16
1 Koomwoorwook ng'aleechu tōkōl simooputyō. 2 /Ku-ōōnēēnook sinakōōkiin. Chōōnēy :pērēētuu nyoo pkootēy :piich choo pārook kilē mii ku-irchinii Iriin pāyit. 3 Irwook :pichoochēē ng'aleechoochēē āmu mēēnkēt Paapa amēēnkētān. 4 Koosip āmwoorwook ng'aleechu paanyēēnyi si nēē it :pērēētuuni iriisōōt ng'aleechoochēē, apkaat kilē kiikyoomwoorwook.”Pāyiisyoo Toomirmiir nyoo Tiliil
5 Kitas taay :Yēēsu kumwoochi kiineetanichiich kilē, “Kaawaraka paannyēēnyi Kaa Paapa, aku mataateepaan wōli āwēētiiy. 6 Ānkēt :aneen kilē kaakung'woonchook :ng'aleechu koomwoorwook. 7 Āmwoorwook man kilē kārāmiituuy nkōō wōloo āmiikwaan nēē āwō, āmu nēē moowō, kimāchōōnēy :Toomirmiiryoonoonēē chākuutoorētook. Ku nēē āwō, āwō āyookwook kuchō. 8 Paani kāchō :inyeentee kung'uutinii piich chēpō ng'wēny kilē māting'ēy man :akwaaneek nkōō wōloo pkootitooy akipō ng'ōōki, kir nyēpō man nkōō wōloo rwoochiintooy :Iriin ng'wēny. 9 /Kung'uutinii kilē ng'ōōki nēē meeranan :piich. 10 Kir nyēpō man ku āwō Kaa Paapa aku maarōōtoon. 11 /Kung'uutinii kilē /kiikēērwoochi Pāytooyiintoo ng'wēny.
12 Āting'ēy ng'al chaa chaang' choo kātoomwoorwook, kunyuun, nyikisiituuy nyoo moomuukēy amurta. 13 Aku paani kāchō :Toomirmiiryoonoonēē pō man kuuntōrōōrwook soonyōōru man tōkōl. Mwoorwook kir nyoo /kumwoochinii mā kiyoo chōōnēē kaapkootuutēchiich. Mwoorwook ng'al choo iriisōōt. 14 Tōrōōroon :Toomirmiiryoonoonēē āmu nyōōruuy ng'aleechuuch akumwoorwook. 15 Kir aka tōkōl nyēpō Paapa ku nyaanyuun. Nkanyi āmwoorwook kilē nyōōruuy :Toomirmiiryoonoonēē ng'aleechuuch akumwoorwook.
Wālēē :ng'woonin kilēku pāypooyō
16 Nyoo matyaan ku moorōōtoon aku nyoo matyaan areer ārōōtoon.” 17 Kuteep keey :kiineetanichoochēē walak kilē, “Mwoorēy nee :ng'aleechoochēē? Ntā mwoorēy nee paani kālē, ‘Āmii āwēētii Kaa Paapa.’ 18 Ng'uutuuy nee :ng'aleechu mwoorēy kilē ‘Nyoo matyaan’? Mākuunkēt kiyi mii kung'āloolēē!” 19 Kisōwu :Yēēsu kilē kiimārēy :kiineetanichoochēē sikuteepa inyeentee ng'aleechoochēē. Kuteepa nyuun kiineetanichoochēē kilē, “Āmii ātēēpēē keey kilē mwoorēy nee ng'aleechu koomwooraa? Kaamwaa kilē, ‘Nkōō pērēētuus choo ng'ērin choo pkoonēy, ku moorōōtoon, aku nyoo matyaan areer ārōōtoon.’ 20 Āmwoorwook man kilē āriirsōōt akaa-iim keey, aku nyuun, pāypāyiituuy :piich chēpō ng'wēny. Ng'woonchinook aku wālēē :ng'woonintāng'woong' kilēku pooypooyō. 21 Paani mārēy kunam :cheepyooso laakwa, kung'woonchinii āmu ka-itu saayitiinyiin aku paani kaakunam laakweenyiin, kuruutyēērō ng'woonintonoonēē akupaypayiit āmu kaakunam laakwee. 22 Karkeey nyuun nyoonēē nkōō akwaan. Ng'woonchinook paannyēēnyi, aku nyoo matyaan, keeroo keey kuureer, ākoopāypāyiitu nyuun nyoo moomii :chiich nyoo tāku-āpēēnook pāypooyoonoonēē. 23 Nkōō pērēētuunoonēē moomii :kir nyoo āsoomoon. Āmwoorwook man kilē, kōōnook :Apoo kir aka tōkōl nyoo koosoom nkōō kaarineenyuun. 24 Ākōy paannyēēnyi, moomii :kir nyoo kyoosoom nkōō kaarineenyuun. Āsoomō Paapa kir aka tōkōl nyoo āmārēy sākunyiraak pāypooyō.”
Kiikuupēl :Yēēsu ng'wēny
25 Kitas taay :Yēēsu kumwoochi kiineetanichiich kilē, “Kāāmwoorunēēnook ng'aleechu kārkēēyin. Aku nyuun, chōōnēy :pērēētuu nyoo āchōōnēy āmwoorwook :ng'alēēpō Paapa nkōō oor nyoo mawung'aat. 26 Nēē chō :pērēētuunoonēē, āsoom kir aka tōkōl nkōō kaarineenyuun. Moomwoorēy kilē toosoomwook Paapa kir, 27 āmu chāmook :Paapaan inyeentee, kilēē paani kyaachamaan akaaran kilē kyoochōōnēē wōloo mii :Iriin. 28 Kyoochōōnō wōloo mii :Paapaan ākoochōōn ng'wēny, ku paannyēēnyi āmii āwēērēē ng'wēny āwēētii Kaa Paapa.”
29 Kumwoochi :kiineetanik Yēēsu kilē, “Keeng'alaal nyuun paannyēēnyi ku karaam, nyoo maang'alaalee kārkēēyin. 30 Kuunkēt :achaan nyuun paannyēēnyi kilē inkēt inyēēn kir aka tōkōl mpō kutoomō /keeteepin. Ka-ireech :ng'aleechu keerana kilē kiichōōnēē wōloo mii :Apoo.” 31 Kiteep :Yēēsu kiineetanichoochēē kilē, “Kaaran paannyēēnyi? 32 Maakutyaan ku-itu pērēētuu nyoo /kuuryēētooyook. Wēētii :chiich aka tōkōl areenyiin ākoomētoon aneentee ākityōōn, aku nyuun mēēlē āmii :aneentee, āmu mii :Paapa nkōō aneen. 33 Koomwoorwook ng'aleechu soonyōōruu kaalya nēē aranaan. Ānyārilēy nkōō ng'wēny. Āmoowāriisyō nyuun āmu kyoopēl :aneen kaamuuka nyēpō ng'wēny.”