14
པའུལ་དང་ བཱར་ན་བཱས་ ཁྲོམ་ ཨི་ཀོ་ནི་ཨུམ་ལུ་ཆོས་བཤད་པའི་སྐོར།
1 དེ་ལས་ཁྲོམ་ ཨི་ཀོ་ནི་ཨུམ་ལུ་ཡང་ པའུལ་དང་ བཱར་ན་བཱས་ཀྱིས་ ཡ་ཧུ་ད་པའི་ སི་ན་གོག་ནང་སོང་སྟེ་ གནམ་མེད་ས་མེད་དབང་ཤུགས་ཡོད་པའི་ཆོས་བཤདཔ་ད་ ཡ་ཧུ་ད་པ་དང་ ཕྱིའི་མི་རིགས་ལས་a མི་ལེ་ཤ་དད་པ་བསྐྱེད་ནུག 2 དེ་འབདཝ་ད་ དད་པ་བསྐྱེད་མ་བཏུབ་མི་ ཡ་ཧུ་ད་པ་དེ་ཚུ་གིས་ ཕྱིའི་མི་རིགས་ཚུ་ལུ་དཀྲོགས་ཁ་བརྐྱབས་ཏེ་ ཁོང་སྤུན་ཆ་ཚུ་ལུ་མིག་ཁར་བཀལ་བཅུག་ནུག 3 དེ་འབདཝ་ལས་བརྟེན་ཏེ་ ཁོང་གཉིས་ཀྱིས་ཁྲོམ་དེ་ཁར་ ཡུན་རིངམ་སྦེ་སྡོདཔ་ད་ གཙོ་བོ་གིས་ཁོང་གཉིས་ཀྱི་ལཱ་གི་ཐོག་ལས་སྦེ་ རྫུ་འཕྲུལ་དང་རྟགས་མཚན་མ་གཅིགཔ་ལེ་ཤ་བཏོན་གནང་སྟེ་ སྤོབས་པ་ཆེ་ཏོག་ཏོ་སྦེ་ གཙོ་བོ་གི་ཐུགས་རྗེ་གི་སྐོར་ལས་ཆོས་བཤད་མི་འདི་ བདེན་པ་སྦེ་ཁུངས་བཀལ་ནུག 4 དེ་འབདཝ་ད་ ཁྲོམ་དེ་ཁར་གྱི་མི་དེ་ཚུ་ ཁོང་རང་ནང་འཁོད་མ་མཐུནམ་བྱུང་སྟེ་ ཁ་གཉིས་སྦེ་འགྱོཝ་ད་ ཁ་གཅིག་གིས་ ཡ་ཧུ་ད་པ་གི་ཁ་ཐུག་དང་ གཞན་མི་འདི་གིས་སྐུ་ཚབ་ཀྱི་ཁ་ཐུག་འབད་ནུག 5 དེ་ལས་ཕྱིའི་མི་རིགས་དང་ ཡ་ཧུ་ད་པ་དེ་ཚུ་ ཁྲོམ་གྱི་འགོ་དཔོན་ཚུ་དང་གཅིག་ཁར་ཁ་འཆམ་སྟེ་ ཁོང་སྐུ་ཚབ་ཚུ་ལུ་གནོད་པ་སྦོམ་བཀལ་ཏེ་ རྡོ་གིས་བརྡུང་གསད་ནི་སྦེ་གནས་སྐབས་བསྒྱིར་ནུག 6 འདི་ཁོང་སྐུ་ཚབ་ཚུ་གིས་ཤེས་ཏེ་ དེ་ཁར་ལས་ ལུང་ཕྱོགས་ ལི་ཀའོ་ནི་ཡཱ་ནང་ཡོད་མི་ ཁྲོམ་ ལིས་ཏྲ་དང་
7 ད་རུང་སྐུ་ཚབ་ཚུ་གིས་ཕར་གྱི་མི་དམངས་ལུ་ཡང་ གཏམ་བཟང་དེ་ འཕྲོ་མཐུད་དེ་རང་བཤད་ནུག།
པའུལ་དང་ བཱར་ན་བཱས་ཀྱིས་ ལིས་ཏྲ་ལུ་མི་རྐངམ་ཞབོ་གཅིག་དྲགཔ་བཟོ་བའི་སྐོར།
