Zheruzalɛmu ca ki yaa gbɔgɔwɔ ta
60
1 «Zheruzalɛmu ca, yiri maa yɛngɛlɛ, katugu ma yanwa pì pan.Yawe Yɛnŋɛlɛ li gbɔgɔwɔ yanwa pi yɛn na yinrigi ma kan.
2 Wele, diwi wì tara ti tɔn muŋga,
diwi wɔlɔ lì ye ma cɛngɛlɛ ke yɔn tɔn;
ɛɛn fɔ mboro wo na, Yawe Yɛnŋɛlɛ li yaa yanwa yirige ma kan,
li gbɔgɔwɔ yanwa pi yaa la yinrigi ma kan.
3 Cɛngɛlɛ kele yɛgɛ yaa kaa tanri mbaa paan ma yanwa pi na,
yanwa mba pila yinrigi ma kan, wunlumbolo pele yaa kaa tanri, mbaa paan wa pi na.
4 «Ma yɛgɛ ki yirige ma wele mɔɔ yɛɛ maga;
pe pe ni fuun pe yɛn na pe yɛɛ gbogolo, mbe pan ma kɔrɔgɔ.
Ma pinambiile pè yiri fɔ lege na paan,
pɔ̀ɔn sumborombiile pe lɛ pajoro na na paan pe ni.
5 Na maga ka pe yan, ma nawa pi yaa yinŋgi,
ma yaa la yɔgɔri fɔ sa toro ki da wi na;
katugu pe yaa ka pan kɔgɔje wi nawa yarijɛndɛ ti ni ma kɔrɔgɔ,
cɛngɛlɛ sanŋgala ke yarijɛndɛ ti yaa ka pan ma kɔrɔgɔ.
6 «Yɔngɔmɛye lɛgɛrɛ yaa ka pan mbɔɔn tara ti yin,
Madiyan tara naa Efa tara yɔngɔmɛye wele.
Pe ni fuun pe yaa ka yiri wa Saba tara mbe pan;
pe yaa ka pan tɛ naa wusuna nuwɔ taan ni,
pe yaa kaa Yawe Yɛnŋɛlɛ li sɔnmɔ kagala ke yari yuuro ni.
7 Kedari tara yaayoro ŋgbeleye yi ni fuun yi yaa ka yi yɛɛ gbogolo wa ma tanla,
Nebayɔti cɛnlɛ woolo pe simbapɛnɛ pe yaa ka pye ma kɛɛ na.
Pe yaa ka pye saraga sogoworo* wa na saraga wɔsaga* ki na, saraga ŋga ki yɛn mala ndanla.
Mi yaa na gbɔgɔwɔ yanwa pi tɛgɛ mbe gbɔgɔwɔ taga na shɛrigo gbɔgɔ ki na†.
8 «Ambɛnɛ pe yiri na toro wa naayeri paa kambaara yɛn,
paa jɛndɛtuwaye yɛn, mbele pe yɛn na kee pe sinlɛsaga?
9 Lɔgɔ furo* tara fɛnnɛ mbele wa kɔgɔje wi puŋgo na, pe jigi wi yɛn mi na,
Tarisisi tara tɔnmɔkɔɔrɔ tugbɔɔrɔ to ti yaa keli yɛgɛ,
ti yaa kɔɔn piile pe lɛ fɔ wa taleere ti ni, mbe pan pe ni;
ti yaa pan pe warifuwe naa pe tɛ wi ni,
pe yaa pan mbe gbɔgɔwɔ taga Yawe Yɛnŋɛlɛ, ma Yɛnŋɛlɛ li mɛgɛ ki na,
Izirayɛli* woolo Yɛnŋɛlɛ kpoyi* na lì gbɔgɔwɔ kan ma yeri we.
10 «Cɛnlɛ la yɛgɛ woolo yaa ka pan mbɔɔn ca mboro ti kan,
pe wunlumbolo pe yaa kaa tunŋgo piin ma kan;
na naŋgbanwa pi kala na mìla ma gbɔn,
ɛɛn fɔ koni, na kajɛŋgɛ pyege ki kala na, mi yaa ma yinriwɛ ta.
11 Ma ca mboro yeyɔnrɔ ti yaa koro yɛlɛndɛ sanga pyew,
ti se ka tɔn yɔnlɔ na, ti se si ka tɔn yembinɛ,
jaŋgo cɛngɛlɛ sanŋgala ke yarijɛndɛ ti pan ti ye laga ma ni,
pe wunlumbolo fun pe tanli pe yɛɛ na, pe pan pe ye laga ma ni.
12 «Katugu cɛnlɛ nakoma wunluwɔ tara nda ti woolo pee yɛnlɛ mbaa tunŋgo piin ma kan, poro yaa kɔ mbe wɔ wa,
ki cɛngɛlɛ ke yaa tɔngɔ pew.
