Yɛnŋɛlɛ li lasiri wi yɛn ma yɔn
119
1 Leele mbele pe tangalɔmɔ pi yɛn ma sin,poro mbele pe maa tanri na yala Yawe Yɛnŋɛlɛ li lasiri* wi ni,
fɛrɛwɛ yɛn pe woo†!
2 Leele mbele fuun pe ma li kondɛgɛŋgɛlɛ ke lɛ na tanri ke na,
konaa naga lagajaa mbaa li nandanwa kala li piin pe kotogo ki ni fuun ni,
fɛrɛwɛ yɛn pe woo!
3 Poro na la kambasinŋge piin,
Yɛnŋɛlɛ li koŋgolo koro pe maa tanri ke na.
4 We Fɔ, mɔ̀ɔ katɛgɛŋgɛlɛ ke naga we na,
jaŋgo we ke yigi waa tanri ke na tiyɔngɔ.
5 Ki yaga na tangalɔmɔ pi pye pi sin,
jaŋgo mbe ya mbɔɔn katɛgɛŋgɛlɛ ke yigi mbaa tanri ke na!
6 Pa kona mi se ka fɛrɛ shɔ,
na mi kaa ma ŋgasegele ke ni fuun ke jate we.
7 Mi yaa lɔɔn shari lɔɔn sɔnni kotogo sinŋge ni,
mbe koro mbaa ma kakɔnndɛgɛŋgɛlɛ ke kara, koro ŋgele ke yɛn ma sin we.
8 Mi yaa ma kondɛgɛŋgɛlɛ ke yigi mbaa tanri ke na,
ki kala na, maga kanla wa pew!
9 Lefɔnŋɔ wi mbe ya mboo tangalɔmɔ pi pye fyɔngɔ fu mɛlɛ?
Kaawɔ wɔɔn sɛnrɛ to yigi wila tanri ti na.
10 Mi yɛn nɔɔ lagajaa na kotogo ki ni fuun ni,
maga ka ti mbe wa mbe la ma ŋgasegele ke na!
11 Mɔ̀ɔ sɛnyoro ti tɛgɛ wa na kotogo na,
jaŋgo mi ka ka kapege pye ma na.
12 E, Yawe Yɛnŋɛlɛ, mi yɛn nɔɔ sɔnni!
Na naga ma kondɛgɛŋgɛlɛ ke ni!
13 Kakɔnndɛgɛŋgɛlɛ ŋgele fuun mà yo wa ma yɔn,
mi yɛn na ke ni fuun nuŋgba nuŋgba ke yɛgɛ yuun.
14 Mbaa tanri ma kondɛgɛŋgɛlɛ ke na, ki ma nayinmɛ kan na yeri,
ma pye ndɛɛ mì yarijɛndɛ lɛgɛrɛ ta.
15 Mi yɛn na sɔnri ma katɛgɛŋgɛlɛ ke na,
konaa màla jatere wi tɛgɛ ma koŋgolo ke na.
16 Ma kondɛgɛŋgɛlɛ ke yɛn mala ndanla,
mi se fɛgɛ ma sɛnrɛ ti na.
17 Kajɛŋgɛ pye mi ŋa ma tunmbyee na kan,
jaŋgo mbe koro yinwege na mbɔɔn sɛnrɛ ti yigi mbaa tanri ti na!
18 Na yɛngɛlɛ ke yɛngɛ,
jaŋgo kagbɔgɔlɔ ŋgele wa ma lasiri* wi ni, mbe ke yan!
19 Mi yɛn nambanŋa laga tara ti na,
maga kɔɔn ŋgasegele ke lara na na!
20 Ma kakɔnndɛgɛŋgɛlɛ ke la yɛn na na sanga pyew,
fɔ a ke wogo kì ŋgban na ni wa na kotogo na.
21 Mbele pe maa pe yɛɛ gbogo, ma ma sɛnŋgbanra yo pe na,
poro mbele pe yɛn ma daŋga we,
poro mbele pè pe yɛɛ puŋgo ma lali ma ŋgasegele ke ni we.
22 Na shɔ tɛgɛlɛ na paa na tegele konaa tifagawa mba paa na tifaga pi kɛɛ,
katugu mi yɛn na tanri ma kondɛgɛŋgɛlɛ ke na.
