KAYTAKU KUGABUTAKU KA
JOŊ
AŊIICUM
Joŋ nasaapiil
1
Înje jagam presbiteru iŋiiculom kayta'uke be bata grîsiya ya Emitay ejotum, be di kuñool yo, kaamom ka înje iboolaatum noon. Ntuwa înje keb iboolaatuum, be be di bukanaku peh kâmiim malhegenumaayamu. 2 Mata malhegenumaaya'umu momu d'ulaal, ban mbi mulako d'ulaal be nanoonan.3 Moo, nîkine ma kañankiitaku, di kâsuumaayaku kata Emitay yagam Ampawolaal, di Jesus Kristu aamom Añool yo, kulako d'ulaal di malhegen, di kuwulolaa'poop jâkinooraju.
Jîkinoor non batiyaay
4 Înje nîririgene noon mata ma ijammi kaan kuñooli kaaku koku ma kureesem jak di malhegenumaayamu non ma kûboñaku kuloom ka Ampawolaal awulolaam. 5 Moo, nilhawi ma ûkinooraal. Ûde ntuwa kûboñaku kunkulaku nîŋiicewuum d'aw, be kûboñaku ka ookaam kata kaŋ niŋanu, kammi: mbi ya ûkinooraal. 6 Mata jâkinooraju joo jeemom: ugawaal non ma kûboñaku kuloom. Kûboña'uku, kûboñaku ka jijammi kata kaŋ niŋanu; moo, mbi ya jiga non ma kuloom.
7 Mata bukan kameeŋe kabuntenem êsukay, kalatum kaan Jesus Kristu nakaaylokaylom di humuumahu non ajamaat, koku ma kuwaasoorum di etaamay peh. Moo, anaw agam non buku, anaw abuntenem bukan, ban oo âsuumutaaw ata Kristu. 8 Moo, jijaamuwoor kûkuwaku katawuul, ka mbi wahaw wa ugoroorum ban, unep di miwuul, ma mbi jeeli jiyab bugalabu tuumabo.
9 Mata anaw abeem elobay ya Kristu alhikitemmi, ma ajuumut di yo, anaw umu aakut Emit. Be anaw asoom elobay ya Kristu alhikitemmi, anaw umu nabaje Ampawool, di Añoolool. 10 Moo, anaw âkayil jaa be baabu di miwuul, ban aŋallootuul eloba'uyu ya Kristu alhikitemmi, aatuba jiyaañuwool saŋuul, aatuba jisaapool poop. 11 Mata an akeel asaapoo'jaa, mbi âami di majakutaamu ma agawem di mo.
Hurimahu hûwuñenumahu
12 Moo, nibaje wah lhay wa îkimmi ilobuul, be îkint ilobuu'wo di baŋiicer di kayit, mata nîynene kaan mbi ibaj buruŋ ma îkayil bi ujooŋooraal ma ulobaal, ma mbi ulaal peh ooliyaal ûririgenaal noon.
13 Kuŋilaku kata atiyi ka Emitay ejotum, kusaapuluul.