Yɛnŋɛlɛ lìgi yɔn fɔlɔ kɔn
8
1 Yawe Yɛnŋɛlɛ na yawa pi ni fuun fɔ làa li sɛnrɛ ti yo na kan naa. 2 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:«Siyɔn* ca kìlan ndanla jɛŋgɛ ndanlawa yenjara woo ni.
Ki yɛn mala ndanla ndanlawa gbɔɔ ni wa na kotogo na.»
3 Pa Yawe Yɛnŋɛlɛ lì yo yɛɛn fɔ:
«Mi yaa sɔngɔrɔ mbe pan naa wa Siyɔn yanwiga ki na,
mbe cɛn naa wa Zheruzalɛmu ca ki ni.
Pe yaa kaa Zheruzalɛmu ca ki yinri kaselege ca;
pe yaa kaa Yawe Yɛnŋɛlɛ na yawa pi ni fuun fɔ li yanwiga ki yinri yanwiga kpoyi*.»
4 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Lelɛŋgbaara naa jɛniŋgbaara ti ni, pe yaa kaa paan mbaa cɛɛn naa wa Zheruzalɛmu ca katoro ti ni,
gbɔtangaŋgala ni pe ni fuun nuŋgba nuŋgba pe kɛɛ,
yinwetɔnlɔgɔ ŋga pe yaa ta mbe lɛ ki kala na.
5 Ca ki katoro ti yaa ka yin lenambiile naa sumborombiile pe ni, pe yaa kaa jinrigi wa katoro ti ni.»
6 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Izirayɛli* woolo mbele pè koro go na, na kaa pye ki kala li yaa pye kagbɔgɔ pe yɛgɛ na ki piliye yi ni, mi wo yɛgɛ na ki se pye kagbɔgɔ na yeri.
Yawe Yɛnŋɛlɛ na yawa pi ni fuun fɔ lo lì yo ma.»
7 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Wele, mi yaa na woolo pe shɔ tara nda wa yɔnlɔ yirisaga kɛɛ yeri ti woolo pe kɛɛ,
mbe pe shɔ tara nda wa yɔnlɔ tosaga kɛɛ yeri ti woolo pe kɛɛ.
8 Mi yaa pan pe ni,
pe yaa pan mbe cɛn wa Zheruzalɛmu ca.
Pe yaa ka pye na woolo,
mi yaa ka pye pe Yɛnŋɛlɛ kaselege naa kasinŋge na.»
9 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Ye kotogo le ye yɛɛ ni!
Sɛnrɛ nda Yɛnŋɛlɛ yɔn sɛnrɛ yofɛnnɛ* pàa yo,
sanga ŋa ni leele pàa Yawe Yɛnŋɛlɛ na yawa pi ni fuun fɔ li shɛrigo gbɔgɔ* ki nɔgɔ le,
mbege kan naa fɔnŋgɔ,
ko sɛnrɛ nuŋgba to ye yɛn na nuru nala naa.
10 Sanni ki wagati wi sa gbɔn,
lere sila pye na sara taa wi tunŋgo ki na,
sara sila pye na taa fun yaayoro ti tunŋgo ki na.
Leele pe sila pye na kee mbaa paan yɛyinŋge na juguye pe kala na;
katugu mìla leele pe yirige ma pe wa pe yɛɛ na.
11 Koni, ki cɛnlɛ na li woolo mbele pè koro go na,
mi se pe yigi paa yɛgɛ ŋga na mìla ki pye faa we.
Yawe Yɛnŋɛlɛ na yawa pi ni fuun fɔ lo lì yo ma.
12 Mi yaa yɛyinŋge kan ye yeri laga tara ti ni.
Ɛrɛzɛn* tiire ti yaa la sɛni.
Yarilire ti yaa la yɔngɔ wa tara ti na.
Tisara ti yaa la paan tara ti na.
Mi yaa ki yarijɛndɛ nda ti ni fuun ti kan na woolo mbele pè koro go na pe yeri†.
