16
པའུལ་ཐེངས་གཉིས་པ་ཆོས་བཤད་པ་འགྱོ་བའི་སྐོར།
1 དེ་ལས་ པའུལ་དང་ སི་ལཱས་ དང་པ་རང་ཁྲོམ་ དཱེར་བེ་དང་ ལིས་ཏྲ་གཉིས་ནང་ལྷོདཔ་ད་ སློབ་མ་ ཏི་མོ་ཐི་ཟེར་མི་དང་འཕྱད་ནུག་ ཁོ་གི་ཨའི་འདི་ ཡ་ཧུ་ད་པའི་མི་རིགས་ཀྱི་དདཔ་ཅན་ཨིན་མས་ དེ་འབདཝ་ད་ཨ་པ་འདི་ ཕྱིའི་མི་རིགས་ཨིན་མས།a 2 ལིས་ཏྲ་དང་ ཁྲོམ་ ཨི་ཀོ་ནི་ཨུམ་ལུ་སྡོད་མི་དདཔ་ཅན་ཚུ་གིས་ ཏི་མོ་ཐི་འདི་མི་ལེགས་ཤོམ་གཅིག་ཡོད་ཟེར་ཆ་བཞག་དོཝ་ཨིན་མས། 3 དེ་ལས་ པའུལ་གྱིས་ ཏི་མོ་ཐི་ ཁོང་དང་གཅིག་ཁར་འཁྱིད་ནི་སྦེ་མནོ་བསམ་གཏང་ནུག་ དེ་འབདཝ་ད་ འདི་ཁར་སྡོད་མི་ ཡ་ཧུ་ད་པ་དེ་ཚུ་གིས་ ཁོ་གི་ཨ་པ་འདི་ ཕྱིའི་མི་རིགས་ལས་ཨིནམ་ ག་ར་གིས་ཤེས་ནུག་ དེ་འབདཝ་ལས་ ཁ་མ་གཏང་ནི་གི་དོན་ལུ་ པའུལ་གྱིས་ཁོ་ལུ་འཁྱིད་དེ་ ཁོ་གི་གཟུགས་གུ་ ཡ་ཧུ་ད་པའི་རྟགས་བཀལ་ཏེ་ ལུས་གཙངམ་བཟོ་ནུག 4 དེ་ལས་ཁོང་ཁྲོམ་གཅིག་ལས་གཅིག་རྒྱུད་དེ་ ཡེ་རུ་ཤ་ལེམ་གྱི་སྐུ་ཚབ་དང་འགོ་འདྲེན་པ་ཚུ་གིས་ གྲོས་ཐག་ཆོད་མི་བཀའ་རྒྱ་འདི་ཚུ་ ཨིན་ཅི་མིན་ཅི་སྲུང་དགོ་ཟེར་ སླབ་སྟེ་རང་འགྱོ་ནུག 5 དེ་ལས་ཆོས་ཚོགས་དེ་ཚུ་ དད་པ་བརྟན་ཏོག་ཏོ་སོང་སྟེ་ ཉིནམ་རེ་རེ་བཞིན་དུ་ ཁོང་གི་གྱངས་ཁ་ཡར་འཕར་སོང་ནུག།
པའུལ་ལུ་ མ་ཀེ་དོ་ནི་ཡ་ལུ་ཤོག་ཟེར་བའི་མཐོང་སྣང་།
6 དེ་ལས་དམ་པའི་ཐུགས་ཉིད་ཀྱིས་ཁོང་ལུ་ ལུང་ཕྱོགས་ ཨེ་སི་ཡ་ལུ་ཆོས་བཤད་པ་འགྱོ་ནི་མེད་ཟེར་བཀགཔ་ལས་ ཁོང་ ཕིརི་གི་ཡ་དང་ ག་ལ་ཏི་གི་ལུང་ཕྱོགས་ལས་སྦེ་བརྐྱབས་ཏེ། 7 ལུང་ཕྱོགས་ མུ་སི་ཡ་གི་ས་མཚམས་ལུ་ལྷོདཔ་ད་ ད་རུང་ཁོང་ ལུང་ཕྱོགས་ བི་ཐུན་ཡ་ལུ་འགྱོ་ནི་འབདཝ་ད་ ཡེ་ཤུ་གི་ཐུགས་ཉིད་ཀྱིས་མ་སོང་ཟེར་བཀག་སྟེ་མ་གཏང་པས། 