23 Ali na kundigile paga cɛn mbe yɔn le na mɛgɛ ni,
mi ŋa ma tunmbyee, mi wo yaa la jatere piin ma kondɛgɛŋgɛlɛ koro na.
24 Ma kondɛgɛŋgɛlɛ ke yɛn mala ndanla,
koro ke yɛn na yɛrifɔ we.
25 Mi ŋa mì sinlɛ tara, wa taambugɔ ki ni,
yinwege kan na yeri naa, mbe yala ma sɛnrɛ ti ni!
26 Mìlan kagala ke yɛgɛ yo ma kan, a màla yɔn sogo;
ki yaga mɔɔ kondɛgɛŋgɛlɛ ke naga na na!
27 Ma katɛgɛŋgɛlɛ ke yɛn na konɔ na nari, ki yaga mbeli jɛn mbe wali li na,
jaŋgo mbaa sɔnri ma kafɔnŋgɔlɔ ke na!
28 Jatere pirindorogo kìlan nawa pi tanga na na,
na yirige mala saga, mbe yala ma sɛnrɛ ti ni!
29 Yagbogolo konɔ li laga lali na ni;
ɛɛn fɔ ki yaga ma yɔn na na, ma ti mbɔɔn lasiri koŋgolo ke jɛn mbaa tanri ke na!
30 Kaselege konɔ lo mì lɛ,
mi yɛn na tanri na yala ma kakɔnndɛgɛŋgɛlɛ ke ni.
31 Mi yaa koro mbe mara ma kondɛgɛŋgɛlɛ ke na,
Yawe Yɛnŋɛlɛ, maga ka ti fɛrɛ mbanla ta!
32 Mi yɛn na fogolo mbaa tanri wa ma ŋgasegele konɔ li ni,
katugu màla jatere wi yɛngɛ na kan.
33 Yawe Yɛnŋɛlɛ, na naga ma kondɛgɛŋgɛlɛ ke ni,
jaŋgo mbaa tanri ke na fɔ sa gbɔn wa ki kɔsaga!
34 Tijinliwɛ kan na yeri, jaŋgo mbe ya mbaa tanri ma lasiri wi na,
mboo yigi mbaa tanri wi na, na kotogo ki ni fuun ni!
35 Na yɛgɛ sin mbaa tanri wa ma ŋgasegele konɔ li ni,
katugu ki wogo ki yɛn mala ndanla!
36 Ma ti na jatere wi pye ma kondɛgɛŋgɛlɛ koro na,
wiga ka kari na yɛɛra tɔnli jawa po yeri!
37 Ma ti na yɛgɛ ki wɔ wa yaara nda ti yɛn go fu ti yeri,
ma ti mbaa tanri wa ma konɔ li ni!
38 Yɔn fɔlɔ* na mà kɔn mbele pe maa fyɛ ma yɛgɛ pe yeri,
li yɔn fili mi ŋa ma tunmbyee na kanŋgɔlɔ!
39 Mi yɛn na fyɛ tifagawa sɛnrɛ nda yɛgɛ, ti laga lali na ni,
katugu ma kakɔnndɛgɛŋgɛlɛ ke yɛn ma yɔn!
40 Wele, ma katɛgɛŋgɛlɛ ke la yɛn na na fɔ jɛŋgɛ,
yinwege kan na yeri ma kasinŋge ki fanŋga na!
41 Yawe Yɛnŋɛlɛ, ki yaga mɔɔ kagbaraga ki pye na kan;
na shɔ, mbe yala ma yɔn fɔlɔ na mà kɔn li ni!
42 Ki ka pye ma, mbele pe yɛn nala tegele, mbe ya mbe pe yɔn sogo,
katugu mì taga ma sɛnrɛ ti na.
43 Maga ka ti kaselege sɛnrɛ ti kɔ wa na yɔn,
katugu na jigi wi yɛn ma kakɔnndɛgɛŋgɛlɛ koro na.
44 Mi yaa la tanri ma lasiri koŋgolo ke na suyi,
mbe koro ki na fɔ tetete.
45 Mi yaa la tanri yɛyinŋge na yinwege ki ni,
katugu mi yɛn naga lagajaa mbaa tanri ma katɛgɛŋgɛlɛ koro na.
