KAYTAKU KÛHAAJUTAKU KA
JOŊ
AŊIICUM
Joŋ najaalhen Gaayu
1
Atiyom Gaayu ja iboolaatum di malhegen, înje jagam presbiteru ata grîsiya iŋiiculim kayta'uke.2 Atiyom a iboolaatum, malhegen nilhawe Emitay ma ewuli wahaw peh! Eniilay yatayi di ehep, non ma yâarooray yatayi poop emmi ma ebaam kâsuumaayaku. 3 Mata nîririgene noon non ma kutiyolaal kulallom, di kuñaaŋenom kaan aw anaw âynenaayaw, ban poop nuga anaw alhegenumaayaw. 4 Moo, wah ulet wahammi uwu, waalim ugawom îririgen non ma îririgemmi ume, mata ma ijammi kaan kuñoolom koku ma kusoom buruŋabu bata Emitay di malhegenumaayamu.
Joŋ nasal Gaayu
5 Atiyom a iboolaatum, malhegen jake noon non ma ugam anaw âynenaayaw ma ucookoorem bukanaku kagam kutiyolaal, palimo poop kaaku kagam emaasooraay. 6 Momakiimom, ma kûlobummi di grîsiya matayi ma ûkimmi ajamaat. Moo, onken jaa ma ya ooneniil di wahaw wa mbi kukayum non ma Emitay êkimmi, di jak noon. 7 Mata buko, mata Kañaaŋaku kata Emitay kûcaalhumulom; ban poop kuyabut nakeel miñ di bukan kâmirutum Emitay. 8 Moo, mbi ya uwalenaal sanŋolaal bukanaku kagam non buke, ma mbi ooliyaal ubomaal di buko di bugoroorabu balhegenumaayabu.
Joŋ nalob mata Diyootrephis koo di Demeetriw
9 Malhegen înje niŋiicuŋiicum kaytaku be bata grîsiya, be Diyootrephis, ammi ma apaamem di hunnahaanowutaahu, âkint âjamoli. 10 Be na mbi îriiŋuu'bo, mbi iñaaŋenuul peh maama âgawikoorum ma alob kôji matoolaal. Ban ntuwa ya âlobikoor keb matoolaal, be poop ya alat kawalen kutiyolaal yanŋool, ban bukan kaaku kûkin jaa kuwalheniil sanŋiil, nalat; poopii nâcaalheniil di grîsiya.
11 Moo, atiyom a iboolaatum, aatuba usoolhen bagawerabu bajakutaabu, be usoolhen baabu bajakum. Mata anaw agawem jak, oo anaw ata Emitay, be anaw agawem kôji, âmirut yo kuur.
12 Malhegen bukanaku peh ya kulob jak mata Demeetriw; poopii malhegenumaayamu di mulob matawool. Ûli poop, ya ulob jak matawool, ban aw nûmire kaan maama ulobem di mo, malhegen.
Hurimahu hûwuñenumahu
13 Nibaje wah wameeŋe wa îkimmi ilobi, be îkint ilobi wo di baŋiicer di kayit. 14 Be nîynene kaan, leetubi piyo, mbi ujukoora. Noo, mbi ujooŋoora ma uloba.
15 Moo, nîkine ma Emitay ewuli kâsuumaayaku. Kupaali, kusaapuli. Nusaapom poop kupaalolaal anor anor, ânoowan di kañaaŋaku katawool.