8 ཁྲོམ་ ལིས་ཏྲ་ལུ་ མི་གཅིག་སྐྱེས་བའི་བསྒང་ལས་ ཞབོ་སྦེ་ དུས་ནམ་ཡང་ལམ་མ་འགྱོ་མི་གཅིག་ཡོདཔ་ཨིན་མས། 9 མི་དེ་གིས་ པའུལ་གྱིས་ཆོས་བཤད་ས་ ན་འཐན་སྦེ་ཉན་སྡོདཔ་ད་ པའུལ་གྱིས་ཞབོ་དེ་ལུ་ ཐད་ཀར་དུ་བལྟ་སྟེ་ ཁོ་རང་དྲག་ཚུགས་པའི་དད་པ་ཡོདཔ་ པའུལ་གྱིས་ཤེས་ཏེ། 10 སྐད་སྦོམ་སྦེ་བརྐྱབས་ཏེ་ ཁྱོད་རང་གིས་རྐངམ་བཙུགས་ཏེ་ ཡར་ལོང་ཟེར་སླབ་ད་ དེ་འཕྲོ་ལས་ཞབོ་དེ་གིས་ ཡར་མཆོང་ ལམ་འགྱོ་ནུག 11 པའུལ་གྱིས་འབད་མི་ལཱ་དེ་ཚུ་མཐོངམ་ད་ མི་དམངས་ཀྱིས་ཁོང་རང་གི་ཁ་ནང་ལུ་b སྐད་སྦོམ་སྦེ་བརྐྱབས་ཏེ་ ལྷ་དེ་ཚུ་ང་བཅས་སྡོད་སར་ མི་གི་ལུས་ནང་སྤྲུལ་ཏེ་བྱོན་ནུག་ཟེར་སླབ་ནུག 12 ད་རུང་ཁོང་ཆ་ཁྱབ་ཀྱིས་ བཱར་ན་བཱས་ལུ་ གིརིག་གི་ལྷ་གི་མིང་ ཟེའུས་དང་ པའུལ་ལུ་ ཧཱེར་མཱེས་ཟེར་མིང་བཏགས་ནུག་ ག་ཅི་སྨོ་ཟེར་བ་ཅིན་ ལྷ་ ཧཱེར་མཱེས་དེ་ སྐད་གྲགས་ཆེ་ཏོག་ཏོ་ཨིནམ་ལས་ འདི་བཟུམ་སྦེ་ པའུལ་ཡང་ ཆོས་བཤད་མི་གཙོ་བོ་དེ་ ཁོ་འབད་ནི་འདི་གིས་ཨིན་མས། 13 ལྷ་ ཟེའུས་ཀྱི་ལྷ་ཁང་དེ་ ཁྲོམ་གྱི་ཕྱི་ཁར་ལུ་ཡོདཔ་ཨིན་མས་ འདི་ནང་གི་བླམ་དང་མི་དམངས་ཀྱིས་ གླང་དང་མེ་ཏོག་དེ་ཚུ་ཡང་ ཁྲོམ་གྱི་སྒོ་ར་སྒོ་ཁར་འབག་འོངས་ཏེ་ ཁོང་སྐུ་ཚབ་གཉིས་ལུ་ དམར་མཆོད་ཕུལ་ནི་འབད་ནུག
14 སྐུ་ཚབ་ བཱར་ན་བཱས་དང་ པའུལ་གྱིས་འདི་གོཝ་ད་ རང་གི་གཟུགས་ཁ་གི་བགོ་ལ་ཡོད་རུང་སྤེད་དེ་ མི་དམངས་ཀྱི་སྦུག་ལུ་བརྒྱུགས་སོང་སྟེ་ སྐད་སྦོམ་སྦེ། 15 དབའེ་ ཁྱེད་ཆ་ཁྱབ་c ག་ཅི་འབད་རང་འདི་བཟུམ་གྱི་ལཱ་འབདཝ་སྨོ་ ང་བཅས་ཡང་ཁྱེད་བཟུམ་སྦེ་ མི་རང་ཨིན་ ཁུངས་མེད་པའི་སྐུ་ལུ་ དད་པ་བསྐྱེད་ནི་ལས་སེམས་འགྱུར་ཏེ་ གནམ་ཁ་དང་ས་གཞི་ རྒྱ་མཚོ་ དེ་ལས་འདི་ནང་ཡོད་མི་ ག་ར་མཛད་མིའི་དཀོན་མཆོག་ངོ་མ་ལུ་ དད་པ་བསྐྱེད་ནི་གི་གཏམ་བཟང་འདི་ ང་བཅས་ཀྱིས་ཁྱེད་ལུ་བཤད་པ་འོངམ་ཨིན། 16 ཧེ་མ་ འདས་པའི་དུས་ལུ་ ཁོ་གིས་དང་པ་རང་ མི་རིགས་ག་ར་ རང་རང་སོ་སོ་གི་འདོད་པ་ལྟར་དུ་ ག་དགའཝ་འབད་བཅུག་ནུག 17 དེ་རང་ཨིན་རུང་ ཁོ་གི་བཀའ་དྲིན་ལས་བརྟེན་ཏེ་ ནམ་མཁའ་ལས་ཆར་ཆུ་དུས་ལུ་འབབས་ དུས་ཚོད་ལུ་ལོ་ཐོག་ལེགས་ཤོམ་འཚོ་ བཟའ་འཐུང་ཚུ་མ་ཆད་པར་གནང་སྟེ་ ཁྱེད་ལུ་དགའ་སྤྲོ་ནང་ལུ་བཞག་མི་འདི་ དཀོན་མཆོག་ཁོ་རང་རང་ཨིན་ཟེར་ འཛོམ་དཔང་མ་མཛད་པར་མ་བཞག་ཟེར་དེ་སྦེ་སླབ་ནུག 18 པའུལ་དང་ བཱར་ན་བཱས་ཀྱིས་ལོ་རྒྱུས་འདི་ཚུ་ཁུངས་གསལ་ཏེ་སླབ་རུང་ མི་དམངས་ཀྱིས་ཁོང་ལུ་དམར་མཆོད་ཕུལ་ནི་ལས་ བཀག་ནི་ལུ་གནམ་མེད་ས་མེད་ལཱ་ཁག་བརྐྱབས་ནུག
19 དེ་འབདཝ་ལས་ ཁྲོམ་ ཨཱན་ཏི་ཡོག་དང་ ཁྲོམ་ ཨི་ཀོ་ནི་ཨུམ་ལས་ ཡ་ཧུ་ད་པ་དེ་ཚུ་འོངས་ཏེ་ མི་དམངས་ལུ་དཀྲོགཔ་ད་ མི་དམངས་ཀྱིས་ཁོང་གི་ཁ་ལུ་ཉན་ཏེ་ པའུལ་ལུ་རྡོ་གིས་བརྡུང་ནུག་ དེ་ལས་ཁོང་གིས་འབད་བ་ཅིན་ ཁོ་ཤི་སོང་ནུག་ཟེར་མནོ་སྟེ་ ཁོ་ཁྲོམ་ཁ་ལས་འདྲུད་དེ་ ཕྱི་ཁར་བཀལ་ནུག 20 དེ་འབདཝ་ད་ སློབ་མ་དེ་ཚུ་གིས་ ཁོ་བསྐོར་རི་རྐྱབ་ཡར་ལོང་སྡོདཔ་ད་ པའུལ་ཡར་ལོང་སྟེ་ཁྲོམ་ཁར་ལོག་སོང་སྦེ་ འདི་གི་ནངས་པ་དྲོ་པ་ ཁོ་རང་གི་ཆ་རོགས་ བཱར་ན་བཱས་དང་གཅིག་ཁར་ ཁྲོམ་ དཱེར་བེ་ལུ་སོང་ནུག།
པའུལ་དང་ བཱར་ན་བཱས་ལུང་ཕྱོགས་ སི་རི་ཡ་གི་ཁྲོམ་ ཨཱན་ཏི་ཡོག་ལུ་ལོག་སོང་པའི་སྐོར།