46 Mi yaa lɔɔn kondɛgɛŋgɛlɛ ke yɛgɛ yuun wunlumbolo pe kan,
ki se pye na yeri fɛrɛ ni.
47 Ma ŋgasegele ke kala li yɛn mala ndanla,
ke yɛn mala ndanla.
48 Mìlan kɛyɛn yi yirige ma ŋgasegele ke yeri nɔɔ yɛnri, katugu ke yɛn mala ndanla;
mila jaa mbaa sɔnri ma kondɛgɛŋgɛlɛ ke na.
49 Sɛnrɛ nda mà yo mi ŋa ma tunmbyee na kanŋgɔlɔ, ma jatere wi tɛgɛ ti na,
to ti yɛn na jigi tagasaga kaan na yeri.
50 To ti maa na kotogo ki sogo na na jɔlɔgɔ sanga ni,
katugu yɔn fɔlɔ na mà lɛ na yeri, li yɛn na yinwege kaan na yeri.
51 Mbele pe maa pe yɛɛ gbogo, pe yɛn naga lakoo na na,
ɛɛn fɔ mi se kɛ mbe wɔ wa ma lasiri konɔ li ni.
52 Yawe Yɛnŋɛlɛ, ma kakɔnndɛgɛŋgɛlɛ ŋgele mà kan we yeri maga lɛ wa faa, na mi ka nawa to ke na,
ki mala kotogo ki sogo na na.
53 Kayaŋga gbɔgɔ ma pye na ni,
na mi ka lepeele pe yan pè je ma lasiri wi na we.
54 Mi yɛn nɔɔ kondɛgɛŋgɛlɛ ke koo yurugo,
mbanla ta laga ki tara nda ti ni paa nambanŋa yɛn.
55 E, Yawe Yɛnŋɛlɛ, mi maa jatere piin ma wogo ki na yembinɛ,
mɔ̀ɔ lasiri konɔ li yigi na tanri li na.
56 Ŋga ki yɛn na tasaga ye,
ko yɛn fɔ mbɔɔn katɛgɛŋgɛlɛ ke yigi mbaa tanri ke na.
57 E, Yawe Yɛnŋɛlɛ, ŋga ki yɛn na tasaga ye, mi yaa sɔngɔrɔ mbege yo,
ko ki yɛn mbɔɔn sɛnrɛ ti yigi mbaa tanri ti na.
58 Mi yɛn naga jaa na kotogo ki ni fuun ni, na kala lɔɔn ndanla,
yinmɛ tirige na na, mbe yala ma sɛnyoro ti ni!
59 Mìlan tangalɔmɔ pi cancan ma wele,
mila jaa mbe sɔngɔrɔ mbaa tanri ma kondɛgɛŋgɛlɛ ke na.
60 Mi woro na mɔlɔ, mila fyɛɛlɛ,
mbɔɔn ŋgasegele ke yigi mbaa tanri ke na.
61 Lepeele pànla yigi pe mɛrɛ ti ni,
ɛɛn fɔ, mii fɛgɛ ma lasiri wi na.
62 Mi ma yiri yindɛgɛ na mɔɔ sɔn,
ma kakɔnndɛgɛŋgɛlɛ ke kala na, koro ŋgele ke yɛn ma sin we.
63 Mbele fuun pe maa fyɛ ma yɛgɛ,
konaa mbele pe maa tanri ma katɛgɛŋgɛlɛ ke na, mi yɛn pe wɔnlɔ.
64 Yawe Yɛnŋɛlɛ, ma kagbaraga kì tara ti yin,
ma kondɛgɛŋgɛlɛ ke naga na na!
65 Yawe Yɛnŋɛlɛ, ma maa kajɛŋgɛ piin mi ŋa ma tunmbyee na kan,
ma yala ma sɛnrɛ ti ni.
66 Na naga mbaa kagala ke jɛnni mbaa ke woo ke yɛɛ ni konaa kajɛnmɛ ni,
katugu mì taga ma ŋgasegele ke na!
67 Sanni ma sanla le jɔlɔgɔ, mìla puŋgo,
ɛɛn fɔ koni, mɔ̀ɔ sɛnyoro ti yigi na tanri ti na.
