8
1-2 ཨཱིས་ཏེ་ཕཱན་བསད་བའི་སྐབས་ འཛོམ་དཔང་གཅིག་ སའུལ་ ཁོ་རང་ཨིན་ཟེར་ཁ་བཟེད་ནུག་ དེ་ལས་ མི་ཆོས་སེམས་ཆེ་ཏོག་ཏོ་འདི་ཚུ་གིས་ ཨཱིས་ཏེ་ཕཱན་གྱི་ཕུང་པོ་ དོང་ནང་བཙུགས་ཞིནམ་ད་ མྱ་ངན་སྦོམ་འབད་ནུག།
སའུལ་གྱི་ཆོས་ཚོགས་ལུ་གནོད་པ་སྦོམ་བཀལ་བའི་སྐོར།
འདི་གི་ཉིནམ་ལས་རང་ ཡེ་རུ་ཤ་ལེམ་ལུ་ཡོད་མིའི་ཆོས་ཚོགས་ཚུ་ལུ་ སྡུག་བསྔལ་ཤུགས་ཆེ་དྲགས་འབད་མྱོང་དགོཔ་འབྱུངམ་ད་ སྐུ་ཚབ་འདི་ཚུ་མ་གཏོགས་ དདཔ་ཅན་ཚུ་ལུང་ཕྱོགས་ ས་མ་རི་ཡ་དང་ ལུང་ཕྱོགས་ ཡུ་དེ་ཡ་ནང་ཁ་གཏོར་སོང་ནུག 3 དེ་འབདཝ་ད་ སའུལ་གྱིས་ཆོས་ཚོགས་ལུ་མེདཔ་གཏང་ནི་འགོ་བཙུགས་ཏེ་ མི་འདི་ཚུ་གི་ཁྱིམ་ལས་ཁྱིམ་རྒྱུད་དེ་ ཕོ་རྒྱ་དང་ཨམ་སྲུ་འདི་ཚུ་ལུ་དབང་བཙོང་གི་ཐོག་ལས་འདྲུད་དེ་ བཙོན་ཁང་ནང་བཙུགས་དོཝ་ཡོདཔ་ཨིན་མས།།
ལུང་ཕྱོགས་ ས་མ་རི་ཡ་ལུ་གཏམ་བཟང་བཤད་པའི་སྐོར།
4 དེ་ལས་ཁ་གཏོར་འགྱོ་མི་དདཔ་ཅན་འདི་ཚུ་གིས་ ཁོང་རང་ག་འགྱོ་ས་ལུ་གཏམ་བཟང་འདི་བཤད་ནུག 5 ཕི་ལིབ་འདི་ ལུང་ཕྱོགས་ ས་མ་རི་ཡ་གི་ཁྲོམ་སྦོམ་ཤོས་གཅིག་ནང་སོང་སྟེ་ དཀོན་མཆོག་གིས་བཙག་འཐུ་མཛད་མི་ཁིརཱིས་ཀྱི་སྐོར་ལས་ གཏམ་བཟང་བཤད་ནུག 6 དེ་ལས་མི་དམངས་ཀྱིས་ ཕི་ལིབ་ཀྱིས་བཤད་མི་ཆོས་འདི་གོཝ་མ་ཚད་ ཁོ་གིས་བཏོན་མི་རྫུ་འཕྲུལ་འདི་ཚུ་མཐོངམ་ད་ ག་ར་གིས་སེམས་ཁར་དྲན་པ་བཏོན་ཏེ་ ཁོ་གིས་བཤད་མི་ཆོས་ལུ་ཉན་ནུག 7 འདི་གི་དུས་ལུ་ མི་ལེ་ཤ་གི་ནང་ན་ལས་འདྲེ་གདོན་ཚུ་སྐད་སྦོམ་བརྐྱབས་ཏེ་ཐོན་སོངམ་མ་ཚད་ གཟུགས་ཞབོ་དང་ མི་རྐངམ་ལགཔ་ཞབོ་ལེ་ཤ་དྲགཔ་བཟོ་ནུག 8 དེ་གིས་འབད་དེ་ ཁྲོམ་འདི་ཁར་མི་ག་ར་ལུ་ དགའ་སྤྲོ་སྦོམ་བྱུང་ནུག
