Pēētērō kilēē nyoonēē, kukārmān sireenyiin nyoo kiikiing'usta paani kiimii kunāmēy kaaraak, akusōkōrchi pēr. 8 Kii mālōōw :yi kiimii :pichoochēē kung'eetee tapan nyēpō araaray. Kii-itēy kēēlyēn pokol ākoong'o. Kung'ētuunō :kiineetanik chuuchō walak mēēlii akuuchuut neetit nyoo kiinyir kaaraak kuwō tapan nyēpō araaray. 9 Kii nēē it :pichoochēē tapan nyēpō araaray, kuuro kaaraak choo kiikuwaatan nkōō ma nyoo lēē ng'ōsāt akimii mpō makatiin. 10 Kumwoochi :Yēēsu pichoochēē kilē, “Ā-āpuu kee kaaraakik walak chu kātoonāmēēkwaan.” 11 Kuuchuut :Pēētērō neetit nyoo kiinyir kaaraak choo ēēchēēn kuwō tapan nyēpō araaray. Kii pokol ākoong'o nkōō konom nkōō sōmōk :kaaraakichoochēē. Kii chaang' :kaaraakichoochēē amoong'āti nyuun neetit mpō kiitēēn. 12 Kumwoochi :Yēēsu kiineetanichoochēē kilē, “Apkaana ā-āmiisyēē.” Moomii :chiich nyoo kiikany kuteep kilē, “Inyēēn ng'oo?” āmu kiinkēt kilē kii Kiptaayaan. 13 Paani kaakutēpi ng'wēny, kunam :Yēēsu makatiinak nkōō kaaraakik akichārchi kiineetanichoochēē.
14 Kii nyēpō sōmōk :nyēēnyi kung'uutinii keey :Yēēsu kiineetanichiich kung'eetee paani /kiikuung'eeta meerat.
15 Kii nēē kaaku-āmiisyō, kuumut :Yēēsu Pēētērō kamas akuteep kilē, “Siimnyōn wēēroo Chowaana, ichāmoon man kusiir chu?” Kuwālchi :Siimnyōn Yēēsu kilē, “Ēē Kiptaayaan, inkēt :inyēēn mpō kilē āchāmiin.” Kumwoochi :Yēēsu kilē, “Riipō nyuun waareechuuch.” 16 Kuureer kuteep :Yēēsu Pēētērō kilē, “Siimnyōn wēēroo Chowaana, ichāmoon man?” Kuwālchi :Pēētērō kilē, “Ēē Kiptaayaan, inkēt :inyēēn mpō kilē āchāmiin.” Kumwoochi :Yēēsu kilē, “Riipō nyuun kēēchiirēchuuch.” 17 Kuureer kiteep :Yēēsu Pēētērō kilē, “Siimnyōn wēēroo Chowaana, ichāmoon?” Kunareek :Pēētērō āmu kateep :Yēēsu āsip sōmōk kilē, “Ichāmoon?” Kiwālchi :Pēētērō Yēēsu kilē, “Kiptaayaan, inkēt :inyēēn kir aka tōkōl. Inkēt :inyēēn kilē āchāmiin.” Kuwālchi :Yēēsu kilē, “Riipō nyuun kēēchiirēchuuch. 18 Āmwooruun man kilē paani kiimining' :inyēēn, ku kii-irēy kir aka tōkōl nyoo kiichāmēy akiiwēētiiy wōloo kiimārēy. Ku paani keeroosiitu ikoorchinii :chiich aka ēēruunēkuuk sikuurēētootēēn wōloo mēēmārēy iwō.” 19 Kiimwa :Yēēsu kilēē nyoonēē sikung'uutu wōloo mēērtooy :Pēētērō /sikēēloosu Iriin. Kumwoochi :Yēēsu Pēētērō kilē, “Tuupaan.”
Yēēsu ākōō kiineetanaani kiichāmēy
20 Paani kawaraka :Pēētērō kuuro lēt, kuuro kiineetanaani kiichāmēy :Yēēsu mii kutuupēy akwaaneek lēt. Kii kiineetanaani kiing'uruukēē kuriik Yēēsu nkōō pērēētuuni /kiiku-āmiisyēy akiteep Yēēsu kilē, “Kiptaayaan, ng'oo nyi āltooyiin?” 21 Paani keero :Pēētērō kiineetanaanoonēē, kuteep Yēēsu kilē, “Kiptaayaan, ku nēē lēē murooni?” 22 Kuwālchi :Yēēsu kilē, “Ntā koomāraa kumāng'iisyō :muroonoonēē ākōy pērēētuuni āwārākēē oo, imārēē nee? Tuupaan.” 23 Kutoowu :piich chēpō *Kiriistō kung'alaala kilē māmēērēy kiineetanaanoonēē kiichāmēy :Yēēsu. Aku kiimaamwa nyuun :Yēēsu kilē māmēērēy :kiineetanaanoonēē. Kiikiimwa kipaat kilē, “Ntā koomāraa kumāng'iisyō :muroonoonēē ākōy pērēētuuni āwārākēē oo, imārēē nee?”
Ng'ālyoon nyoo /kiikutāsi