68 Ma yɛn jɛnŋɛ, ma maa kajɛŋgɛ piin;
ma kondɛgɛŋgɛlɛ ke naga na na!
69 Mbele pe maa pe yɛɛ gbogo, pe yɛn na finlɛlɛ na tari na na;
ɛɛn fɔ mi wo na, mi yɛn na tanri ma katɛgɛŋgɛlɛ ke na, na kotogo ki ni fuun ni.
70 Pe jatere wì tɔn pe na,
ɛɛn fɔ mi wo na, ma lasiri wi yɛn mala ndanla.
71 Naa màla le jɔlɔgɔ, kì pye katiyɔngɔ na yeri,
katugu kìlan kan mila ma kondɛgɛŋgɛlɛ ke kara.
72 Lasiri sɛnrɛ nda tì yiri wa ma yɔn, tì mbɔnrɔ na yeri
ma wɛ tɛ naa warifuwe yaara waga lɛgɛrɛ na.
73 Ma kɛyɛn yo yìlan fanri mala gbegele,
tijinliwɛ kan na yeri, jaŋgo mbɔɔn ŋgasegele ke kara mbe ke jɛn.
74 Mbele pe maa fyɛ ma yɛgɛ, pe yaa na yan mbaa yɔgɔri,
katugu pe yaa ki yan fɔ na jigi wi yɛn ma sɛnrɛ to na.
75 E, Yawe Yɛnŋɛlɛ, mìgi jɛn ma yo ma kakɔnndɛgɛŋgɛlɛ ke yɛn ma sin,
mà jɔlɔgɔ wa na na, ma yala ma kaselege ki ni.
76 Ma kagbaraga kìlan kotogo ki sogo na na,
ma yala ma sɛnyoro ti ni mi ŋa ma tunmbyee na kan.
77 Ki yaga mala yinriwɛ ta, jaŋgo mbe yinwege ta,
katugu ma lasiri wi kala li yɛn mala ndanla!
78 Mbele pe maa pe yɛɛ gbogo nala jɔlɔ go fu, fɛrɛ mbe pe yigi!
Mi wo na, mi yɛn na jatere piin ma katɛgɛŋgɛlɛ ke na.
79 Mbele pe maa fyɛ ma yɛgɛ, poro mbe sɔngɔrɔ pe pan na kɔrɔgɔ,
konaa mbele pɔ̀ɔn kondɛgɛŋgɛlɛ ke jɛn pe ni.
80 Ti mbaa tanri ma kondɛgɛŋgɛlɛ ke na nawa jɛmbɛ ni,
pa kona mi se fɛrɛ shɔ.
81 Ma shɔwɔ pi la yɛn na na fɔ ma saa toro, fɔ nala tege;
ɛɛn fɔ na jigi wi yɛn ma sɛnrɛ ti na.
82 Ma sɛnyoro mìri kapyege ki wele konɔ, fɔ a yɛngɛlɛ kè saa te,
ko mila na yɛɛ yewe fɔ: «Ma yaa na kotogo ki sogo na na wagati wiwiin ni?»
83 Mi yɛn paa sɛlɛgɛ kasha yɛn wirige go na, ŋga ki se ya yaraga ka yɔn,
ɛɛn fɔ mii fɛgɛ ma kondɛgɛŋgɛlɛ ke na.
84 Mi ŋa ma tunmbyee, na yinwege piliye yi koro jori?
Mbele pe yɛn nala jɔlɔ, ma yaa kiti wi kɔn pe na wagati wiwiin ni mbe pe jɔlɔ?
85 Mbele pe maa pe yɛɛ gbogo, pele yɛn na wege kɔɔn wa na yɛgɛ mbanla yigi,
mbe sigi ta ki woro ma yala ma lasiri konɔ li ni.
86 Ma ŋgasegele ke ni fuun ke yɛn kaselege,
pe yɛn nala jɔlɔ go fu, ki yaga mala saga!
87 Kìla koro jɛnri anmɛ paa na gbo mala wɔ laga tara ti ni,
ɛɛn fɔ mi wo na, mii je ma katɛgɛŋgɛlɛ ke na.
