Kuusoopēy :Yēēsu chiich nyoo kiiting'ēy toomirmiirēy chaa raacheen
5
1 Nēē mii yoonēē, ku-it :Yēēsu ākōō kiineetanichiich tapan nyēpō kamasta aka nyēpō araaray nkōō kōōroo Keeraasa.a 2 Paani kārēkuunō :Yēēsu mēēli, kutuuyō nkōō chiich aka nyoo kiiting'ēy *toomirmiir nyaa ra kuchōōnēē wōloo /kiikutupchinii piich. 3 Kiimāng'ēy wōloonēē pō kēpēnootiichoochēē. Kiimoomii :chiich nyoo kiimuukēy kurat chiichoonēē mpō nkōō ang'waa karin. 4 /Kiimaakēēmuukēy, āmu /kikiikeerata ang'wa nyēpō karin kinyil chaa chaang' ēēruun nkōō kēēlyēn aku kiimuuk kung'āti āng'ōōchoochēē. Kimoomii :chiich nyoo kiitākuumuukēy chiichoonēē. 5 Kiinchwootēy pērēēt ākōō lang'a mu wōlpō kēpēnoot ākōō tulōōntōōy akutilēē keey korin. 6 Kii nēē rōōti :chiichoonēē Yēēsu wōloo lōōw, kuuwiis akukutunchi. 7-8 Kumwoochi :Yēēsu kilē, “Toomirmiiryooni ra, wēērēē chiichōōnēē!” Kuunchō :chiichoonēē akimwa kilē, “Yēēsu! Wēēroo Iriin nyoo Tōrōōr, imārēēnoon nee? Āsoomiin nkōō kaarinaa Iriin kilē meenyariilaan.” 9 Nkōō yoonēē, kuteepee :Yēēsu kilē, “/Kukuurēēniin ng'oo?” Kuwālchi kilē, “/Kukuurēēnoon ‘Luk’ āmu kichaang'.” 10 Kusaarsaar :inyeentee Yēēsu kilē ma-oon akwaaneek kupeera kōōroonoonēē.
11 Kiimii :ākwoot nyēpō nkurwēētiin nyoo kyookēētēē lakam nyoo kiilēēkitēē yoonēē. 12 Kusoom :toomirmiirōōchoochēē raacheen Yēēsu kilē, “Kanyeech keepa keechuuta nkurwēētiinēchuuchō.” 13 Kuchāmchi :Yēēsu toomirmiirōōchoochēē raacheen kuchuut nkurwēētiin. Kumwēr ākwootiinoonēē pō nkurwēētiin kii-itēy ēlup ārēēny, kuutuultēērō keey lakam akuwiirchi keey araaray akurook.
14 Paani keero :māsowēēpō nkurwēētiinēchoochēē kiyoo ki-ira, kumwēr akupa kumwoochi piich tōkōl chēpō kōōroonoonēē kiyoo ki-ira. Kupa :piich kuuro kiyoo kii-ira. 15 Kii nēē it yoonēē kiimii :Yēēsu, kuuro chiichoonēē kiikiikuu-iim *:toomirmiirēy chaa raacheen kutēpēē ng'wēny kuulaakaat akiikukaramiit. Kuuwāriisyō :pichoochēē tōkōl. 16 Kirarta :piich choo kiiro ng'aleechoochēē kiyoo ki-ira nkōō wōloo mii :chiichoonēē kiiting'ēy *toomirmiirēy chaa raacheen nkōō nkurwēētiinēk. 17 Kusaarsaar :pichoochēē Yēēsu kuwēērō kōōrēēng'waang'.
18 Paani mii kupēētii kipa kuloong'ēy mēēlii, kusaarsaar :chiichi kii-iimēy *toomirmiirēy chaa raacheen Yēēsu kupa tōkōl. 19 Kitay :Yēēsu akilēēchi, “Wiyō kaaw akiiwō imwoochi piikuuk kiyoo kaa-iruun :Iriin nkōō wōloo kariireeniin.” 20 Kuwō :chiichoonēē ku-amta nkōō kōōroo Teekapooli ng'al choo kii-irchi :Yēēsu inyeentee. Kikwōng' :piich tōkōl choo kiiteer ng'aleechoochēē.