8 དེ་ལས་ཁོང་ཕར་འགྱོ་ནི་བཞག་སྦེ་ ཕྲང་སྟེ་ མུ་སི་ཡ་ལུང་ཕྱོགས་ལས་སྦེ་ ཁྲོམ་ ཏོརོ་ཨཱས་ལུ་སོང་ནུག 9 ཏོརོ་ཨཱས་ལུ་སྡོད་པའི་ཕྱི་རུ་ པའུལ་གྱི་མཐོང་སྣང་ལུ་ ལུང་ཕྱོགས་ མ་ཀེ་དོ་ནི་ཡ་གི་མི་གཅིག་ཡར་ལོང་སྟེ་ དེ་སྦེ་གསོལཝ་བཏབ་སྟེ་སླབ་ནུག་ ནཱ་ མ་ཀེ་དོ་ནི་ཡ་ལུ་འོངས་ཏེ་ ང་བཅས་ལུ་ཆ་རོགས་འབད་གནང་། 10 དེ་ལས་ པའུལ་གྱིས་མཐོང་སྣང་འདི་མཐོང་པའི་ཤུལ་ལས་ དཀོན་མཆོག་གིས་ང་བཅས་ མ་ཀེ་དོ་ནི་ཡ་ལུ་གཏམ་བཟང་བཤད་པ་ཤོག་ཟེར་འབོ་དོ་ཟེར་ཧ་གོ་ཡི་ ད་ང་བཅས་དེ་འཕྲོ་ལས་ནཱ་ལས་འཐོན་སྦེ་ མ་ཀེ་དོ་ནི་ཡ་ལུ་འགྱོ་སྟེ་ ཕར་གྱི་མི་ཚུ་ལུ་ཆོས་བཤད་ནི་ཨིན་ཟེར་གྲ་སྒྲིག་འབད་ཡི།།
ཨམ་སྲུ་ ལི་དི་ཡཱ་གིས་ཡེ་ཤུ་ལུ་དད་པ་བསྐྱེད་པའི་སྐོར།
11 ང་བཅས་དེ་འཕྲོ་ལས་ ཁྲོམ་ ཏོརོ་ཨཱས་ལས་གྲུ་ནང་འཛུལ་སྦེ་ དེ་ནང་ལས་ཕྲང་རྒྱ་མཚོ་བརྒལ་ཏེ་ འཚོ་གླིང་ ས་མོ་ཐེརཱེས་ནང་ལས་སྦེ་འགྱོ་སྟེ་ དེ་གི་ནངས་པ་ ཁྲོམ་ ནེ་ཨ་པོ་ལཱིས་ནང་ལྷོད་ཅི། 12 དེ་ཁར་ལས་ཐོན་ཏེ་ ལུང་ཕྱོགས་ མ་ཀེ་དོ་ནི་ཡ་ནང་ཡོད་མི་ རོམ་རྒྱལ་སྲིད་ཀྱིས་གོང་འཕེལ་གཏང་མི་ ཁྲོམ་ཁག་ཆེ་ཏོག་ཏོ་ ཕི་ལི་པི་ཟེར་སར་ལྷོདཔ་ད་ དེ་ཁར་ང་བཅས་ཉིནམ་དག་པ་ཅིག་སྡོད་ཅི། 13 ངལ་འཚོ་བའི་ཉིནམ་ལུ་ སྨོན་ལམ་ཞུ་སའི་ས་ཆ་གཅིག་ ཁྲོམ་གྱི་སྒོ་ར་ཁའི་ཕྱི་ཁར་ གཙང་ཆུ་གི་མཐའ་མ་ལུ་འོང་མནོ་སྟེ་འགྱོཝ་ད་ལུ་ དེ་ཁར་ཕྱིའི་མི་རིགས་ཀྱི་ཨམ་སྲུ་ཚུ་འཛོམས་སྡོད་ས་མཐོང་སྟེ་ ཁོང་དང་གཅིག་ཁར་འཕྱད་དེ་ མར་ས་ཁར་སྡོད་དེ་ཁ་སླབ་ཅི། 14 དེ་ཁར་ ཐི་ཨ་ཏེ་ར་གི་ཁྲོམ་ཁ་ལས་ཨིན་མི་ཨམ་སྲུ་ ལི་དི་ཡཱ་ཟེར་མི་གཅིག་ཡོདཔ་མས་ མོ་རིན་གོང་སྦོམ་འབད་མི་བགོ་ལ་རྒྱ་སྨུག་གི་ཚོང་རྐྱབ་མི་གཅིག་ཨིན་མས་ མོ་ཕྱིའི་མི་རིགས་གཅིག་ཨིན་རུང་ དཀོན་མཆོག་ལུ་གསོལཝ་བཏབ་མི་གཅིག་ཨིན་མས་ མོ་གིས་ང་བཅས་ཀྱིས་བཤད་མིའི་ཆོས་ ཉན་སྡོདཔ་ད་ གཙོ་བོ་དཀོན་མཆོག་གིས་མོ་གི་སེམས་སྒོ་ཕྱེ་གནང་སྟེ་ པའུལ་གྱིས་བཤད་མི་ཆོས་ལུ་ཆ་བཞག་སྟེ་དད་པ་བསྐྱེད་ཅི། 15 མོ་དང་མོ་རང་གི་བཟའ་ཚན་ག་ར་ཁྲུས་གསོལ་ཞུ་ཚརཝ་ད་ མོ་གིས་ང་བཅས་ལུ་ ཁྱེད་ཆ་ཁྱབ་ཀྱིས་ ང་གིས་གཙོ་བོ་ཡེ་ཤུ་ལུ་ཐད་རི་བ་རི་དད་པ་བསྐྱེདཔ་མས་ཟེར་ཆ་བཞག་པ་ཅིན་ ངེ་གི་ཁྱིམ་ནང་ལུ་འོངས་ཏེ་ ང་བཅས་དང་མཉམ་གཅིག་སྡོད་ཟེར་ མོ་གིས་ལོག་ཅི་ལོག་ཅི་གསོལཝ་བཏབ་སྟེ་ ང་བཅས་ལུ་འབོ་སྟེ་འཁྱིད་ཅི།།
པའུལ་དང་ སི་ལཱས་གཉིས་ ཕི་ལི་པི་གི་བཙོན་ཁང་ནང་ཚུད་པའི་སྐོར།
16 ཉིནམ་གཅིག་གི་ཚེ་ ང་བཅས་སྨོན་ལམ་ཞུ་སའི་ས་གནས་ནང་སོངམ་ད་ འདྲེ་མཐོང་མཁནམ་ མངོན་ཤེས་བཤད་མི་གཡོགམོ་བུམོ་གཅིག་དང་འཕྱད་ཅི་ བུམོ་དེ་གིས་མངོན་ཤེས་བཤད་ཅི་ར་ ཏི་རུ་ལེ་ཤ་ཐོབ་སྟེ་ མོ་རང་གི་སྦྱིན་བདག་ཚུ་ལུ་སྤྲོད་དོཝ་ཡོདཔ་ཨིན་མས། 17 མོ་གིས་ པའུལ་དང་ང་བཅས་ཀྱི་རྟིང་བདའ་འོང་ཞིནམ་ད་ དེ་སྦེ་སྐད་བརྐྱབས་ཏེ་ ཨ་ནི་མི་འདི་ཚུ་ ག་ར་ལས་མཐོ་བའི་དཀོན་མཆོག་གི་ཞབས་ཕྱི་ཞུ་མི་ཨིན་ ཁོང་གིས་ཁྱེད་ཆ་ཁྱབ་ལུ་ཐར་པ་འདི་ ག་དེ་སྦེ་ཐོབ་ག་སླབ་པ་འོངམ་ཨིན་མས་ཟེར་སླབ་ཅི། 18 མོ་གིས་དེ་སྦེ་རང་སྐད་བརྐྱབས་ཏེ་ ཉིནམ་ལེ་ཤ་ང་བཅས་ཀྱི་རྟིང་བདའ་སྡོདཔ་ད་ པའུལ་གནམ་མེད་ས་མེད་ཁོང་ཁྲོ་ལང་སྟེ་ རྒྱབ་ལོག་ཞིནམ་ད་ འདྲེ་འདི་ལུ་ ཡེ་ཤུ་ཁིརཱིས་ཀྱི་མཚན་ནང་ ཁྱོད་མོ་གི་ནང་ལས་འཐོན་སོང་ཟེར་སླབ་ད་ དེ་འཕྲོ་ལས་འདྲེ་འདི་མོ་གི་ནང་ལས་ཐོན་སོང་ཡི།