88 Ma kagbaraga ki kala na, yinwege kan na yeri,
jaŋgo sɛrɛya sɛnrɛ nda tì yiri wa ma yɔn mbaa tanri ti na!
89 E, Yawe Yɛnŋɛlɛ, ma sɛnrɛ ti yɛn wa fɔ sanga pyew,
ti yɛn kɔsaga fu wa yɛnŋɛlɛ na.
90 Ma yɛn sɛnrɛ nuŋgba yofɔ sanga pyew fɔ tetete,
mà tara ti gbegele mari teŋge, ti yɛn wa ti yɔngɔlɔ ke ni.
91 Ma kakɔnndɛgɛŋgɛlɛ koro fanŋga na yaara ti ni fuun ti yɛn wa nala,
katugu yaraga pyew ki yɛn na tunŋgo piin mboro kan.
92 Ndɛɛ ki pye ma lasiri wi kala li sila na ndanla,
anmɛ mìla ku wa na jɔlɔgɔ ki ni.
93 Mi se fɛgɛ ma katɛgɛŋgɛlɛ ke na fyew,
katugu koro fanŋga na, mà yinwege ki kan na yeri.
94 Mi yɛn mboro woo, na shɔ,
katugu mi yɛn na jaa mbaa tanri ma katɛgɛŋgɛlɛ koro na.
95 Lepeele pe yɛn nala singi mbanla gbo,
ɛɛn fɔ ma kondɛgɛŋgɛlɛ koro mi yɛn na nuru.
96 Mìgi yan fɔ yaraga pyew kɔsaga yɛn ki na,
ɛɛn fɔ ma ŋgasegele ke yɛn kɔnlɔ fu.
97 Wele, ma lasiri wi yɛn mala ndanla fɔ jɛŋgɛ,
mi maa sɔnri wi na pilige pyew.
98 Ma ŋgasegele kànla kan kajɛnmɛ ni ma wɛ na juguye pe na,
katugu ke yɛn na ni wagati wi ni fuun ni.
99 Kagala kɔrɔ jɛnmɛ yɛn na yeri ma wɛ na nagafɛnnɛ pe na,
katugu mi maa sɔnri jɛŋgɛ ma kondɛgɛŋgɛlɛ ke na.
100 Tijinliwɛ yɛn na yeri ma wɛ lelɛŋgbaara ti na,
katugu mɔ̀ɔ katɛgɛŋgɛlɛ ke yigi na tanri ke na.
101 Mi mala jele li kɔrɔsi kombele li ni,
jaŋgo mbe ya mbɔɔn sɛnrɛ ti yigi mbaa tanri ti na.
102 Mi se laga ma kakɔnndɛgɛŋgɛlɛ ke na fyew,
katugu mboro màla naga ke ni.
103 Ma sɛnrɛ ti yɛn ma tanla wa na yɔn,
tì tanla na ni ma wɛ sɛnrɛgɛ na.
104 Ma katɛgɛŋgɛlɛ kè tijinliwɛ kan na yeri,
ki kala na, yagbogolo koŋgolo ke yɛn mala mbɛn.
105 Ma sɛnrɛ ti yɛn paa fitanla yɛn wa na tɔɔrɔ ti nɔgɔ,
ti yɛn paa yanwa yɛn wa na konɔ li ni.
106 Mì wugu ki na, mi yaa sigi pye mbege yɔn fili,
fɔ mi yaa ma kakɔnndɛgɛŋgɛlɛ ke yigi mbaa tanri ke na, koro ŋgele ke yɛn ma sin we.
107 Màla le jɔlɔgɔ mala go ki sogo na na fɔ jɛŋgɛ;
Yawe Yɛnŋɛlɛ, yinwege kan na yeri mbe yala ma sɛnrɛ ti ni!
108 E, Yawe Yɛnŋɛlɛ, yɛnrɛgɛ ŋga mila yɛnri maga pye paa saraga yɛn ma yeri, yɛnlɛ ki na!
Mala kara ma kakɔnndɛgɛŋgɛlɛ ke ni!
109 Na yinwege ki yɛn kunwɔ pi yɔn na sanga pyew,
ɛɛn fɔ mi se fɛgɛ ma lasiri wi na.
110 Lepeele pè pɛŋgɛlɛ le na na,
ɛɛn fɔ, mi se ka laga ma katɛgɛŋgɛlɛ ke na.
