22
1 དབའེ་སྤུན་ཆ་དང་འགོ་དཔོན་ཚུ་ དང་པ་ང་ལུ་ག་ཅི་བྱུང་ཡི་ག་ འདི་གི་གསལ་ཆ་སྙན་གསན་གནང་ཟེར་ཞུཝ་ཨིན། 2 དེ་ལས་ཁོ་གིས་ ཧིབ་རུ་གི་སྐད་ནང་ལུ་སླབ་ད་ མི་ཚུ་ག་ར་ཧེ་མ་བ་ལྷགཔ་སྦེ་ ཁུ་སིམ་སི་སྦེ་ཉན་སྡོད་ནུག་ དེ་ལས་ཁོ་གིས།
3 ང་ ཡ་ཧུ་ད་པ་ཨིན་ ང་ལུང་ཕྱོགས་ ཀི་ལི་ཀི་ཡ་གི་ཁྲོམ་ ཏཱར་སུས་ནང་སྐྱེས་ཏེ་འབད་རུང་ ཆུང་ཀུ་བསྒང་ལས་རྒྱལ་ས་འདི་ནང་ ག་མ་ལི་ཨཱེལ་ཟེར་མི་གི་ཞབས་སར་ལུ་ ང་བཅས་རང་གི་ཕ་བརྒྱུད་ཀྱི་བཀའ་ཁྲིམས་ཚུ་ལུ་གཙོ་བོ་བསྟེན་ལྷབ་སྟེ་སྡོད་ཅི་ ད་ལྟོ་ཁྱེད་ཆ་ཁྱབ་ཀྱི་ཤུགས་བཙོང་སྟེ་ དཀོན་མཆོག་གི་ཁ་ཐུག་འབད་དོཝ་བཟུམ་སྦེ་ ང་ཡང་ཁོ་གི་ཕྱོགས་བཟུང་སྟེ་ གནམ་མེད་ས་མེད་འབད་ཡི། 4 ང་གིས་གཙོ་བོ་གི་ལམ་ནང་འགྱོ་མིའི་ཨམ་སྲུ་དང་ཕོ་རྒྱ་ཚུ་ལུ་གནོད་པ་བཀལ་ཏེ་ ལ་ལུ་བསད་ ལ་ལུ་འཛིན་བཟུང་འབད་དེ་བཙོན་ཁང་ནང་བཙུགས་ཅི། 5 དེ་གི་འཛོམ་དཔང་ བླ་ཆེན་དང་ལྷན་ཚོགས་འགོ་དཔོན་ཚུ་ག་ར་ཡོད་ ད་རུང་ང་གིས་ཁོང་ལས་བཀའ་ཤོག་གཅིག་ཞུ་སྟེ་ ཁྲོམ་ ད་མཱས་ཀཱོས་ལུ་སྡོད་མི་ ཡེ་ཤུ་ལུ་དད་པ་བསྐྱེད་མི་སྤུན་ཆ་ ཡ་ཧུ་ད་པ་ཚུ་འཛིན་བཟུང་འབད་དེ་ ཡེ་རུ་ཤ་ལེམ་ལུ་འཁྱིད་འོངས་ཏེ་ ཁྲིམས་གཏང་ནི་སྦེ་ ང་ཁྲོམ་ ད་མཱས་ཀཱོས་ལུ་སོང་ཡི་ཟེར་སླབ་ནུག།
པའུལ་ཕྱིའི་མི་རིགས་ཚུ་ལུ་ཆོས་བཤད་མི་སྦེ་འབོ་པའི་སྐོར།
6 དེ་ལས་འཕྲོ་མཐུད་དེ་ པའུལ་གྱིས་ ང་ཁྲོམ་ ད་མཱས་ཀཱོས་ཀྱི་སྦོ་ལོགས་ལྷོད་ནི་འབདཝ་ད་ ཉིནམ་ཕྱེད་དེ་ཅིག་ལུ་ དེ་འཕྲོ་ལས་ནམ་མཁའ་ལས་ གློག་ཀེམ་དོཝ་བཟུམ་ འོད་ཅེམ་ཅེ་སྦེ་ངེ་གི་གུ་ལུ་ཕོག་སྟེ། 7 ང་མར་ས་ཁར་ལུ་འགྱེལ་སོང་ཡི་ དེ་ལས་སྐད་གཅིག་གིས་ སའུལ་ སའུལ་ ཁྱོད་ཀྱིས་ང་ལུ་ག་ཅི་འབད་ གནོད་པ་བཀལཝ་སྨོ་ཟེར་གསུངས་སར་ང་གིས་གོ་ཡི། 8 དེ་གི་ལན་ལུ་ང་གིས་ གཙོ་བོ་ཁྱོད་ག་སྨོ་ལགས་ཟེར་ཞུཝ་ད་ ང་ཁྱོད་ཀྱིས་གནོད་པ་བཀལ་མི་ ཁྲོམ་ ན་ཟ་རཱེད་ཀྱི་ཡེ་ཤུ་ཨིན་ཟེར་ ང་ལུ་གསུངས་ཡི། 9 ང་དང་གཅིག་ཁར་ཡོད་མི་ཚུ་གིས་ འོད་འདི་མཐོང་ཡི་ གསུང་སྐད་ཡང་གོ་ཡི་ དེ་འབདཝ་ད་ དེ་གི་དོན་དག་འདི་ ཁོང་གིས་ཧ་མ་གོ་བས། 10 དེ་ལས་ གཙོ་བོ་ལགས་ང་གིས་ག་ཅི་འབད་དགོ་ག་ཟེར་ཞུཝ་ད་ གཙོ་བོ་གིས་ང་ལུ་ ཡར་ལོང་སྟེ་ ཁྲོམ་ ད་མཱས་ཀཱོས་ལུ་སོང་ ཁྱོད་ག་ཅི་འབད་དགོ་ག་ ཕར་ལྷོདཔ་ད་ ཁྱོད་ལུ་སླབ་འོང་ཟེར་གསུངས་ཡི། 11 འོད་དེ་གི་གཟི་བརྗིད་ཀྱིས་ ངེའི་མིག་ཏོ་མཐོང་མ་ཚུགསཔ་འགྱོ་སྟེ་ ང་དང་གཅིག་ཁར་འོངས་མི་ཆ་རོགས་ཚུ་གིས་ ངེ་གི་ལག་པ་བཤེད་འཁྱིད་དེ་ ཁྲོམ་ ད་མཱས་ཀཱོས་ལུ་བཀལ་ཡི།
12 དེ་ལས་བཀའ་ཁྲིམས་ཚུལ་བཞིན་དུ་བསྲུང་མི་ དེ་ཁར་སྡོད་མིའི་ ཡ་ཧུ་ད་པ་ག་ར་གིས་ ཞེ་ས་འབད་མིའི་མི་ ཨ་ན་ནའི་ཨཱས་ཟེར་མི་གཅིག་འདུག 13 ཁོ་ང་འབད་སར་འོང་སྦེ་ ཡར་ལོང་སྟེ་ ང་ལུ་ ནུ་གཅུང་ སའུལ་ ཁྱོད་ཀྱིས་ད་མཐོང་ཚུགསཔ་ཟེར་སླབ་ཅིག་ དེ་འཕྲོ་ལས་ང་གིས་ཁོ་མཐོང་ཚུགས་ཅི། 14 དེ་ལས་ཁོ་གིས་ང་ལུ་ ང་བཅས་རའི་ཕ་བརྒྱུད་ཀྱི་དཀོན་མཆོག་གི་ཐུགས་དགོངས་ཤེས་ནིའི་དོན་ལུ་དང་ དྲང་བདེན་པའི་ཞབས་ཕྱིཔ་ལུ་མཇལ་ནིའི་དོན་ལུ་དང་ ཁོ་རང་གི་ཞལ་ལས་གསུངས་མི་འདི་ཉན་ནིའི་དོན་ལུ་ ཁྱོད་ལུ་བཙག་འཐུ་འབད་ཡི། 15 ད་ཁྱོད་ཀྱིས་ཁོ་གི་ཞལ་ལས་གོ་མི་དང་ མཐོང་མི་ཚུ་ ས་ཕྱོགས་ག་ར་ནང་ འཛོམ་དཔང་འབད་དགོ། 16 ད་ག་ཅི་འབད་ཡུན་རིངམ་སྦེ་སྒུག་སྡོད་ནི་ མགྱོགས་པར་ཡར་ལོང་སྟེ་ ཁྲུས་གསོལ་ཞུ་ དེ་ལས་ཁོ་གི་མཚན་ཞུ་སྟེ་ རང་གི་སྡིག་པ་དགཔ་བཟོ་ཟེར་གསུངས་ཡི།།