21 ཁྲོམ་ དཱེར་བེ་ལུ་ཡང་ ཁོང་གཉིས་ཀྱིས་ དཀོན་མཆོག་གི་གཏམ་བཟང་བཤདཔ་ད་ མི་ལེ་ཤ་གིས་དད་པ་བསྐྱེད་དེ་ སློབ་མ་སྦེ་འོངས་ནུག་ ད་རུང་ཁོང་ཁྲོམ་ ལིས་ཏྲ་དང་ ཁྲོམ་ ཨི་ཀོ་ནི་ཨུམ་ ལུང་ཕྱོགས་ ཕི་སི་དི་ཡ་གི་ཁྲོམ་ ཨཱན་ཏི་ཡོག་ལུ་ལོག་སོང་སྟེ། 22 ཁོང་གིས་སློབ་མ་ཚུ་ སྒྲིང་སྒྲིང་བཟོ་ཡི་རང་ དད་པ་བསྐྱེད་དེ་རང་སྡོད་དགོ་ཟེར་སེམས་གསོ་འབད་ནུག་ དེ་ལས་དཀོན་མཆོག་གི་རྒྱལ་སྲིད་ནང་འཛུལ་ནིའི་དོན་ལུ་ སྡུག་བསྔལ་ལེ་ཤ་མྱོང་དགོ་ཟེར་དྲན་བསྐུལ་འབད་ནུག 23 དེ་ལས་ པའུལ་དང་ བཱར་ན་བཱས་ཀྱིས་ སྨྱུང་གནས་བསྲུང་ སྨོན་ལམ་ཞུ་ཞིནམ་ད་ ཆོས་ཚོགས་རེ་རེ་ནང་འགོ་འདྲེན་པ་བཀལ་ཏེ་ ཁོང་ཆ་ཁྱབ་ བློ་གཏད་ཚུགས་མི་གཙོ་བོ་གི་ཕྱག་ལུ་ཕུལ་ནུག 24 དེ་ལས་ཁོང་གཉིས་ ལུང་ཕྱོགས་ ཕི་སི་དི་ཡ་ལས་བརྐྱབས་ཏེ་ ལུང་ཕྱོགས་ པམ་ཕི་ལི་ཡ་ལུ་སོང་སྟེ། 25 དཀོན་མཆོག་གི་གསུང་འདི་ ཁྲོམ་ པེར་ག་ནང་བཤད་ཚརཝ་ད་ ཁྲོམ་ ཨ་ཏ་ལེ་ཡ་ནང་སོང་ནུག
26 དེ་ཁར་ལས་གྲུ་ནང་ལོག་སྟེ་ ལུང་ཕྱོགས་ སི་རི་ཡ་གི་ཁྲོམ་ ཨཱན་ཏི་ཡོག་ལུ་སོང་ནུག་ ཨཱན་ཏི་ཡོག་དེ་ཧེ་མ་དདཔ་ཅན་ཚུ་གིས་ ཁོང་གཉིས་གཙོ་བོ་གི་ཕྱག་འོག་ལུ་ཕུལ་གཏང་ས་ཨིན་ དེ་ལས་དཀོན་མཆོག་གི་ཐུགས་རྗེ་ལུ་བརྟེན་ཏེ་ ཁོང་གཉིས་ཀྱི་ལཱ་ཚུ་ག་ར་དོན་དག་གྲུབ་སྦེ་ ལོག་འོང་ཚུགས་ནུག 27 ཁོང་དེ་ཁར་ལྷོདཔ་ད་ ཁོང་གིས་ཆོས་ཚོགས་ག་ར་གཅིག་ཁར་འབོ་ཞིནམ་ད་ དཀོན་མཆོག་གིས་ཁོང་དང་གཅིག་ཁར་ ག་དེམ་ཅིག་ཕྱག་ལཱ་མཛད་གནང་ཡི་ག་ དེ་ལས་ཕྱིའི་མི་རིགས་ཚུ་གིས་ ག་དེ་སྦེ་སེམས་ཀྱི་སྒོ་ཕྱེ་སྟེ་ དད་པ་བསྐྱེད་དེ་འོངས་ཡི་ག་ དེ་ཚུ་ག་ར་བཤད་དེ་སླབ་ནུག 28 དེ་ལས་ཁོང་གཉིས་སློབ་མ་ཚུ་དང་གཅིག་ཁར་ ཡུན་རིངམ་སྦེ་ཁྲོམ་ ཨཱན་ཏི་ཡོག་ལུ་སྡོད་ནུག།