/Maakiikoonyit Yēēsu nkōō kōōrēēnyiin
6
1 Kuwēērō :Yēēsu yoonēē akuureer Naasareet kōōrēēnyiin, kupa ākōō kiineetanichiich. 2 Nēē mii pērēētuu *Sapaato, kuwō :Yēēsu *sinakōōki akuunēētiisyō. Kiikwōng'yō :piich tōkōl choo kiteer ng'aleechoochēē akilē, “Kiinyōōrchi ānō :chiichi ng'aleechu tōkōl? Ng'oroomnyō nee :nyi /kiikiitē chiichi? Kaamuuka nee :nyi ting'ēy :chiichi nyoo muukēy ku-ir ng'al chēpō kwōng'uut? 3 Ma kiitoong'iin :chiichi, wēēroo Maaryaa? Ma wēēriing'waang' Chēēmis, Chōōsēp, Chuutaas ākōō Siimnyōn? Mā tiipiikwaak :chu mii yi nkōō achaan?” Kitay nyuun :pichoochēē ng'alēēpō Yēēsu.4 Kumwoochi :Yēēsu kilē, “/Kiikoonyitēy *ōōrkooyoon nkōō wōltō aka tōkōl kung'ētu mu kōōrēēnyiin, ākōō wōloo mii tilyayiikwaak, ākōō katang'waang' wōloo /mākiikoonyitēē.” 5 Maa-ir :Yēēsu ng'al chaa chaang' chēpō kwōng'uut mu kōōroonoonēē. Kiitiing'ō :ēēruunēchiich piich choo ng'ērin kipaat choo kiimnyoonsōōt akuusoop akwaaneek. 6 Kikwōng' :Yēēsu āmu kiimaaran :pichoochēē inyeentee.
Kuwō :Yēēsu kōōrootin walak wō kuunēētiisyootō.
Kuuyooytooy :Yēēsu kiineetanichiich taman nkōō ārēēny
7 Nēē mii pērēētuu aka, kukuur :Yēēsu kiineetanichiich chu kiilēē taman nkōō ārēēny, akuuyooytō kupeera ārēēny ārēēny kupa ku-amtaata ng'ālyoontoo Iriin. Kitoomō kupa, kuutē akwaaneek kaamuuka nyoo muukēy ku-oon *toomirmiirēy chaa raacheen.
8 Kumwoochi akwaaneek kilē, “Ameenamaata :chiich kir aka tōkōl paani iwēētii kung'ētu kaarya. Āmēē-āp āmiisyō, saapaa kātōōn, ntā ku rōōpiyō. 9 Iraap kwēēr akumēē-āp sira aka.” 10 Kumwoochi akwaaneek kilē, “Nēē taakaak :chiich, apa katanyiin ātēpi ākōy apeeree yoonēē. 11 Nēē mataakaak :piich akutay kuteer kiyoo āmwoorēy, āpēēchinii keey, aparta tēērit nkōō kēēlyēēkwook. Ng'uutuuy :nyoonēē kilē tākuting'ēy pichoochēē ng'ōōkikwaak.”
12 Kupa :kiineetanichoochēē pāku-āmchinootō piich kuwāliisyēērō rāyiityēēng'waang' nyoo kiiku-ir. 13 Kii-oon *toomirmiirēy chaa raacheen chaa chaang', akuu-iilee mwaar piich chaa chaang' choo kiimnyoonsōōt akuusoop.
Kii-iim :piich mēt kilē ng'oo :Yēēsu
14 Kiing'alaala :piich chaa chaang' ng'aleechu kiimii ku-irēy :Yēēsu kuti ku-it :ng'aleechoochēē wōloo mii pāytooyiin *Ērōōtē. Kiimwoorēy :piich walak kilē, “Kiikung'eeta Chowaana Koopootiisāniin meerat nka nyi ting'ēy kaamuuka ku-ir ng'al chēpō kwōng'uut”
15 Kimwoorēy :walak kilē, “*Eliicha nyi kaakuwaraka.” Kimwoorēy :walak kilē, “*Ōōrkooyoontoo Iriin nyi nyoo karkeey nkōō ākoong'o nyēpō *ōōrkooy chēpō kēny.”
16 Paani kateer *:Ērōōtē kilēē nyoonēē, kimwa kilē, “Chowaana Koopootiisāniin :nyi kyaamwaarta /keetil mētinyiin nyi /kaakeeng'eeta meerat.”
