Yawe Yɛnŋɛlɛ li pitunŋɔ
61
1 We Fɔ*, Yawe Yɛnŋɛlɛ li yinnɛ li yɛn na ni,katugu lì sinmɛ kpoyi* wo na na mala wɔ.
Lìlan tun mbe saa sɛntanra ti yuun fyɔnwɔ fɛnnɛ pe kan,
mbaa jigi kaan mbele pe jigi wì kɔn pe na pe yeri,
mbaa ki yari mbele pè yigi kulolo pe kan fɔ pe yaa ka koro pe yɛɛ kan,
mbaa ki yari kasopiile pe kan fɔ pe yaa ka pe wa,
2 mbaa Yawe Yɛnŋɛlɛ li kajɛŋgɛ pyeyɛlɛ li wogo ki yari,
we Yɛnŋɛlɛ li yaa ka li kayaŋga ki wɔ li juguye pe ni pilige ŋga ni, mbaa ki wogo ki yari fun.
Lìlan tun mbaa mbele fuun kunwɔ kayaŋga gbɔn pe na pe kotogo ki sogo pe na†.
3 Siyɔn* ca woolo mbele kunwɔ kayaŋga gbɔn pe na, lìlan tun mbe pe pye pe pyeri,
mbe wunluwɔ njala kan pe yeri cɔnrɔ ti yɔnlɔ†,
mbe nayinmɛ sinmɛ nuwɔ taan wo pe yinrɛ ti na kunwɔ gbelege ki yɔnlɔ,
mbe sɔnmɔ yaripɔrɔ le pe kan yɛsanga ki yɔnlɔ.
Pa kona leele pe yaa kaa pe yinri kasinŋge ki terebɛnti* tire,
ki tire nda Yawe Yɛnŋɛlɛ lì sanri mbaa li gbɔgɔwɔ pi nari.
4 Pe yaa ka katara lɛrɛ ti kan mberi yirige naa fɔnŋgɔ;
yinrɛ nda tìla toori maga lɛ wa faa, pe yaa kari kan naa fɔnŋgɔ,
cara nda tìla tɔngɔ ma koro waga maga lɛ wa wagati titɔnlɔwɔ ni,
pe yaa kari kan naa fɔnŋgɔ.
5 Nambanmbala pele yaa ka pan mbaa ye simbaala naa sikaala pe kɔnri,
cɛngɛlɛ kele yɛgɛ woolo pe yaa ka pan mbaa ye kɛɛrɛ ti kɔɔn ye kan konaa mbaa ye ɛrɛzɛn* tiire kɛɛrɛ ti fali ye kan.
6 Ɛɛn fɔ yoro wo na, pe yaa kaa ye yinri: «Yawe Yɛnŋɛlɛ li saraga wɔfɛnnɛ*,»
leele pe yaa kaa ye yinri: «We Yɛnŋɛlɛ li tunmbyeele.»
Ye yaa kaa cɛngɛlɛ sanŋgala ke yarijɛndɛ ti tanwa pi nii,
mbe pe gbɔgɔwɔ pi lɛ, mbe ye yɛɛ fere pi ni.
7 Ye yaa gbɔgɔwɔ shyɛn ta fɛrɛ nda tìla ye ta ti yɔnlɔ;
ye yaa yɔgɔrimɔ ta tifagawa mba pìla gbɔn ye na pi yɔnlɔ.
Ye yaa ka ye tara ti gbemɛ pi yɔngɔ shyɛnzhyɛn ta wa pe tara ti ni;
ye nayinmɛ pi se ka kɔ fyew.
8 «Katugu mi ŋa Yawe Yɛnŋɛlɛ, kaselege ko ki yɛn mala ndanla,
ɛɛn fɔ beŋganri kapyere to naa nambara wi ni ti yɛn mala mbɛn;
mi yaa ka pe kajɛŋgɛ ki sara wi kan pe yeri, mbe yala mi yɛn sɛnrɛ nuŋgba yofɔ yɛgɛ ŋga na ki ni,
mi yaa ka yɔn finliwɛ* mbakɔɔ le pe ni.»
9 Pe yaa ka ye setirige piile pe jɛn mbe pe wɔ pe yɛ wa cɛngɛlɛ sanŋgala ke sɔgɔwɔ,
mbe ye piile pe jɛn mbe pe wɔ pe yɛ wa tara sannda ti ni.
Leele mbele fuun ka ka pe yan,
pe yaa ki jɛn mbe yo fɔ Yawe Yɛnŋɛlɛ lì duwaw cɛnlɛ na na lo li.
Zheruzalɛmu ca woolo
10 Zheruzalɛmu ca kì yo fɔ:
«Mi yaa la nayinmɛ nii jɛŋgɛ Yawe Yɛnŋɛlɛ li kala na,
mi yaa la yɔgɔri wa na nawa na Yɛnŋɛlɛ li kala na;
katugu lì shɔwɔ pi le na na paa yaripɔrɔ yɛn,
ma kasinŋge ki le na na paa derigbɔgɔ yɛn,
paa yɛgɛ ŋga na japɔlɔ ma kaa nɔrɔmiri wi migi wa wi yɛɛ go na, maa yɛɛ fere we,
paa yɛgɛ ŋga na pijɔ ma kaa wi fereyaara le wi yɛɛ na we†.»
11 Tara ti ma ti yariluguro ti ma fi ma yiri yɛgɛ ŋga na,
naŋgɔ kɛrɛ ti ma ti sɛgɛ yaara ti ma fi ma yiri yɛgɛ ŋga na,
pa we Fɔ, Yawe Yɛnŋɛlɛ li yaa ka kasinŋge konaa li sɔnmɔ pi ni ti pye mberi yirige cɛngɛlɛ ke ni fuun ke yɛgɛ na ma.