9 ད་ཨ་ནི་ཁྲོམ་ཁར་ སི་མཱོན་ཟེར་མི་ འདྲེ་དང་བདུད་ཀྱི་དབང་ཤུགས་ཀྱིས་འབད་ རྫུ་འཕྲུལ་བཏོན་ནི་ལུ་མཁས་པ་གཅིག་ཡོདཔ་ཨིན་མས་ ཁོ་གིས་རྫུ་འཕྲུལ་བཏོན་ཏེ་ ས་མ་རི་ཡ་པ་ཚུ་ག་ར་ཧ་ལས་བཅུག་དོཝ་ཨིན་མས་ ཁོ་གིས་ཁོ་ར་རང་དྲག་ཤོས་གཅིག་ཨིན་ཟེར་སླབ་དོཝ་ཡོདཔ་ཨིན་མས། 10 དེ་ལས་མི་ཆེ་ཆུང་ དྲག་ཞེན་ག་ར་གིས་ མཐུ་དང་ནུས་པ་སྦོམ་ཡོད་མིའི་ལྷ་གཅིག་གིས་a ཁོ་ལུ་ཁྱབ་ནུག་ཟེར་ ཁོང་ག་ར་གིས་ཁོ་གིས་སླབ་མི་ལུ་ སེམས་དྲན་པ་བཏོན་ཏེ་ཉན་ནུག 11 ཧེ་མ་ལས་ཁོ་གིས་རྫུ་འཕྲུལ་ཡུན་རིངམ་སྦེ་བཏོན་ནི་འདི་གིས་ མི་ཚུ་ག་ར་ཧ་ལས་ཏེ་ ཁོ་གིས་སླབ་མི་ལུ་སེམས་དྲན་པ་བཏོན་ཏེ་སྡོད་ནུག 12 དེ་འབདཝ་ད་ ཕི་ལིབ་ཀྱིས་ཁོང་ལུ་ དཀོན་མཆོག་གི་རྒྱལ་སྲིད་དང་ ཡེ་ཤུ་འདི་ཁིརཱིས་ཨིན་ཟེར་ གཏམ་བཟང་བཤདཔ་ད་ ཕོ་རྒྱ་དང་ཨམ་སྲུ་ལེ་ཤ་ཅིག་རང་དད་པ་བསྐྱེད་དེ་ ཁྲུས་གསོལ་ཞུ་ནུག 13 ད་རུང་ སི་མཱོན་ ཁོ་རང་ཡང་དད་པ་བསྐྱེད་དེ་ ཁྲུས་གསོལ་ཞུ་ནུག་ དེ་ལས་ དཀོན་མཆོག་གི་དབང་གིས་འབད་ ཕི་ལིབ་ཀྱིས་བཏོན་མིའི་རྟགས་དང་རྫུ་འཕྲུལ་འདི་ཚུ་མཐོངམ་ད་ ཧ་ལས་ཏེ་ ཕི་ལིབ་ག་འགྱོ་སར་ལུ་རྟིང་བདའ་སོང་ནུག
14 ཡེ་རུ་ཤ་ལེམ་ལུ་ཡོད་མི་སྐུ་ཚབ་དེ་ཚུ་གིས་ ས་མ་རི་ཡ་གི་མི་དེ་ཚུ་གིས་ དཀོན་མཆོག་གི་གསུང་ལུ་དད་པ་བསྐྱེད་ནུག་ཟེར་གོཝ་ད་ པེ་ཏྲོ་དང་ ཡོ་ཧ་ནཱན་ལུ་ ཁོང་ ས་མ་རི་ཡ་པ་ཚུ་འབད་ས་བཏང་ནུག 15 དེ་ལས་ཁོང་གཉིས་ ས་མ་རི་ཡ་ལུ་ལྷོདཔ་ད་ ཁོང་ལུ་དམ་པའི་ཐུགས་ཉིད་ཐོབ་བཅུག་ནི་སྦེ་ སྨོན་ལམ་ཞུ་ནུག 16 ག་ཅི་སྨོ་ཟེར་བ་ཅིན་ ཁོང་ ས་མ་རི་ཡ་པ་ཚུ་གིས་ གཙོ་བོ་ཡེ་ཤུ་གི་མཚན་ནང་ཁྲུས་གསོལ་རྐྱངམ་གཅིག་ལེནམ་མ་གཏོགས་ དམ་པའི་ཐུགས་ཉིད་ཀྱིས་མ་ཁྱབ་ཨིན་མས། 17 དེ་ལས་ པེ་ཏྲོ་དང་ ཡོ་ཧ་ནཱན་གྱིས་ཁོང་དདཔ་ཅན་ཆ་ཁྱབ་ཀྱི་གུ་ལུ་ལགཔ་བཀལ་ སྨོན་ལམ་ཞུཝ་ད་ ཁོང་དམ་པའི་ཐུགས་ཉིད་ཀྱིས་གང་ནུག 18 དེ་ལས་སྐུ་ཚབ་དེ་ཚུ་གིས་ལགཔ་བཀལ་ཏེ་དམ་པའི་ཐུགས་ཉིད་གང་ས་ སི་མཱོན་གྱིས་མཐོང་སྟེ་ ཁོ་གིས་ཏི་རུ་འབག་འོང་ཞིནམ་ད། 19 ཐུགས་ཉིད་ཀྱི་དབང་འདི་ང་ལུ་ཡང་གནང་ལགས་ དེ་ལས་ང་གིས་ཡང་རོགས་ལུ་ལགཔ་བཀལ་ སྨོན་ལམ་བཏབ་ད་ དམ་པའི་ཐུགས་ཉིད་ཀྱིས་ཁྱབ་བཅུག་གེ་ཟེར་སླབ་ནུག 20 དེ་འབདཝ་ད་ པེ་ཏྲོ་གིས་ དཀོན་མཆོག་གི་གསོལ་རས་འདི་ ཏི་རུ་གིས་ཉོ་ཚུགས་ཟེར་མནོ་བསམ་གཏངམ་ལས་བརྟེན་ ཁྱོད་དང་ཁྱོད་ཀྱི་ཏི་རུ་རྩ་མེད་གཏང་བཅུག 21 ཁྱོད་ཀྱི་སེམས་དཀོན་མཆོག་གི་གཟིགས་སར་ཀྲིག་ཀྲི་མིན་འདུག་ ཨ་ནི་དཀོན་མཆོག་གི་ཕྱག་ལཱ་ནང་ ག་ཅི་གི་བགོ་བཤའ་ཡང་ཁྱོད་ཀྱིས་མི་ཐོབ། 22 ཁྱོད་ཀྱིས་ འགྱོད་སེམས་བསྐྱེད་དེ་ ཨ་ནི་ལཱ་ངན་པ་ལས་སེམས་འགྱུར་ཏེ་ ཁྱོད་ཀྱི་སེམས་ཁར་གྱི་མནོ་བསམ་ངན་པ་ཚུ་ དཀོན་མཆོག་གིས་བཀའ་དྲིན་བསྐྱངས་ཟེར་ གཙོ་བོ་དཀོན་མཆོག་ལུ་སྨོན་ལམ་ཞུ། 23 ག་ཅི་སྨོ་ཟེར་བ་ཅིན་ ཁྱོད་ཀྱི་སེམས་ཁ་ལུ་ ང་རྒྱལ་དང་ཕྲག་དོག་གིས་གང་སྟེ་ སྡིག་པ་ནང་ཐིམ་ཆེཝ་ ང་གིས་མཐོང་ཅི་ཟེར་སླབ་ནུག 24 དེ་ལས་ སི་མཱོན་གྱིས་ ཁྱོད་ཀྱིས་སླབ་མིའི་བློ་ཚུ་ག་ར་ ངེ་གི་གུ་ལུ་ཕོག་མ་བཅུག་ ཁྱོད་ཀྱིས་རང་ ངེ་གི་དོན་ལུ་གཙོ་བོ་ལུ་གསོལ་བ་བཏབ་གནང་ཟེར་སླབ་ནུག
25 དེ་ལས་ཁོང་སྐུ་ཚབ་གཉིས་ཀྱིས་ ས་མ་རི་ཡ་ལུ་འཛོམ་དཔང་འབད་ ཆོས་བཤད་ཚར་བའི་ཤུལ་ལུ་ ད་རུང་ལོག་སྟེ་ ཡེ་རུ་ཤ་ལེམ་ལུ་འོང་པའི་ཞོར་ཁ་ ལམ་བདའ་ ས་མ་རི་ཡ་གི་གཡུས་ཚན་ལེ་ཤ་ནང་ གཏམ་བཟང་འདི་བཤད་ཅི་རང་སོང་ནུག།