13 «Liban tara gbɔgɔwɔ pi yaa ka pan mbe pye ma woo,
mi yaa ti sipirɛsi* tire, naa pɛn tire konaa buyisi tire mbe pan wa ma ni,
jaŋgo mberi tɛgɛ mbanla laga kpoyi* ki gbegele mbege fere ti ni,
mbe gbɔgɔwɔ kan na cɛnsaga ki yeri.
14 Ma jɔlɔfɛnnɛ pe pinambiile pe yaa ka pan, mbaa pe yɛɛ tinrigi ma yɛgɛ sɔgɔwɔ;
mbele pàa pye nɔɔ tifaga pe yaa ka pan, mbaa fɔli ma jegele.
Pe yaa kaa ma yinri fɔ: ‹Yawe Yɛnŋɛlɛ li ca›,
konaa ‹Izirayɛli woolo Yɛnŋɛlɛ kpoyi li ca Siyɔn.›
15 «Leele pàa je ma na, mɔɔ panra,
lere kpɛ sila pye na paan wa ma yeri naa;
ɛɛn fɔ mi yaa ma yɔlɔgɔ ki yirige caw fɔ sanga pyew,
mbe ti setirige piile mbele fuun pe yaa ka yiri puŋgo na, paa yɔgɔri ma kala na.
16 Ma yaa kaa cɛngɛlɛ sanŋgala ke nɔnɔ wi woo,
wunlumbolo pe yaa kaa ma yɔn suro ti woo, paa yɛgɛ ŋga na jɛlɛ maa pyɔ kaan wi maa wɔnri we.
Pa kona ma yaa ki jɛn mbe yo fɔ muwi mi yɛn Yawe Yɛnŋɛlɛ, ma shɔfɔ we,
konaa ma go shɔfɔ, Zhakɔbu Yɛnŋɛlɛ na fanŋga gbɔgɔfɔ we.
17 «Mi yaa ka pan tɛ ni ma kan tuguyɛnrɛ ti yɔnlɔ,
mbe pan warifuwe ni ma kan tugurɔn ti yɔnlɔ,
mbe pan tuguyɛnrɛ ni ma kan tire ti yɔnlɔ,
mbe pan tugurɔn ni ma kan sinndɛɛrɛ ti yɔnlɔ.
Mi yaa ka yɛyinŋge ki kan kila ye go singi,
mbe kasinŋge ki pye ye kagala yɛgɛ wɔfɔ.
18 Pe se kaa beŋganri kapyere sɛnrɛ nuru wa ma tara naa,
jɔgɔwɔ nakoma tɔngɔwɔ sɛnrɛ se ka logo fɔ sa gbɔn wa ma tara kɔngɔlɔ ke na.
Ɛɛn fɔ ma yaa kɔɔn ca mboro ti mɛgɛ taga mbaa ti yinri Shɔwɔ,
mbe yeyɔnrɔ ti mɛgɛ taga mbaa ti yinri Yɛnŋɛlɛ li Sɔnmɔ.
19 «Yɔnlɔ na, yɔnlɔ ko ma ki yaa kaa yanwa yinrigi ma kan,
yembinɛ, yeŋge ko ma ki yaa kaa yanwa yinrigi ma kan;
ɛɛn fɔ Yawe Yɛnŋɛlɛ lo li yaa ka pye yanwa ma kan fɔ sanga pyew,
ma Yɛnŋɛlɛ lo li yaa ka pye ma gbɔgɔwɔ yanwa we†.
20 Ma yɔnlɔ ki se ka to naa,
ma yeŋge ki se ka ye diwi naa;
katugu Yawe Yɛnŋɛlɛ lo li yaa pye ma yanwa fɔ sanga pyew,
ma kunwɔ gbelege ki yaa ka kɔ.
21 «Ma woolo pe ni fuun pe yaa ka pye lesinmbele,
pe yaa ka tara ti ta ti pye pe woro fɔ sanga pyew;
katugu pe yɛn paa tige vige yɛn, ŋga mi sanri na yɛ,
na kɛyɛn yo yìgi tunŋgo ki pye, jaŋgo mbe gbɔgɔwɔ taga na yɛɛ na.
22 Ma woolo pe ni, sege ŋga kì kologo, poro yaa ka lɛgɛ mbe pye lere waga kele (1 000),
cɛnlɛ na lì kologo ma wɛ ke ni fuun na, lo yaa ka pye cɛnlɛ gbenɛ fanŋga wolo.
Mi ŋa Yawe Yɛnŋɛlɛ, mi yaa fyɛɛlɛ mbe ki kagala ke pye mbe ke yɔn fili ke wagati wi na.»