19 མོ་གི་སྦྱིན་བདག་ཚུ་གིས་འདི་གི་སྐོར་ལས་ཧ་གོཝ་ད་ ད་ཏི་རུ་བཟོ་ནི་གི་རེ་བ་དང་ཐབས་ཤེས་ཚུ་མེད་ནི་དེ་གིས་ པའུལ་དང་ སི་ལཱས་གཉིས་བཟུང་ཞིནམ་ད་ ཁྲོམ་འཛོམས་ས་ལུ་འདྲུད་དེ་བཀལ་ནུག 20 ད་རུང་དེ་ཁར་ལས་ རོམ་གྱི་འགོ་དཔོན་ཚུ་གི་སྐུ་མདུན་ལུ་བཀལ་ཞིནམ་ད་ ཨ་ནི་མི་དེ་ཚུ་ ཡ་ཧུ་ད་པ་ཨིན་མས་ དེ་ཚུ་གིས་ང་བཅས་ཀྱི་ཁྲོམ་ཁ་ལུ་འོངས་ཏེ་ ང་བཅས་མི་ཚུ་ལུ་ ནང་འཁྲུག་ལོང་བཅུགསཔ་མས། 21 དེ་ལས་ད་རུང་ང་བཅས་ རོམ་མི་ཚུ་གིས་ག་འབད་མ་ཆོག་མིའི་ལུགས་སྲོལ་ཚུ་ ཁོང་གིས་འབད་ཟེར་སྟོནམ་ཨིན་མས་ཟེར་ཞུ་ནུག 22 དེ་ལས་ཁོང་ནང་འཁྲུག་ལོང་མི་ཆ་ཁྱབ་ཀྱིས་ཡང་ ཁ་བསྡོམས་ཏེ་ པའུལ་དང་ སི་ལཱས་གཉིས་ལུ་དགྲ་སྦེ་ལོང་ཡི་ རོམ་གྱི་འགོ་དཔོན་དེ་ཚུ་གིས་ ཁོང་གཉིས་ཀྱི་བགོ་ལ་སྤེད་བཀོག་ཞིནམ་ད་ ད་རུང་ཁོང་ལུ་རྟས་ཐག་གིས་བརྡུང་ཟེར་བཀའ་གནང་ཡི། 23 ད་རུང་ཁོང་ལུ་གནམ་མེད་ས་མེད་དྲང་བརྡུང་སྦེ་ བཙོན་ཁང་ནང་བཙུགས་ཏེ་ བྱོག་འགྱོ་མ་ཚུགསཔ་སྦེ་བསྡམ་བཞག་དགོ་ཟེར་ ཉེན་ཁ་བཀལ་ཏེ་ བཙོན་སྲུང་ལུ་བཀའ་དམ་དམ་སྦེ་གནང་ཡི། 24 ཁོང་གིས་བཀའ་དམ་དམ་སྦེ་གནངམ་ལས་ བཙོན་སྲུང་པ་དེ་གིས་ཡང་ཁོང་གཉིས་ལུ་ བཙོན་ཁང་གི་ཕུག་ནང་འཁྱིད་དེ་ ཁོང་གཉིས་ཀྱི་རྐངམ་ ཤིང་དུམ་གྱི་བར་ན་བཙུགས་ཏེ་ བསྡམས་བཞག་ཅི།
25 དེ་འབདཝ་ད་ གནམ་ནུབ་ཕྱེད་ལུ་ པའུལ་དང་ སི་ལཱས་གཉིས་ཀྱིས་ དཀོན་མཆོག་ལུ་སྨོན་ལམ་ཞུ་སྟེ་ མགུར་མ་འཐེནམ་ད་ བཙོན་པ་གཞན་ཚུ་གིས་ཡང་ ཁོང་གིས་འཐེན་མི་བསྟོད་དབྱངས་ཀྱི་གླུ་དེ་ལུ་ཉན་སྡོད་ནུག 26 དེ་འབདཝ་ད་ རྣམ་རྟོག་དཔྱད་རིག་མེད་སི་སི་སྦེ་ ས་གཡོམ་ཤུགས་སྦེ་བརྐྱབས་ཏེ་ བཙོན་ཁྱིམ་ག་ར་རམས་ནི་བཟུམ་སྦེ་གཡོ་སོང་སྟེ་ སྒོ་དེ་ཚུ་རང་བཞིན་གྱིས་ཕྱེ་སྟེ་ བཙོན་པ་ཚུ་གི་ལྕགས་ཐག་ཚུ་ག་ར་འཁྱོལ་ཡར་སོངམ་ཨིན་མས། 27 བཙོན་སྲུང་པ་དེ་གཉིད་ཚོརཝ་ད་ བཙོན་ཁྱིམ་སྒོ་ག་ར་ཕྱེ་ཡར་སོངམ་མཐོང་སྟེ་ ད་བཙོན་པ་ག་ར་བྱོག་ཡར་སོངམ་འོང་ཟེར་མནོ་སྟེ་ བཙོན་སྲུང་དེ་གནམ་མེད་ས་མེད་ཚ་གྱང་ལངས་ཏེ་ དཔའ་རྟགས་འབལ་ཏེ་ཁོ་རང་རང་སྲོག་བཅད་ནི་འབད་ནུག 28 དེ་འབདཝ་ད་ པའུལ་གྱིས་སྐད་སྦོམ་སྦེ་བརྐྱབས་ཏེ་ རང་གིས་རང་ལུ་གནོད་པ་མ་བཀལ་ ང་བཅས་ག་ར་ནཱ་ལུ་ཡོད་ཟེར་སླབ་ད། 29 བཙོན་སྲུང་དེ་གིས་ དེ་འཕྲོ་ལས་མེ་བཏེག་འབག་ཤོག་ཟེར་སླབ་སྟེ་ མེ་འབག་སྦེ་བརྒྱུགས་ཏེ་ པའུལ་དང་ སི་ལཱས་གཉིས་ཀྱི་གདོང་ཁ་ལུ་ སྒྱིད་ཐག་འདར་ཏེ་ཕྱག་འཚལ་ནུག 30 དེ་ལས་བཙོན་སྲུང་དེ་གིས་ ཁོང་གཉིས་ལུ་ཕྱི་ཁར་འཁྱིད་དེ་ སློབ་དཔོན་ལགས་ ང་གིས་ཐར་པ་ཐོབ་ནིའི་དོན་ལུ་ ག་ཅི་འབད་དགོ་ག་ཟེར་ཞུཝ་ད། 31 དེའི་ལན་ལུ་ཁོང་གིས་ ཁྱོད་ཀྱིས་གཙོ་བོ་ཡེ་ཤུ་ལུ་དད་པ་བསྐྱེད་ དེ་ལས་ཁྱོད་དང་ཁྱོད་ཀྱི་བཟའ་ཚང་ག་ར་གིས་ ཐར་པ་ཐོབ་ནི་ཨིན་ཟེར་སླབ་ནུག 32 དེ་ལས་ཁོང་གཉིས་ཀྱིས་ བཙོན་སྲུང་དང་ཁོ་གི་ཁྱིམ་ནང་ཡོད་མི་ག་ར་ལུ་ གཙོ་བོ་གི་གསུང་དེ་ཁོང་ལུ་བཤད་དེ་སླབ་ནུག 33 དུས་ཚོད་དེ་ ཕྱི་རུ་ནུབ་ཕྱེད་ཨིན་རུང་ བཙོན་སྲུང་གིས་ཁོང་གཉིས་ལུ་འཁྱིད་དེ་ རྟས་ཐག་གི་བརྡུང་མི་རྨ་དེ་ཚུ་ ག་ར་ཆུ་འཁྱུ་ནུག་ དེ་སྦེ་འབད་ཞིནམ་ད་ དེ་འཕྲོ་ལས་ཁོ་དང་ཁོ་རང་གི་བཟའ་ཚང་ག་ར་ཁྲུས་གསོལ་ཞུ་ནུག 34 དེ་ལས་ཁོང་གཉིས་ལུ་ཁྱིམ་ནང་འཁྱིད་སྦེ་ བཞེས་སྒོ་བྱིན་ནུག་ དེ་ལས་དཀོན་མཆོག་ལུ་དད་པ་བསྐྱེད་ནི་དེ་གིས་ ཁོ་དང་ཁོ་རང་གི་བཟའ་ཚང་ག་ར་ལུ་དགའ་སྤྲོ་སྦོམ་བྱུང་ནུག