111 Ma kondɛgɛŋgɛlɛ ke yɛn na kɔrɔgɔ tiyɔngɔ fɔ sanga pyew,
ti maa yɔgɔrimɔ kaan na yeri wa na kotogo na.
112 Mìgi kɔn wa na kotogo na mbaa tanri ma kondɛgɛŋgɛlɛ ke na,
wagati wi ni fuun ni, fɔ sa gbɔn wa ki kɔsaga.
113 Leele mbele pe nawa pi yɛn pe na shyɛnzhyɛn, pe kala lìlan mbɛn,
ma lasiri wo wi yɛn mala ndanla.
114 Mboro ma yɛn na larasaga naa na tugurɔn sigeyaraga* mbaa na go singi,
na jigi wi yɛn ma sɛnrɛ to na.
115 Yoro lepeele wele, ye ye yɛɛ laga lali na ni,
jaŋgo mbaa tanri na Yɛnŋɛlɛ li ŋgasegele ke na!
116 Na tɔgɔ ma yigi na ni, mbe yala ma sɛnyoro ti ni, jaŋgo mbe go ta;
maga ka ti mbe fɛrɛ shɔ na jigi tagasaga wogo ki na!
117 Na tɔgɔ ma yigi na ni, jaŋgo mbe ta mbe shɔ,
jaŋgo na yɛgɛ ki koro ma kondɛgɛŋgɛlɛ ke na fɔ sanga pyew!
118 Mbele fuun pe ma pe yɛɛ puŋgo ma laga ma kondɛgɛŋgɛlɛ ke na, ma ma je poro na;
katugu pe nambara kapyere ti yɛn yagbogowo.
119 Lepeele mbele fuun pe yɛn laga tara ti na, ma ma pe wa paa tugurɔn fire yɛn;
ki kala na, ma kondɛgɛŋgɛlɛ ke yɛn mala ndanla.
120 Mi yɛn na fyɛ ma yɛgɛ fɔ na seri,
mi yɛn na fyɛ ma kakɔnndɛgɛŋgɛlɛ ke yɛgɛ.
121 Mi yɛn na tanri kaselege konaa kasinŋge na,
maga kanla le na jɔlɔfɛnnɛ pe kɛɛ!
122 Mi ŋa ma tunmbyee, yere na ni mala wogo ki yɔn,
maga ka ti mbele pe maa pe yɛɛ gbogo panla yigi tijaanga!
123 Ma sagawa po naa shɔwɔ mba màa pi yɔn fɔlɔ lɛ mbanla shɔ,
mì wele ma saa te pi wogo na.
124 Mi ŋa ma tunmbyee, ki yaga mala yigi ma yala ma kagbaraga ki ni,
mala naga ma kondɛgɛŋgɛlɛ ke ni!
125 Mi yɛn ma tunmbyee, tijinliwɛ kan na yeri,
jaŋgo mbɔɔn kondɛgɛŋgɛlɛ ke jɛn!
126 Yawe Yɛnŋɛlɛ, wagati wì gbɔn ma kala la pye;
katugu leele pɔ̀ɔn lasiri wi jɔgɔ.
127 Mi wo na, ma ŋgasegele ke yɛn mala ndanla,
ke yɛn mala ndanla ma wɛ tɛ na, ma wɛ tɛ piiri na.
128 Ki kala na, ma katɛgɛŋgɛlɛ ke ni fuun ke yɛn ma sin na yɛgɛ na,
yagbogolo konɔ pyew li yɛn mala mbɛn.
129 Ma kondɛgɛŋgɛlɛ ke yɛn yaritiyɔngɔ,
ki kala na, mi yaa ti yigi mbaa tanri ti na.
130 Ma sɛnrɛ ti jɛnmɛ pi ma yanwa yirige lere kan,
ti ma tijinliwɛ kan kambajɛnŋɛ wi yeri.
131 Ma sɛnrɛ ti la kìlan yigi jɛŋgɛ,
ma ŋgasegele ke la yɛn na na fɔ jɛŋgɛ.
132 Surugu ma yɛgɛ wa na yeri, mala yinriwɛ ta,
paa yɛgɛ ŋga na ma yɛn ma mbele ndanla, màga kɔn maga tɛgɛ pe kan we!