ཕི་ལིབ་དང་ལུང་ཕྱོགས་ ཨེ་ཐི་ཨོཔ་གི་གཟིམ་དཔོན་གྱི་སྐོར།
26 འདི་གི་ཤུལ་ལས་ གཙོ་བོ་གི་ཕོ་ཉ་གཅིག་གིས་ ཕི་ལིབ་ལུ་ ནཱ་ལས་ཐོན་ཏེ་ ཡེ་རུ་ཤ་ལེམ་གྱི་ལྷོ་ཕྱོགས་ལས་ ཁྲོམ་ ག་ཟ་ལུ་འགྱོ་སའི་ རི་སྟོང་གི་ལམ་ཁར་སོང་ཤིག་ཟེར་སླབ་ནུག 27 ཁོ་དེ་ཁར་ལས་ཐོན་ཏེ་འགྱོཝ་ད་ ལུང་ཕྱོགས་ ཨེ་ཐི་ཨོཔ་གི་རྒྱལམོ་ ཀཱན་དཱེས་ཀྱི་དངུལ་རྩིས་བློན་པོ་ ཉུག་རུམ་པ་དང་མཉམ་འཕྱད་ནུག་ ཁོ་ ཡེ་རུ་ཤ་ལེམ་ལུ་བསྟོད་པ་ཕུལ་བ་འོངས་ཡོདཔ་ཨིན་མས། 28 ཁོ་ལོག་འགྱོ་བའི་ལམ་ཁར་ རྟ་གཱ་རི་གུ་ཞོན་ཏེ་ ལུང་སྟོན་པ་ ཨའི་ཟ་ཡ་གི་དེབ་ལྷབ་སྟེ་འགྱོ་ཡོདཔ་མས། 29 དེ་ལས་ཐུགས་ཉིད་ཀྱིས་ ཕི་ལིབ་ལུ་ ཁྱོད་ཡར་ཧེ་མ་ཐོན་ཞིནམ་ད་ རྟ་གཱ་རི་འདི་གི་སྦོ་ལོགས་ཁར་ལས་ འདྲན་འདྲ་འབད་ལམ་འགྱོ་སོང་ཟེར་གསུངས་ནུག 30 དེ་ལས་ ཕི་ལིབ་དངུལ་རྩིས་བློན་པོ་སྡོད་ས་རྒྱུག་འགྱོཝ་ད་ ཁོ་གིས་ ཨའི་ཟ་ཡ་གི་དེབ་གཅིག་ལྷབ་ས་གོ་སྟེ་ ད་ལྟོ་ཁྱོད་ཀྱིས་ལྷབ་མི་གི་དཔེ་ཆ་འདི་གི་དོན་དག་ ཁྱོད་ཀྱིས་ཧ་གོ་ཡི་ག་ཟེར་འདྲིཝ་ད། 31 དངུལ་རྩིས་བློན་པོ་གིས་ ང་ལུ་འགྲེལ་བཤད་རྐྱབ་བྱིན་མི་མེད་པར་ ག་དེ་སྦེ་ང་གིས་ཧ་གོ་ཚུགས་ནི་ཟེར་སླབ་ནུག་ དེ་ལས་ ཕི་ལིབ་ལུ་ཡར་ཁོ་དང་མཉམ་གཅིག་ རྟ་གཱ་རི་གུ་འཛེག་ཤོག་ཟེར་སླབ་ནུག 32 ཁོ་གིས་ལྷབ་མི་དེབ་ནང་གི་ཚིག་འཕྲོ་འདི།
ཁོ་ལུག་བཟུམ་སྦེ་བསད་པ་འཁྱིད་ཅི་ མི་གིས་ལུག་གི་ཕྱུག་ཀུ་གི་བལ་བཞུརཝ་ད་ སྐད་མ་རྐྱབ་པར་ ཁུ་སིམ་སི་སྦེ་སྡོད་དོཝ་བཟུམ་སྦེ་ ཁོ་ཡང་ཁུ་སིམ་སི་སྦེ་ཚིག་གཅིག་ཡང་ མ་གསུངས་པར་བཞུགས་ནུག 33 ཁོ་ལུ་དམའ་ཕབས་བརྐྱབས་ད་ལུ་ དྲང་དཔོན་གྱིས་ཡང་གཏམ་ཕྲང་སྟེ་ མ་ཕྱེཝ་ཨིནམ་ད་ མི་ག་གིས་འབད་རུང་ ཁོ་རང་གི་བུ་བརྒྱུད་ཀྱི་སྐོར་ལས་སླབ་མི་ཚུགས་ ག་ཅི་སྨོ་ཟེར་བ་ཅིན་ ཁོ་གིས་སྐུ་ཚེ་འདི་འཇིག་རྟེན་ནང་ལས་ མཇུག་བསྡུཝ་ཨིན་མས་ཟེར་b