13 Yoro zhuda tara woolo, naa Izirayɛli tara woolo,
yɛgɛ ŋga na yàa pye faa cɛnlɛ na li woolo pè daŋga cɛngɛlɛ sanŋgala ke sɔgɔwɔ,
ki pyelɔmɔ nuŋgba pi na fun, mi yaa ye shɔ. Ye yaa pye duwaw piile.
Yaga ka fyɛ ye kotogo le ye yɛɛ ni.»
14 Katugu Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Ye tɛlɛye pàa na nawa pi ŋgban sanga ŋa ni,
mìla ki kɔn maga tɛgɛ mbe ye jɔlɔ.
Mi sila yɔn sɔngɔrɔ ki wogo ki pyewe na.
Yawe Yɛnŋɛlɛ na yawa pi ni fuun fɔ lo lì yo ma.
15 Ki pyelɔmɔ nuŋgba pi na fun, koni mìgi kɔn maga tɛgɛ
mbe kajɛŋgɛ pye yoro Zheruzalɛmu ca woolo ye kan konaa Zhuda tara woolo ye kan.
Yaga ka fyɛ.
16 Ŋga ye daga mbaa piin ki ŋga:
Ye ni fuun nuŋgba nuŋgba yaa kaselege yuun ye lewee yɛɛnlɛ pe kan.
Wa ye kiti kɔnsara ti ni, yaa kiti wi kɔɔn yaa yala kaselege ki ni, mbe ta mbaa yɛyinŋge nii leele pe sɔgɔwɔ†.
17 Ye ni wa kpɛ ka ka kapege jate wa wi kotogo na wi lewee yɛnlɛ wa ni.
Yaga kaa wungu yagbolo na,
katugu ki kapyere nda ti ni fuun ti yɛn mala mbɛn.
Yawe Yɛnŋɛlɛ lo lì yo ma.»
Yeŋge lepiliye yi yaa kanŋga
18 Yawe Yɛnŋɛlɛ na yawa pi ni fuun fɔ làa li sɛnrɛ ti yo na kan na yeri na, ma yo fɔ: 19 «Yawe Yɛnŋɛlɛ na yawa pi ni fuun fɔ, pa lì yo yɛɛn fɔ: ‹Yeŋge ŋga ye ma le yɛlɛ li yeŋge tijɛrɛ wogo ki na, naa ŋga ye ma le yeŋge kaŋgurugo wogo ki na, naa ŋga ye ma le yeŋge kɔlɔshyɛn wogo ki na konaa ŋga ye ma le yeŋge kɛ wogo ki na†, ki piliye yi yaa kanŋga mbe pye Zhuda tara woolo pe yeri yɔgɔrimɔ piliye, naa nayinmɛ piliye konaa fɛti yɔgɔrimɔ piliye. Ɛɛn fɔ, ye ti kaselege naa yɛyinŋge ki ye ndanla.› »
20 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ: «Cɛngɛlɛ kele yɛgɛ woolo yaa ka pan naa fɔnŋgɔ laga Zheruzalɛmu ca ki ni, konaa cara lɛgɛrɛ ta woolo ni. 21 Ca ka woolo yaa ka yiri mbe saga yo ca ka yɛgɛ woolo kan mbe yo fɔ: ‹Ye yiri we kari we sa Yawe Yɛnŋɛlɛ li yɛnri! We sa Yawe Yɛnŋɛlɛ na yawa pi ni fuun fɔ li lagaja!› Ki ca woolo pe yaa ka pe yɔn sogo mbe yo fɔ: ‹Woro fun we yaa kari wa.› 22 Tara lɛgɛrɛ woolo naa cɛngɛlɛ fanŋga wogolo yaa ka pan wa Zheruzalɛmu ca mbe Yawe Yɛnŋɛlɛ na yawa pi ni fuun fɔ li lagaja konaa mbeli yɛnri.»
23 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ: «Ko sanga wo ni, leele kɛ yaa ka yiri sɛnrɛ pyew ti leele pe ni cɛngɛlɛ ke ni fuun ke ni, mbe sa Zhufuye naŋa nuŋgba yigi wi derigbɔgɔ ki nɔgɔna yɔn ki na, mboo pye fɔ: ‹We yaa pinlɛ ma ni mbe kari, katugu wège logo ma yo Yɛnŋɛlɛ li yɛn ye ni.› »