Wōloo kiimeerta Chowaana
17 Kiikiikumwaarta *:Ērōōtē kilē /keenam Chowaana /akeerat nkōō korkoreet. Ki-ir *:Ērōōtē kilēē nyoonēē āmu Ērōōtya, cheepyooseetaa wēēriing'waang' nyoo /kiikikuurēē Pilip, nyoo kyoop *Ērōōtē. 18 Kiimwoochi :Chowaana *Ērōōtē kilē, machamaat ku-āp cheepyooseetaa wēēriing'waang'. 19 Kutoowu :Ērōōtya kusas Chowaana nkōō ng'aleechoochēē kiimwoorēy, akimar kuukeet. Wōloo nyuun kimēēmuukēy kuukeet, 20 āmu kiiwārēy *:Ērōōtē Chowaana. Kuriip nyuun *:Ērōōtē inyeentee āmu kiinkēt kilē chiich :Chowaana nyēpō man akutiliil. Kiichāmēy kutēērēy *:Ērōōtē kiyoo kiimwoorēy :Chowaana, akii-iimēy inyeentee mēt :ng'aleechoochēē.
21 Ku-it nyuun :pērēētuu nyoo kiinyōōru :Ērōōtya pārooyin. Kii-ir *:Ērōōtē tuum nyoo /kiikuupkootēy pērēētuuni /kiikutuumēy inyeentee. Kikuur *:Ērōōtē piichiich choo ēēchēēn. Kikuur mpō kāāntōōy chēpō lukoo pooryoot ākōō piich walak choo kii tookuunoot nkōō Kalilaaya. 22 Kuchō :chēpō Ērōōtya akunyaal nkōō taayuu *Ērōōtē nkōō tooyēēchiich. Kupaypayiit *:Ērōōtē akumwoochi chēēpoonēē kilē, “Ichāmēy ākōōnin nee? Ākōōniin kir aka tōkōl nyoo keemar.” 23 Kusirpēn *:Ērōōtē akumwoochi inyeentee kilē, “Kir aka tōkōl nyoo keeteep ākōōniin, mpō nēē imārēy kareeran nyēpō kōōrēēnyuun.”
24 Paani kateer :chēēpoonēē kilēē nyoonēē, kuwō wōloo mii :eeyeenyiin akuteepee kilē, “Amwaarta /kēēkōōnān nee?” Kuwālchi :kaamee kilē, “Mwaartee /kēēkōōnin mēt pō Chowaana Koopootiisāniin.”
25 Kuwaraka :chēēpoonēē wōloo mii *:Ērōōtē kilē weel akilēēchi, “Āmārēy ikōōnoon mēt pō Chowaana Koopootiisāniin mu kipis kilē weel.”
26 Paani kamwa :chēēpoonēē kilēē nyoonēē, kwootyō *:Ērōōtē nyēpō kwōng'uut. Aku āmu kiikiikusirpēn nkōō taayuu tooyeechiich, ku maamar kisiiru ng'ālyoontēēnyiin. 27 Kuuyooytō *:Ērōōtē riipiinteenyiin kuwō ku-āpu mēt pō Chowaana. Kuwō :riipiintoonoonēē korkoreet akutil kaat Chowaana, 28 aku-āpuunō mētit kipis akuutē chēēpoonēē. Kunam :chēēpoonēē mētit akuutō eeyeenyiin. 29 Paani kateer :kiineetanik chēpō Chowaana kilē kaakuma, kupa kimar pōōrpō Chowaana akutup.
Kipāyēy :Yēēsu piich ēlup muut
30 Paani kāwārākiisyō :kiineetanichoochēē, kumwoochi Yēēsu tōkōl choo kiipa ku-ir akuuneet. 31 Āmu kiimii :piich chaa chaang' choo kipkoonēy akupēētii ku maanyōōru :Yēēsu ākōō kiineetanichiich pārooyin ku-āmiisyō. Kilēēchi :Yēēsu kiineetanichiich, “Keepee wōloo mālēēkitēē :chiich sikēēmuung'ō nyoo mining'.”
32 Kulaang' mēēli akupa ākōy wōloo mālēēkitēē :chiich. 33 Paani keero :piich kuwēētii :Yēēsu ākōō kiineetanichiich, kusōwu wōloo kiipēētii. Kumētō kōōrootinēēkwaak akumwēr araa kēēlyēn kutuup tapan nyēpō araaray sikuutorook :akwaaneek taay. Ku-it :piich wōli kiiwēētii :Yēēsu ākōō kiineetanichiich kutoomō ku-it :akwaaneek. 34 Paani kārēkuunō :Yēēsu mēēli, akuuro pichoochēē tōkōl, kuriira akwaaneek āmu kii lēē kēēchiir choo māting'ēy māsōwoon. Kitoowu nyuun kuuneet :Yēēsu pichoochēē ng'al chaa chaang'.