དེ་སྦེ་བྲིས་ནུག 34 དེ་ལས་དངུལ་རྩིས་བློན་པོ་དེ་གིས་ ཕི་ལིབ་ལུ་ ལུང་སྟོན་པ་འདི་གིས་ ག་གི་སྐོར་ལས་འབྲི་འབྲིཝ་སྨོ་ ང་ལུ་སླབ་གནང་ ཁོ་གིས་རང་གི་དོན་ལུ་སླབ་སླབ་ཨིན་ན་ ཡང་ན་གཞན་གྱི་དོན་ལུ་སླབ་སླབ་སྨོ་ཟེར་འདྲིཝ་ད། 35 ཕི་ལིབ་ཀྱིས་ དངུལ་རྩིས་བློན་པོ་འདི་གིས་ལྷབ་མི་དེབ་དེ་ལས་འཕྲོ་མཐུད་དེ་ ཡེ་ཤུ་གིས་སྐོར་ལས་གཏམ་བཟང་ག་ར་བཤད་དེ་སླབ་ནུག 36 ཁོང་རྟ་གཱ་རི་གུ་འགྱོཝ་ད་ ལམ་གྱི་མཐའ་མར་ཆུ་གཅིག་གི་སྦོ་ལོགས་ལྷོད་དེ་ དངུལ་རྩིས་བློན་པོ་འདི་གིས་ བལྟ་ལགས་ ཨ་ནཱ་ཆུ་འདུག་ ང་གིས་ཁྱོད་ལས་ཁྲུས་གསོལ་ཞུ་ཚུགས་ག་ཟེར་སླབ་ནུག 37 c 38 དེ་ལས་ཁོ་གིས་རྟ་གཱ་རི་བཀག་ཞིནམ་ད་ ཕི་ལིབ་དང་ཁོ་ཆུ་ནང་སོང་སྟེ་ ཕི་ལིབ་ཀྱིས་ཁོ་ལུ་ཁྲུས་གསོལ་བྱིན་ནུག 39 ཁོང་གཉིས་ཆུ་ནང་ལས་ཡར་འཐོན་འོངམ་ད་ གཙོ་བོ་གི་ཐུགས་ཉིད་ཀྱིས་ ཕི་ལིབ་ལུ་ ཡུདཔ་ཐེངས་ཅིག་གི་ནང་འཁོད་ན་ ག་སོང་མེད་པར་འཁྱིད་བྱོན་ནུག་ དེ་ལས་དངུལ་རྩིས་བློན་པོ་འདི་གིས་ ཕི་ལིབ་རྩ་ལས་རང་མཐོང་མ་ཚུགས་པས་ དེ་སྦེ་ཨིན་རུང་ ཁོ་གནམ་མེད་ས་མེད་དགའ་སྤྲོ་བསྐྱེད་དེ་ ད་རུང་འཕྲོ་མཐུད་དེ་རང་ ཁོ་རང་གི་ལམ་བདའ་སོང་ནུག 40 དེ་འབདཝ་ད་ ཕི་ལིབ་ ཁོ་རང་གིས་མ་ཤེས་པའི་བར་ན་ ཁྲོམ་ ཨ་ཟོ་ཏཱོས་ལུ་ལྷོད་ནུག་ དེ་ལས་ད་རུང་ཁོ་ཁྲོམ་ ཀེ་ས་རི་ཡ་ལུ་མ་ལྷོད་ཚུན་ཚོད་ ལམ་བདའ་སྟེ་ཡོད་མི་ཁྲོམ་ག་ར་ནང་ གཏམ་བཟང་བཤད་ཅི་རང་སོང་ནུག།