KAYTAKU KA
JUDAS
AŊIICUM
Hurimahu hata jajaalhenaju
1
Înje Judas atii Tiyaagu, jagam agorooraaw ata Jesus Kristu, înje iŋiiculom kayta'uke be bata miwuul ja Emitay yagam Ampawolaal eboolaatum ma êwooluul, jaamom ja Jesus Kristu apooyem. 2 Nîkine ma Emitay ebaŋen kañankiitaku kata yo, di kâsuumaayaku kata yo, di poop jâkinaju jata yo di miwuul.Bulhikitenaabu bagawutum balhegenumaayabu
3 Kutiyom ka iboolaatum, na igam ma mbi iŋiiculuul ma ilobuul mata kapakaku ka ubomaam, di êsigiray yûmbaam nijuk kaan haŋ majak ma iŋiiculuul ma îtikenuul ma jisoh jak kâynenaku ka Emitay ewuum bukanaku kata yo hanor be nanoonan. 4 Mata bukan kaaku kalatum Emitay, ka yoo eloom ban mata hûjimenahu hatayiil kata niŋanu, kunebeenebeem di tutaru tatawuul an banamulent. Bukana'uku ya kulaw elobay yata kañankiitaku kata Emitay yatoolaal, ma ya kuga wahaw wa kûkimmi, ma kulat anaw anoraw akiim wahaw peh agam Ata Emit, aamom Jesus Kristu.
5 Nîmire kaan miwuul jîmire jak mata wahaw uwe, be nîkine iwollhenuul maama Ata Emit amellhemmi êsukay yata Israyel ma âcaalhelliil di etaamay yata Ejiptu. Ban na âbuy bukanaku kâynentoom. 6 Jiwolho kumalaakaku kalatum kalako tiŋatu ta kuliikim, ma kulat hunnahaanowutaahu ha Emitay ewuliim, mowme yoyu ma êjenkunkom kuseelaku be nanoonan, ban di ega ko di emuucenay ma kukob hukahu hâmakaahu hata batalenabu. 7 Jiwolho poop bukanaku kata Sodooma, di Gomoora,a di sîsuk saasu sakotubom, kagam non ma kumalaaka'uku,b kugam, kâgawikoorum ma kûtiiw maama kumenem ma kuga maama gâworiitim. Momakiimom ma Emitay elesumiim sambunasu sâbaworiitum, ma deeli ga êmanjumay be bata bukan kaaku.
8 Mata bukana'uku poop ya kuga wahaw wa kujuum di sîyawutasu wagaweyiim kukajen siniilasu satayiil di kûbajumiñaku. Ban poop ya kurembeel Emitay ma ya kulat kajam di yo, ma ya kugel kumalaakaku. 9 Mata palimo Miigeel agam annahaanaw ata kumalaakaku, na kulaañenoorum di Esatanaay mata ehuluŋaayay yata Moyses, âlobikoorut yo, be nan yo: “Ata Emit mbi awaŋi.” 10 Be bukana'uke ya kûlobikoor mata wahaw wa kunamulentum. Ban palimo wahaw wa kunamulemmi wammi di ûyegetaw watayiil, be ya kuga wo non ma uncaamaw wânongooreriitum ugawem, ma wahaw uwu ya ukaajeniil. 11 Awo! Mata bukana'uke kokareesem di buruŋabu ba Kâyiŋc areesum. Mata hurim bâkinerabu ba kûkimmi bancaamabu, bo bagawiim kulo di buhiiraabu non Balawoŋ. Mo ma mbi kûjimenumi non ma bukanaku kâamim di bûñakoorabu ba Koree agam, kûjimenim.
12 Bukana'uku ya kuga non busik di tutaru tatawuul di sipeetasu sata jâkinooraju sa jigawem, ban na mbi kulako di kuri tanor di miwuul, kûpuñuworiit. Buko bûtekenaabu kâtekenem keb kumuumaku katayiil; buko koku ma kugam non uwiiñaw waakutum mumel wa ehentelaay eŋarem be ba etekem be; di kuga non buyaaj bâwolhoriitum di etaŋay yata bo; di kuga poop non buyaaj baroocim ma bulhaalh di buket. 13 Di kuga non waajeelaaw wagawem kasamaaku ma kugor di sembe ma kukoohet ma kûcaalhenul tîyaŋ masemaamu mata wo; di kuga poop non yoot yâpuulum ma ya eteyoor. Moo, bukana'uku Emitay ebandoore ban tiŋatu be batayiil tammi di emuucenay yâamak be nanoonan.
14 Mata Enooki poop agam anaw ata di sîbajoorumasu sagam hutok di sigaba sâwum Adoŋ baketee'ban, moo naloom âanul: “Jijaa, Ata Emit mbi âkayil di similiyoŋasu sata kumalaakaku kanapaaku katawool, 15 ma mbi aga batalenabu bukanaku peh, ban na ales bukanaku peh kalatum Emitay, ma ya kuga wahaw wajakutaaw, di poop wahaw wa kûlobikoorem be bata yo.”
16 Mata bukana'uku ya kûŋuŋunoor keb, di kukororoor bukan, ban ya sûumiil kaga non ma kûkimmi, ya sûumii'poop kalob silobasu sata hâamakowutaahu. Ban poop ya kulob sûum di bukan kaaku, ma mbi keeli keeneniil di wah.
17 Moo, kutiyaay ka iboolaatum, jiwolho elobay ya kumakaaku kata Ata Emit atoolaal, aamom Jesus Kristu kuloom niŋana, 18 ma kêenul: “Na mbi kukaku kûbanumaku kûriiŋ, mbi baj bukanaku ka mbi ya kurinen bukanaku mata Emitay, ma ya kuga non ma siniilasu satayiil sîkimmi.” 19 Moo, bukana'uku, kôkaŋarewuum bûwajuloorabu di tutaru tata bukanaku, mata ya sûumiil kaga keb wahaw wa siniilasu satayiil sîkimmi; ban keekut poop Buynumabu bata Emitay.
Kûcecenaku kûbanumaku
20 Moo, kutiyaay ka iboolaatum, jîtiken ûyegetaw watawuul di kâynenaku kanapum jak; ban ya jilhaw Emitay di sembaasu sata Buynum Bunapaabu. 21 Di jisoh poop nanoonan jâkinooraju jata Emitay, ma jemmi ma jikobem di Ata Emit atoolaal, aamom Jesus Kristu, ma mbi awuluul eroŋay yâbaworiitaay mata kañankiitaku katawool.
22 Di jiñankiit bukanaku karommi ma kûlandeelum di kâynenaku katayiil. 23 Di jibot bukanaku kammi di sambunasu ma jipakeniil; be di bûkolaabu dilo. Di jigiip poop wahaw peh wa kugawem, ii be di wañaw watayiil wa kusememmi di kûbajumiñaku.
Kalhawaku kata jasalaju jata Emitay
24 Moo, Emitay yakiim sembaasu, yaalim ehikuluul ma aatuba mbi jilo, mbi egawuul jijuum di majaaŋaamu mata yo, ma egawuul jîwaayen ma jijuum kayooŋ di yo babajut kûbajumiñ. 25 Ma yoo Emitay yagam yanoray, yapakenolaam hurim Jesus Kristu, agam Ata Emit atoolaal, yakiim majaaŋaamu, di êriibiinaay, di poop sembaasu, mbi esali jaat be nanoonan. Amiin.