35 Ku paanta kutuuriit :kōōrēē, kupēēchi Yēēsu :kiineetanichiich akilēēchi, “Kaakutuuriit :kōōrēē aku kōōrooni ku suur kwēēn. 36 Ng'untee pichu kupa kēēstoonichu lēēkitēē yēēnyi kupa ku-alaata kiyoo āmēy.” 37 Kuwālchi :Yēēsu kilē, “Ātēē kir nyoo āmēy.” Kilē :kiineetanichiich, “Kupa kee-al makatiin choo yāmēy ku-am :pichu tōkōl? Nku chaang' :rōōpiyēēchoochēē.” 38 Kuteepee :Yēēsu kilē, “Āting'ēy makatiin ata? Apee kee aroo.” Paani kaakuuro, kumwoochi kilē, “Kiting'ēy makatiin muut ākōō kaaraak ārēēny.” 39 Kumwoochi :Yēēsu kiineetanichiich kumwoochi piich kuururuuk keey akutēpi ng'wēny yoo mii suusō. 40 Kuupuur :piich kupeeraateera konom konom. 41 Kunam :Yēēsu makatiinachoochēē muut ākōō kaaraakik ārēēny, kuuro parak akumwoochi Iriin kōōnkēy, kupuutil makatiinak, akuutē kiineetanichiich kuchārchinootō piich. Kuchar mpō kaaraakichoochēē ārēēny akuutē piich. 42 Kyoomiisyō :piich tōkōl kuti piryoonchō. 43 /Keerum kiituukaan chēpō makatiin, kunyir kitaseen taman nkōō ārēēny ākōō chēpō kaaraak. 44 Piich :choo kyaam makatiinak ku murēn ēlup muut.
Kimānēē :Yēēsu pēr parak
45 Paanoonēē kumwoochi :Yēēsu kiineetanichiich kulaang' mēēli kusip kuuntoroor kutilta araaray kupa kamasta nyiinō aka pō Peetsaayta, kuta kuuyoomiisēy keey :inyeentee nkōō piich. 46 Paani kaakuuyoomiistō :Yēēsu pichoochēē, kuwēēchi keey tul kuwō kusa.
47 Kii nēē kaakutuuriit, ku kiikiiku-it :mēēlii araaray kwēēn, akutā kumii :Yēēsu tul. 48 Kuuro :Yēēsu kilē kānyikisiit yoomēē nkōō wōloo mii kiineetanichiich nēē mārēy kukwaang'kwaang' pērēēk āmu kiimii yoomēt nyoo nyikiis nyoo kiichōōnēē taayuung'waang'. Paani kāwō kuurir :kōōrēē, kuwēērēē :Yēēsu pēr parak ākōy wōloo kiimii :kiineetanichiich. Kii paanta kusiirtō akwaaneek, 49 kii nēē ro :kiineetanik kumānēē :Yēēsu pēr parak, kuunchōōyō kukuurēē iilat. 50 Kiiwāriisyō :kiineetanik tōkōl paani keero Yēēsu. Kumwoochi nyuun :Yēēsu akwaaneek kilē, “Āmoowāriisyō! Aneen :nyēēnyi.” 51 Paani kalaang' :Yēēsu mēēlii, kusiis :yoomēē. Kikwōng'yō :kiineetanik nyēpō kwōng'uut, 52 āmu kitoomō kusōwu kiyoo ng'utuuy paywaanoonēē kii pō piich ēlup muut. Kutōkōliituuy mētēwēyiikwaak.
Kuusoopēy :Yēēsu piich mu Keeneesareet
53 Paani kaakutilta :Yēēsu ākōō kiineetanichiich araarayta, kupa kuuryoong'ō yoo /kiikikuurēē Keeneesareet, akurāti mēēlii tapanpō araaray. 54 Kii nēē rēkuunēē mēēlii, kusōwu :piich Yēēsu kilē weel. 55 Kumwērootō :piich nkōō kōōroonoonēē tōkōl akukālāpuunō piich choo mnyoonsōōt kiptaraancheen kupa wōltō aka tōkōl wōloo kateer kilē mii :Yēēsu. 56 Ārii aka tōkōl yoo kiiwō, kilēē kōōrootin ākōō kēēstoon, ku kiimuti :piich piich choo kiimnyoonchootēēn kupka yoo kiikutuuyēēchinii. Kusoom :pichoochēē kiimnyoonchootēēn kutiing' tapanuu siraa :Yēēsu. Kisop :chiich aka tōkōl nyoo kiitiing' tapanuu siree.