Yeŋge lege ŋga ki yɛn ma yɔn
7
1 Wunlunaŋa Dariyusi wi wunluwɔ pi yɛlɛ tijɛrɛ wolo li yeŋge kɔlɔjɛrɛ wogo ŋga pe yinri Kisilɛvu† yeŋge, ki pilige tijɛrɛ wogo ki na, a Yawe Yɛnŋɛlɛ lì si para Zakari wi ni naa.2 Betɛli ca woolo pàa Sarezɛri, naa Eregemu Melɛki konaa wi woolo pele tun ma yo pe sa Yawe Yɛnŋɛlɛ li yɛnri; 3 konaa Yawe Yɛnŋɛlɛ na yawa pi ni fuun fɔ, saraga wɔfɛnnɛ* mbele pe wa li shɛrigo gbɔgɔ* ki ni, pe sa pe yewe mbe pinlɛ li yɔn sɛnrɛ yofɛnnɛ* pe ni, mbe pe pye fɔ: «Ki daga we koro waa gbele konaa mbaa yeŋge nii yɛlɛ li yeŋge kaŋgurugo wogo ki ni, paa yɛgɛ ŋga na we yɛn naga piin, maga lɛ wa yɛgɛlɛ lɛgɛrɛ ni le?»
4 Kona, Yawe Yɛnŋɛlɛ na yawa pi ni fuun fɔ, a lì sili sɛnrɛ ti yo mi Zakari na kan ma yo fɔ:
5 «Ki yo tara woolo pe ni fuun pe kan konaa saraga wɔfɛnnɛ pe kan fɔ:
‹Maga lɛ wa, yɛlɛ nafa taanri ma yiri kɛ ni, ye ma yeŋge le* ma kunwɔ gbelege gbele yɛlɛ li yeŋge kaŋgurugo wogo naa kɔlɔshyɛn wogo ki na†;
ɛɛn fɔ naga yɛn ma, kaselege ko na, ye ma yeŋge ki le mbe mi gbɔgɔ wi le?›
6 Na ye kaa nii mbaa woo,
ndɛ ye maa nii na woo ye yɛɛra tɔnli wo kala na?
7 Naga yɛn ma, ko sɛnrɛ nuŋgba nda to ma Yawe Yɛnŋɛlɛ làa le li yɔn sɛnrɛ yofɛnnɛ koŋgbanmbala pe yɔn, a pèri yo wi le? Ki sanga wi ni, leele pàa pye ma cɛn wa Zheruzalɛmu ca konaa ki kanŋgara na cara ti ni yɛyinŋge na, leele la pye ma cɛn fun wa Negɛvu* tara to naa yanwira tigiwɛn tara ti ni.»
8 Yawe Yɛnŋɛlɛ làa li sɛnrɛ ti yo Zakari wi kan, ma yo fɔ:
9 «Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
‹Yaa kiti wi kɔɔn yaa yala ŋga kì sin ki ni.
Yaa kajɛŋgɛ piin ye yɛɛ kan, yaa ye yɛɛ yinriwɛ taa.
10 Yaga kaa naŋgunjaala poro naa pijiriwele pe jɔlɔ,
naa nambanmbala poro naa fyɔnwɔ fɛnnɛ pe ni.
Yaga kaa kapege jate wa ye nawa ye lewee yɛɛnlɛ pe ni.› »
11 «Ɛɛn fɔ pàa je mbe logo. Pàa yiri ma je, ma pe yɛɛ pye nuŋgbojiile, jaŋgo paga ka ta mbe logo. 12 Pàa pe kotoro ti ŋgbanŋgban pe yɛɛ na paa lulu yɛn, jaŋgo Yawe Yɛnŋɛlɛ na yawa pi ni fuun fɔ, làa li lasiri* konaa li sɛnrɛ nda yo li yɔn sɛnrɛ yofɛnnɛ koŋgbanmbala pe kan li yinnɛ li fanŋga na, a pèri yo, paga ka ta mberi logo. Kona, Yawe Yɛnŋɛlɛ na yawa pi ni fuun fɔ lì si nawa ŋgban pe ni fɔ jɛŋgɛ. 13 A lì sho fɔ:
‹Mìla pe yeri sanga ŋa ni,
pe sila yɛnlɛ mbe logo na yeri.
Koni, poro fun pe yaa na yeri,
mi se logo pe yeri.
Yawe Yɛnŋɛlɛ na yawa pi ni fuun fɔ, lo lì yo ma.
14 Ki kala na, mì pe gbɔn ma pe jaraga wa cɛngɛlɛ ke ni fuun ke sɔgɔwɔ,
koro ŋgele pe sila ke jɛn we.
A tara tì koro waga pe puŋgo na.
Lere sila pye na paan wa ti ni, lere sila pye na yinrigi wa ti ni.
Ki tara nda tìla pye tara tiyɔnrɔ, pèri pye tì koro waga.› »