Sāpēy :chiich nyoo tiirēē keey Yēēsu
21 Kii nēē ng'eetee :Yēēsu ākōō kiineetanichiich yoonēē pō Keeraasa, kuwaraka kutilta araaray pō Kalilaaya kuwō kamasta nyiinō aka. Paani ka-it, kupka :piich chaa chaang' akuururuuchi keey yi mii :inyeentee. 22 Kutākumii tapan nyēpō araarayta, kuchō :kāāntōōyiintēē aka nyēpō *sinakōōki nyoo /kiikikuurēē Chāyrō. Kii nēē ro Yēēsu, kukutung' nkōō taayuunyiin, 23 akusoom kilē, “Mii chēētanyuun nyoo mārēy kumēērēy. Kaykay chōōnō tiing'ēē ēēruunēkuuk sikusop.” 24 Kucham :Yēēsu akuwō nkōō inyeentee.
Kituup :piich chaa chaang' choo kiikiichootēy keey. 25 Kiimii yoonēē :cheepyoosee aka nyoo kiikiikumnyaan kitya. Kiiting'ēy kēnyiis taman nkōō ārēēny kupēērēē :kērēti. 26 Kiikiikunyaril kuruutoochinii cheepsaakitiis chaa chaang' akiikiikuutētō tukuuk tōkōl choo kiiting'ēy amāsop. Nyoo kātāsopēy, kitas taay :pōōrtō kurayiit. 27 Kiikiikuteer akipō Yēēsu. Kuchōōnō nyuun lēt akutiing' sireenyiin. 28 Kiikiikumwoochi keey :cheepyoosoonoonēē kilē, “Nēē ātiing' aneen mpō sireenyiin kipaat, āsopēy.” 29 Kukāriisyō :kērētiik kilē weel. Kuteer nkōō pōōrtanyiin kilē kaakusopēē kōrōōyoonēē kiiting'ēy. 30 Kii nēē sōwu :Yēēsu kilē kāwēērō :kiimnān inyeentee, kuwarak keey kuuro lēt, akuteep kilē, “Ng'oo nyi kātiing' sireenyuun?” 31 Kuwālchi :kiineetanichiich kilē, “Mēērōōtēy kilē keekiich keey :piich nkōō yoo imii, akiitēēpēy kilē ng'oo :nyi kātiing'ān?” 32 Kuuro :Yēēsu kumārēy kusōwu kilē ng'oo :nyi kātiing' sireenyiin. 33 Paani kāsōwu :cheepyoosoonoonēē kiyoo ka-ira nkōō pōōrtanyiin, kuchō nkōō koowāriisyō kupōōtānēy akukutung' nkōō taayuu Yēēsu, akumwoochi kir aka tōkōl. 34 Kumwoochi :Yēēsu kilē, “Cheetānyuun, kēēsoopin :kaaraneeng'uung'. Ruutēē nkōō kaalya akiisop kukaraam.” 35 Kutākumii :Yēēsu kung'āloolēy, kupkaanee :piich kaa Chāyrō, akilēēchi Chāyrō, “Kaakima :chēētong'uung'. Tēē-iimchinii nee koonēētiin?” 36 Kii nēē teer :Yēēsu ng'aleechoochēē, kilēēchi kāāntōōyiintoo *sinakōōki, “Mēēwāriisyō! Rana kipaat.” 37 Moochāmchi :Yēēsu chiich aka tōkōl kuwō ākōō inyeentee king'ētu Chēēmis ākōō wēēriing'waang' Chowaana ākōō Pēētērō. 38 Paani ka-it kaa kāāntōōyiintoo *sinakōōki, kuuro :Yēēsu piich choo mii kuwiirtooy keey, kuriirsōōt akuunchōōsōōt. 39 Kuwō kō akilē, “Nēē nyi āwiirtoochinii keey ākooriirsōōt? Ānchōōchinii nee? Maama :laakwee, mii rwoon.” 40 Kii nēē mwa :Yēēsu kilēē nyoonēē, kuroorēchi :piich. Kumwoochi piich tōkōl kupa saang' akukuur Chāyrō ākōō cheepyooseenyiin ākōō kiineetanichiich chu kiimii nkōō inyeentee akupa tōkōl wōloo kimii :laakwee. 41 Kunam :Yēēsu ēēruutaa laakwee akilē, “Taliita ku-mi” nyoo nēē kuwal kilēēnii, “Chēēpi, āmwooruun kilē ng'eeta!” 42 Kung'eet :chēēpoonēē kilē weel akuwēētootō. Kiiting'ēy :laakwaanoonēē kēnyiis taman nkōō ārēēny. Kikwōng'yō :piich nkōō kiyoo kii-ira. 43 Kikir :Yēēsu pichoochēē kimamwaarta ng'aleechoochēē, akilēēchi kuutē laakwee kir nyoo āmēy.