133 Yeresaga kan na tangalɔmɔ pi yeri, mbe yala ma sɛnrɛ ti ni,
maga ka ti tipege ka kpɛ mbe fanŋga ta na na!
134 Na shɔ leele pe jɔlɔgɔ ki kɛɛ,
jaŋgo mbɔɔn katɛgɛŋgɛlɛ ke yigi mbaa tanri ke na!
135 Mi ŋa ma tunmbyee, ki yaga mala wele kajɛŋgɛ ni,
mala naga ma kondɛgɛŋgɛlɛ ke ni!
136 Mi yɛn na gbele na yɛntunwɔ lɛgɛrɛ woo,
katugu leele pe woro na tanri ma lasiri konɔ li na.
137 E, Yawe Yɛnŋɛlɛ, ma yɛn ma sin,
ma kakɔnndɛgɛŋgɛlɛ ke yɛn ma sin.
138 Mɔ̀ɔ kondɛgɛŋgɛlɛ ke kan kasinŋge ni,
konaa ma yɛn sɛnrɛ nuŋgba yofɔ yɛgɛ ŋga na ki ni.
139 Kayaŋga gbɔgɔ yɛn na ni fɔ jɛŋgɛ,
katugu na winfɛnnɛ pè fɛgɛ ma sɛnrɛ ti na.
140 Ma sɛnyoro tìri yɛɛ naga fɔ ti yɛn kaselege fɔ jɛŋgɛ,
mi ŋa ma tunmbyee ti yɛn mala ndanla.
141 Mì kologo, leele pe woro nala jate,
ɛɛn fɔ mi se fɛgɛ ma katɛgɛŋgɛlɛ ke na.
142 Ma kasinŋge ki yɛn kasinŋge ŋga ki yɛn kɔsaga fu,
ma lasiri wi yɛn kaselege.
143 Jɔlɔgɔ naa jatere piriwɛn yɛn na na,
konaa ki ni fuun, ma ŋgasegele ke maa nayinmɛ kaan na yeri.
144 Ma kondɛgɛŋgɛlɛ ke yɛn ma sin fɔ sanga pyew,
tijinliwɛ kan na yeri, mberi jɛn mbe wali ti na, jaŋgo mbe go ta!
145 Yawe Yɛnŋɛlɛ, mi yɛn nɔɔ yɛnri na kotogo ki ni fuun ni mala saga, na yɔn sogo,
jaŋgo mbɔɔn kondɛgɛŋgɛlɛ ke lɛ mbaa tanri ke na!
146 Mi yɛn nɔɔ yinri fɔ mala shɔ,
jaŋgo mbɔɔn kondɛgɛŋgɛlɛ ke yigi mbaa tanri ke na.
147 Mi ma keli lalaaga ki yɛgɛ mɔɔ yeri mala saga,
katugu na jigi wi yɛn ma sɛnrɛ to na.
148 Yembinɛ sanga wi ni fuun wi ni, mila la wɔnlɔ,
mi maa jatere piin ma sɛnyoro ti na.
149 Yawe Yɛnŋɛlɛ, ki yaga mala yerege ki logo ma kagbaraga ki kala na,
ki yaga mbe koro go na, mbe yala ma kakɔnndɛgɛŋgɛlɛ ke ni!
150 Mbele pe maa tipege gbɛgɛlɛ mbe pye, pe yɛn na fulo na tanla,
pe yɛn na pe yɛɛ laga lali ma lasiri wi ni.
151 Ɛɛn fɔ Yawe Yɛnŋɛlɛ, ma yɛn ma yɔngɔ na ni,
ma ŋgasegele ke ni fuun ke yɛn kaselege.
152 Maga lɛ wa wagati titɔnlɔwɔ ni, mìgi jɛn
ma yo ma kondɛgɛŋgɛlɛ màa ke kan ke koro wa fɔ sanga pyew.
153 Na jɔlɔgɔ kagala ke wele, mala shɔ,
katugu mi se fɛgɛ ma lasiri wi na!
154 Yere na kala li ni, mala go shɔ,
na yaga go na, mbe yala ma sɛnyoro ti ni!
