Tuum nyoo ōōw
22
1 Kitas taay :Yēēsu kumwoochi piich nkōō kārkēēyin kilē, 2 “Karkeey Pāyuunātoo Kaa Iriin nkōō kārkēēyini. Kiimii :pāytooyiintēē aka nyoo kii-irchi wēēriinyiin tuum. 3 Kuuyooytō kipāyitiinēchiich kipa kumwoochinootō pichu /kiikukuur kupka tuum. Kitay :pichoochēē kupka. 4 Kuureer kuuyooytō :chiichoonēē kipāyitiinēk walak pākumwoochi pichoochēē kilē, ‘Chēpoot tuumtō. /Kiikēēchēp āmiisyō. /Kikeeyeeng' kiiruuk nkōō tich choo yākwooyēēn. Apkaana tuum āmu /kiikēēchēp :kir aka tōkōl.’ 5 Kitay :pichoochēē ng'aleechoochēē. Kusarat kupēēchi keey. Kuwō :aka pareenyiin, kuwō :aka mung'aareenyiin nyoo kiiting'ēy. 6 Kunam :walak kipāyitiinēchoochēē ku-irchi ng'al chaa raacheen akuukeet. 7 Kinyala :pāytooyiintoonoonēē. Kuuyooytō askariichiich kipa kupar :rumiichoochēē akupeel kōōrēēng'waang'. 8 Nēē ityō, kukuur kipāyitiinēchiich akilēēchi, ‘Kaakuyam /kēētoowu tuum aku maakuurookēē kupka :pichu /kiikukuur. 9 Apee oortin tōkōl ākookuur chiich aka tōkōl nyoo koonyōōru kuchō tuumi.’ 10 Kupa :kipāyitiinēchoochēē oortin tōkōl akuurum piich tōkōl choo kiimuuk kunyōōru, choo kāroomēēn ākōō chaa raacheen, ākōy kunyir :piich kōpō tuum. 11 Paani kāwo :pāytooyiintoonoonēē kōpō tuum, kuuro chiitō aka nyoo maalaak siraa tuum.a 12 Kuteepa :pāytooyiintoonoonēē chiichoonēē kilē, ‘Choorwaani, keechuutu kilē nee kōyēēnyi kumēēting'ēy siraa tuum?’ Kumoowālchi :chiichoonēē ng'ālyoon. 13 Kilēēchi :pāytooyiintoonoonēē kipāytiinēchiich, ‘Arata chiichi ēēruun nkōō kēēlyēn ākoowiirchi saang' wōloo lēē tuurin woloo kuriirsōōt akēēnyārēy keelat.’ ” 14 Kuuwaanta :Yēēsu kumwa kilē, “Chaang' :piich choo /kukuurēy wōloo nyuun ng'ērin :choo /kilēwēnēy.”Kuutyāmēy :kāāntōōy Yēēsu takunam
Maarkō 12:13-17; Luuka 20:20-26
15 Nēē mii lētuun, kuutuuyō keey *:Parisaay akicham kuutyam kuteepa Yēēsu tēēpuut kilē sikunam ng'ālyoon nyoo mwoorēy. 16 Kuuyooytō :Parisaayichoochēē tuupiikwaak nkōō chēpō *Ērōōtē kupa wōloo mii :Yēēsu. Kipa kilēēchi :pichoochēē Yēēsu, “Koonēētiin, kiinkēt kilē imwoorēy man akiinēētēy piich kusōwu kir nyoo mārēy :Iriin nkōō oor nyēpō man. Amēēwārēy piich kilē ng'oo :ng'oo. 17 Mwoorwēēch kee, wōloo ipkootitooy. Chamaat /kēēkwārchi *Kayisaari *kōōti ntā machamaat?” 18 Āmu kiinkēt :Yēēsu āmu nee sikuteep :pichoochēē ng'aleechoochēē, kumwoochi kilē “Ng'uurichu! Āmu nee saatyamaan? 19 Āng'uutwoon kee, rōōpiyoontoonoonēē /kukwārtoorēē *kōōti.” /Kēē-āpchi rōōpiyoon. 20 Kuteep :Yēēsu pichoochēē kilē, “Pō ng'oo :itōōni mii rōōpiyoontooni, ākōō kaarinee nyi kiikusirchi?” 21 Kuwālchi :piichoochēē kilē, “Pō *Kayisaari.” Kumwoochi nyuun :Yēēsu pichoochēē kilē, “Ātēē nyuun *Kayisaari chaachiich, ātō Iriin chaachiich.”b