35 དེ་གི་ནངས་པ་དྲོ་པ་ རོམ་གྱི་འགོ་དཔོན་ཚུ་གིས་ ཁྲིམས་སྲུང་འགག་པ་ལུ་བཀའ་གནང་སྟེ་ ཁོང་ཆ་ཁྱབ་བཙོན་སྲུང་པ་འབད་སར་འགྱོ་སྟེ་ ཁོང་གཉིས་གཏང་ད་ཟེར་གསུངས་ནུག 36 དེ་ལས་བཙོན་སྲུང་གིས་ པའུལ་ལུ་ འགོ་དཔོན་ཚུ་གིས་ ཁྱོད་དང་ སི་ལཱས་གཉིས་བཙོན་ཁང་ནང་ལས་གཏང་ཟེར་བཀའ་གནང་ནུག་ ད་ཞི་བདེ་ནང་སོང་ཟེར་སླབ་ནུག 37 དེ་འབདཝ་ད་ དེའི་ལན་ལུ་ པའུལ་གྱིས་ཁོང་ལུ་ ང་བཅས་ རོམ་གྱི་མི་ཁུངས་ཨིན་ ང་བཅས་ཀྱི་ཉེས་པ་སྦོམ་ག་ནི་ཡང་འབད་འབདཝ་མེད་ དེ་སྦེ་ཨིན་ཏེ་འབད་རུང་ ཁོང་གིས་ང་བཅས་ལུ་དབྱེ་བ་ག་ནི་ཡང་མ་ཕྱེ་བར་ མི་ག་ར་གི་གདོང་ཁར་ལུ་དྲང་བརྡུང་ ད་རུང་ཁྲིམས་གཏང་སྟེ་བཙོན་ཁང་ནང་བཙུགས་བཞག་ཞིནམ་ད་ ད་ང་བཅས་ལུ་ཁུ་སིམ་སི་སྦེ་བཏོན་གཏང་ནི་གི་རྩིས་རྐྱབ་ཨིན་མས་ དེ་སྦེ་འགྱོ་མི་བཏུབ་ རོམ་གྱི་འགོ་དཔོན་ཚུ་ ཁོང་རང་ནཱ་བྱོན་ཞིནམ་ད་ ལོ་རྒྱུས་དེ་ཚུ་ག་ར་ཧིང་སང་ས་སྦེ་གསུངས་ཏེ་ ང་བཅས་ལུ་གཏང་དགོ་ཟེར་སླབ་ནུག 38 ཁྲིམས་སྲུང་འགག་པ་ཚུ་གིས་ ལོ་རྒྱུས་འདི་ཚུ་ག་ར་ཕར་འགོ་དཔོན་ཚུ་ལུ་ཞུཝ་ད་ ཁོང་ རོམ་གྱི་མི་ཁུངས་ཨིནམ་མཁྱེན་ཏེ་ ཁོང་འགོ་དཔོན་ཚུ་གནམ་མེད་ས་མེད་འདྲོག་ཆེ་ནུག 39 དེ་ལས་ཁོང་རང་འགོ་དཔོན་ཆ་ཁྱབ་བཙོན་ཁང་ནང་བྱོན་ཏེ་ ཁོང་གཉིས་ལུ་ཁ་ལྷུ་བརྐྱབས་ཞིནམ་ད་ ཕྱི་ཁར་བཏོན་འཁྱིད་དེ་ ད་ཁྱེད་གཉིས་ཁྲོམ་དེ་ཁར་ལས་འཐོན་འགྱོ་གནང་ཟེར་གསོལཝ་བཏབ་བཏང་ནུག 40 དེ་ལས་ཁོང་གཉིས་བཙོན་ཁང་ནང་ལས་ཐོན་སྦེ་ ལི་དི་ཡཱ་གི་ཁྱིམ་ནང་ལུ་སོང་སྟེ་ དདཔ་ཅན་སྤུན་ཆ་ཚུ་དང་འཕྱད་ནུག་ དེ་ལས་ཁོང་ལུ་སེམས་གསོ་འབད་དེ་ ཁོང་གཉིས་ཁྲོམ་དེ་ཁར་ལས་ཐོན་སོང་ནུག།