155 Shɔwɔ pi laga yɛn ma lali lepeele pe ni,
katugu pe woro nɔɔ kondɛgɛŋgɛlɛ ke lagajaa.
156 Yawe Yɛnŋɛlɛ, ma yinriwɛ tawa pi yɛn ma gbɔgɔ,
na yaga go na ma kakɔnndɛgɛŋgɛlɛ ke fanŋga na!
157 Na jɔlɔfɛnnɛ naa na winfɛnnɛ pe yɛn ma lɛgɛ,
ɛɛn fɔ mi se kɛ mbe laga ma kondɛgɛŋgɛlɛ ke na.
158 Mì leele javafɛnnɛ pe yan, fɔ a pe la kì kɔ na na,
poro mbele pe sɔɔn sɛnyoro ti yigi mbaa tanri ti na.
159 Yawe Yɛnŋɛlɛ, ki jɛn maga jɛn fɔ ma katɛgɛŋgɛlɛ ke yɛn mala ndanla,
ki yaga mbe go ta ma kagbaraga ki kala na!
160 Ma sɛnrɛ ti go ko yɛn kaselege,
ma kakɔnndɛgɛŋgɛlɛ ke yɛn ma sin fɔ sanga pyew.
161 Kundigile pèle yiri nala jɔlɔ go fu,
ɛɛn fɔ, ma sɛnrɛ to nuŋgba ti maa fyɛrɛ waa na na.
162 Mi yɛn na yɔgɔri ma sɛnyoro ti kala na,
ma mbe yo fɔ lere ŋa yarijɛndɛ lɛgɛrɛ ta.
163 Yagbogowo pi yɛn mala mbɛn, pi yɛn ma tijanga na yeri,
ɛɛn fɔ ma lasiri wi yɛn mala ndanla.
164 Mi mɔɔ sɔn sɔnsaga kɔlɔshyɛn pilige nuŋgba ki ni,
ma kakɔnndɛgɛŋgɛlɛ ŋgele ke yɛn ma sin ke kala na.
165 Ma lasiri wi yɛn ma mbele ndanla, yɛyinŋge gbɔgɔ yɛn pe wogo,
yaraga ka kpɛ se ya mbe pe kan pe kurugo pe to.
166 E, Yawe Yɛnŋɛlɛ, na jigi wi yɛn ma na mala shɔ,
ma ŋgasegele koro mi yɛn na tanri ke na.
167 Mɔ̀ɔ kondɛgɛŋgɛlɛ ke yigi na tanri ke na, na kotogo ki ni fuun ni,
ti yɛn mala ndanla fɔ jɛŋgɛ.
168 Mɔ̀ɔ katɛgɛŋgɛlɛ koro naa ma kondɛgɛŋgɛlɛ ke yigi na tanri ke na,
katugu ma yɛgɛ yɛn na kapyegele ke ni fuun ke na.
169 Yawe Yɛnŋɛlɛ, ki yaga na yɛnrɛgɛ gbelege ki gbɔn wa ma na,
tijinliwɛ kan na yeri mbe yala ma sɛnrɛ ti ni.
170 Ki yaga na yɛnrɛwɛ gbɔɔ pi gbɔn wa ma na,
na shɔ mbe yala ma sɛnyoro ti ni!
171 Ki yaga mbaa ma sɔnni lɛgɛrɛ,
katugu ma yɛn nala nari ma kondɛgɛŋgɛlɛ ke ni!
172 Ki yaga mbaa ma sɛnyoro ti koo yurugo wa na yɔn,
katugu ma ŋgasegele ke yɛn ma sin!
173 Na saga ma kɛɛ ki ni,
katugu ma katɛgɛŋgɛlɛ koro mì wɔ mbaa piin!
174 E, Yawe Yɛnŋɛlɛ, ki la ki yɛn na na mala shɔ,
ma lasiri wi yɛn mala ndanla.
175 Ki yaga mbe koro go na mbaa ma sɔnni,
ma kakɔnndɛgɛŋgɛlɛ ke pye na sagawa!
176 Mi yɛn na yanri na toro paa simbapyɔ yɛn, ŋa wì puŋgo, yiri ma mi ŋa ma tunmbyee na lagaja;
katugu mii fɛgɛ ma ŋgasegele ke na!