22 Paani kateer :pichoochēē ng'aleechoochēē, kukwōng'yō akupēēchi keey.
Kitēēpēy :Satukaay akipō ng'eetataa meerat
Maarkō 12:18-27; Luuka 20:27-40
23 Nēē mii pērēētuunoonēē, kupkoonchi Yēēsu *:Satukaay walak. Kiirānēy :pichoochēē kilē /mākung'ēētēē piich meerat. Kuteep tēēpuut kilē, 24 “Koonēētiin, kiimwōōru *:Muusa kilē nee ma :chiich kutoomō kunam cheepyooseenyiin laakwa, kumilēy :wēēriing'waang', akunāmchi laakōōy choo /kukuurtēērēē wēēriing'waang' :nyi kiima. 25 Kiimii nyuun :chiitō aka kēny nyoo kiiting'ēy wēēchiichiich tisap. Kwoopiisyō :kipooreet. Nēē mii lētuun, kima kitoomō kunam :cheepyooseenyiin laakwa. Kumil :wēēriing'waang' nyēpō ārēēny cheepyoosoonoonēē. 26 Kuureer kima wēēroonēē, akima nyēpō sōmōk. Kutāsi nyēpō ang'wan ākōy kurook wēēchoochēē tōkōl lēē tisap. 27 Nēē mii lētuun, kima :cheepyoosoonoonēē. 28 Mwoorwēēch kee, poyiituuy ng'oo :cheepyoosoonoonēē paani kāng'ēētyēērō :pichoochēē tōkōl meerat, āmu pō man kilē, kiiku-āp :pichoochēē tōkōl cheepyoosoonoonēē?”
29 Kuwālchi :Yēēsu kilē, “Kaaleel :akwaan āmu moonkēt kiyoo mwoorēy :siruut chēpō Iriin. Aku moonkēt :akwaan wōloo lēē :kaamuukeenyiin. 30 Nēē ng'eeta :Iriin piich meerat, ku mēēlē tāku-āpēy keey piich kuureer. Māng'iisyēy kilēē *malaykeen choo mii kipsēnkwēt. 31 Akipō nyuun ng'eetat nyēpō piich choo kiikumēērō oo, toomō asooman :akwaan kiyoo kiimwoorwook :Iriin paani kiimwoorēy kilē, 32 ‘Aneen Iriintoo *Apraam, Isaka ākōō Chaakōp?’† Ma Iriintoo piich choo kiikumēērō, aku pō choo sopyoot.”
33 Paani kateer :pichoochēē ng'aleechoochēē, kukwōng'yō nkōō wōloo kiinēētitooy :Yēēsu.
Ng'ātuutyēē nyoo ōōw nkōō tōkōl
Maarkō 12:28-34
34 Paani kateer *:Parisaayik kilē kiikuumuuk :Yēēsu *Satukaay, kuutuuyō keey. 35 Kung'eet ākoong'o nyoo kii :koonēētiin nyēpō ng'ātuut kuutyam Yēēsu. 36 Kuteep kilē, “Koonēētiin, ng'ātuutyēē nyōōnō nyoo ōōw nkōō ng'ātuut tōkōl chēpō *Muusa?” 37 Kuwālchi :Yēēsu kilē, “Icham Iriin Kiptaayaantēēng'uung' nkōō moong'uung' tōkōl, sopoontāng'uung' tōkōl, ākōō kaapkootuutēkuuk tōkōl.†
38 Ng'ātuutyēē nyēēnyi nyēpō taay aku ōōw nkōō tōkōl. 39 Ng'ātuutyēē nyēpō ārēēny nyoolēē nyoonēē ku mwoorēy kilē, ‘Icham piich walak kilēē wōloo ichāmtooy keey.’† 40 Tuung'ēy :ng'ātuutēchu lēē ārēēny ng'ātuut tōkōl ākōō siruut chēpō *Muusa ākōō siruut chēpō *ōōrkooy.”
Meesaaya ku ng'oo?
Maarkō 12:35-37; Luuka 20:41-44
41 Paani kēētuuyō keey *:Parisaayiik tōkōl, kuteepa :Yēēsu kilē, 42 “Āpkootēy :akwaan nee akipō *Meesaaya? Chōōnēē kōpō ng'oo?” Kuwālchi :pichoochēē kilē, “Kōpō Tāwuti.” 43 Kilēēchi :Yēēsu, “Āmu nee nyuun sikumwoochi :Toomirmiir nyoo Tiliil Tāwuti kukuur inyeentee kilē ‘Kiptaayaan’? Kiimwa Tāwuti kilē,
44 ‘Kiimwoochi :Kiptaayaan Kiptaayaanteenyuun kilē:
Tēpēē ēēruunyuun kamas pō taay
ākōy āpēluun puunikuuk.’†