པའུལ་དྲན་པ་ཉམས་བཞག་སྡོད་པའི་སྐོར།
17 དེ་ལས་ཉིནམ་གཅིག་གི་ཚེ་ ང་ ཡེ་རུ་ཤ་ལེམ་ལུ་ལོག་འོངས་ཏེ་ མཆོད་ཁང་ནང་སྨོན་ལམ་ཞུ་སྡོད་པའི་བསྒང་ ང་དྲན་པ་ཉམས་བཞག་གི་ཐོག་ལས་ གཙོ་བོ་ཡེ་ཤུ་དང་མཇལ་ཡི། 18 ཁོ་གིས་ང་ལུ་མགྱོགས་པར་ ཡེ་རུ་ཤ་ལེམ་ལས་འཐོན་སོང་ ག་ཅི་སྨོ་ཟེར་བ་ཅིན་ ངེ་གི་སྐོར་ལས་ ཁྱོད་ཀྱིས་འཛོམ་དཔང་འབད་མི་འདི་ མི་ཚུ་གིས་ཉན་མི་བཏུབ་ཟེར་གསུངས་ཡི། 19 དེ་འབདཝ་ད་ ང་གིས་ཞུ་ཡི་ གཙོ་བོ་ལགས་ ང་གིས་ སི་ན་གོག་དེ་ཚུ་ནང་སོང་སྟེ་ ཁྱོད་ལུ་དད་པ་བསྐྱེད་མི་ཚུ་འཛིན་བཟུང་འབད་ བཙོན་ནང་བཙུགས་ཏེ་ བརྡུང་མི་དེ་ང་ཨིན་ཟེར་ཁོང་གིས་ཤེས། 20 ནཱ་གི་འཛོམ་དཔང་འབད་མི་ ཨཱིས་ཏེ་ཕཱན་བསད་པའི་བསྒང་ལུ་ བསད་མི་ཆ་ཁྱབ་དང་ཁ་འཆམ་སྟེ་ ཁོང་གི་བགོ་ལ་བདག་འཛིན་འབད་མི་འདི་ ང་ཨིན་ཟེར་ཁོང་གིས་ཤེས་ཟེར་ཞུཝ་ད། 21 ད་རུང་གཙོ་བོ་གིས་ ཁྱོད་ནཱ་ལས་འཐོན་སོང་ ང་གིས་ཁྱོད་ཐག་རིང་སར་ ཕྱིའི་མི་རིགས་ཚུ་སྡོད་སར་གཏང་ནི་ཟེར་གསུངས་ཡི།།
པའུལ་གྱི་མི་ཁུངས་ཀྱི་སྐོར།
22 ད་ལྟོ་ཚུན་ཚོད་ པའུལ་གྱིས་སླབ་མི་ལོ་རྒྱུས་ལུ་ མི་དམངས་ཀྱིས་ཁུ་སིམ་སི་སྦེ་ཉན་སྡོད་ནུག་ ཁོ་གིས་ཨ་ནི་བློ་འདི་སླབ་ཅིག་ མི་ཚུ་གིས་སྐད་སྦོམ་བརྐྱབས་ཏེ་ ག་དེ་སྦེ་ཨིན་རུང་ ཁོ་བཟུམ་གྱི་མི་འདི་ གསོན་པོ་སྦེ་སྡོད་ནིའི་འོས་འབབ་མིན་འདུག་ ཁོ་འཛམ་བུ་གླིང་དེ་ནང་མ་བཞག་ཟེར་སླབ་སྟེ། 23 ཁོང་རང་གི་སྟོད་གོ་ཡོད་རུང་ ཕུད་བཀོག་སྦེ་ ཐལཝ་ནམ་མཁའ་གཏོར་ཏེ་ སྐད་བརྐྱབས་ནུག 24 དེ་ལས་དམག་དཔོན་གྱིས་དམག་མི་ཚུ་ལུ་ པའུལ་དམག་ཁང་ནང་འཁྱིད་ཞིནམ་ད་ རྟས་ལྕག་གིས་བརྡུང་སྟེ་ མི་དམངས་ཀྱིས་ དེ་ཚུན་ཚོད་སྐད་རྐྱབ་དགོ་པའི་དོན་དག་ ག་ཅི་ཨིན་ན་དྲིས་ཟེར་བཀའ་གནང་ནུག 25 དེ་ལས་དམག་མི་ཚུ་གིས་ པའུལ་ཐགཔ་གིས་བཅིངས་ གཟུགས་སྤྲིང་སྟེ་ རྟས་ལྕག་གིས་དྲང་ནི་འབདཝ་ད་ ཁོ་གིས་སྦོ་ལོགས་ལོངས་སྡོད་མི་སྤྱི་དཔོན་གཅིག་ལུ་ ནཱ་གི་ རོམ་རྒྱལ་སྲིད་ཀྱི་མི་ཁུངས་ཨིན་མི་ལུ་ གཏམ་བདེན་རྫུན་མ་ཕྱེ་བར་ དེ་འཕྲོ་ལས་དྲང་ཐག་ཆོག་ག་ཟེར་ཞུཝ་ད། 26 སྤྱི་དཔོན་དེ་མགྱོགས་པར་བྱོན་ཏེ་ དམག་དཔོན་དེ་ལུ་ ནཱ་གིས་ག་དེ་སྦེ་མཛདཔ་སྨོ་ མི་འདི་ རོམ་རྒྱལ་སྲིད་ཀྱི་མི་ཁུངས་ཨིན་མི་གཅིག་ཨིན་མས་ཟེར་ཞུ་ནུག 27 དེ་ལས་དམག་དཔོན་བྱོན་ཏེ་ པའུལ་ ཁྱོད་ རོམ་རྒྱལ་སྲིད་ཀྱི་མི་ཁུངས་ཨིན་ན་ཟེར་གསུངསམ་ད་ ཁོ་གིས་ང་ཨིན་ཟེར་ཞུ་ནུག 28 དེ་ལས་དམག་དཔོན་གྱིས་ ངེ་གི་ རོམ་གྱི་མི་ཁུངས་ཐོབ་ནི་གི་དོན་ལུ་ ཏི་རུ་ལེ་ཤ་སྤྲོད་དེ་ ཐོབ་ཐོབ་ཨིན་ཟེར་གསུངསམ་ད་ པའུལ་གྱིས་ང་སྐྱེས་བའི་བསྒང་ལས་ རོམ་གྱི་མི་ཁུངས་ཨིན་ཟེར་ཞུ་ནུག 29 ཁོ་ལུ་དྲི་བ་དྲི་ནི་འབད་མི་ཆ་ཁྱབ་ག་ར་ དེ་འཕྲོ་ལས་ རྒྱབ་བཤུད་བརྐྱབས་སོངམ་མ་ཚད་ དམག་དཔོན་ཡང་ པའུལ་ རོམ་གྱི་མི་ཁུངས་ཨིནམ་ཤེསཔ་ད་ ཁོ་གིས་ རོམ་གྱི་མི་ཁུངས་ཡོད་མི་ལུ་ ལྕགས་ཐག་གིས་ བཅིང་བཅུག་ནི་འདི་གིས་ ཁོ་གནམ་མེད་ས་མེད་འདྲོགས་ནུག།
པའུལ་ལྷན་ཚོགས་ཀྱི་སྐུ་མདུན་ལུ་ལོང་པའི་སྐོར།
30 དེ་གི་ནངས་པ་དྲོ་པ་ ཡ་ཧུ་ད་པ་ཚུ་གིས་ ག་ཅི་འབད་ཁོ་ལུ་སྐྱོན་བཏགསཔ་ཨིན་ན་ ཤེས་ནིའི་དོན་ལུ་ དམག་དཔོན་གྱིས་ པའུལ་གྱི་ལྕགས་ཐག་ཕུད་སྦེ་ བཙོན་ཁང་ནང་ལས་བཏོན་ཞིནམ་ད་ བླ་ཆེན་དང་ལྷན་ཚོགས་འཐུས་མི་ག་ར་ ཚོགས་འཛོམས་ནང་ཤོག་ཟེར་བཀའ་གནང་སྟེ་ པའུལ་འཁྱིད་དེ་ ཁོང་གི་སྐུ་མདུན་ལུ་ཡར་ལྷོང་བཞག་ནུག