Mi yaa lanla yinwege ki piin
118
1 Yaa Yawe Yɛnŋɛlɛ li shari yaa li sɔnni, katugu li yɛn jɛnnɛ,katugu li kagbaraga ki yɛn kɔsaga fu†!
2 Izirayɛli* woolo pe daga mbaa ki yuun fɔ:
«Li kagbaraga ki yɛn kɔsaga fu.»
3 Arɔn* setirige piile pe daga mbaa ki yuun fɔ:
«Li kagbaraga ki yɛn kɔsaga fu.»
4 Mbele pe maa fyɛ Yawe Yɛnŋɛlɛ li yɛgɛ pe daga mbaa ki yuun fɔ:
«Li kagbaraga ki yɛn kɔsaga fu.»
5 Mala ta wa na jɔlɔgɔ ki ni, mìla Yawe Yɛnŋɛlɛ li yeri lilan saga,
a Yawe Yɛnŋɛlɛ lìlan yɔn sogo, ma wogosaga kan na yeri.
6 Yawe Yɛnŋɛlɛ li yɛn na ni, mi woro na fyɛ yaraga ko ka yɛgɛ.
Yiŋgi sɛnwee mbe ya pye na na†?
7 Yawe Yɛnŋɛlɛ li yɛn na ni, lo li yɛn na sagafɔ we;
mi yaa kanla juguye pe tolo li yan.
8 Mɔɔ yɛɛ karafa Yawe Yɛnŋɛlɛ li na,
kò mbɔnrɔ mɔɔ jigi wi taga sɛnwee na ko na.
9 Mɔɔ yɛɛ karafa Yawe Yɛnŋɛlɛ li na,
kò mbɔnrɔ mɔɔ jigi wi taga legbɔɔlɔ na ko na.
10 Cɛngɛlɛ sanŋgala ke ni fuun kàa wa mala maga,
ɛɛn fɔ Yawe Yɛnŋɛlɛ li mɛgɛ ki fanŋga na, mìla pe tɔngɔ.
11 Pàa wa mala maga, mala wa njolo,
ɛɛn fɔ, Yawe Yɛnŋɛlɛ li mɛgɛ ki fanŋga na, mìla pe tɔngɔ.
12 Pàa wa mala maga paa sɛnrɛgɛ yɛn,
ɛɛn fɔ pàa ku ma wɔ wa paa wuuro kasɔn ma kaa figi we;
Yawe Yɛnŋɛlɛ li mɛgɛ ki fanŋga na, mìla pe tɔngɔ.
13 Pàa na wɔnrɔgɔ ŋgbanga mbe ta mbe to,
ɛɛn fo, a Yawe Yɛnŋɛlɛ lìlan saga.
14 Yawe Yɛnŋɛlɛ lo li yɛn na fanŋga ye, mi maa yuuro koo nali gbogo.
Lo li yɛn na shɔfɔ we†.
15 Lesinmbele pe yɛn na jɔrɔgi nayinmɛ ni,
na cew tawa kɔŋgɔlɔ waa wa pe paara yinrɛ* ti ni.
Yawe Yɛnŋɛlɛ li fanŋga kɛɛ ki yɛn na kagbɔgɔlɔ piin.
16 Yawe Yɛnŋɛlɛ lìli fanŋga kɛɛ ki yirige mbe cew kan,
Yawe Yɛnŋɛlɛ li fanŋga kɛɛ ki yɛn na kagbɔgɔlɔ piin.
17 Mi se ku, ɛɛn fɔ mi yaa koro go na,
jaŋgo mbaa Yawe Yɛnŋɛlɛ li kagala ke yɛgɛ yuun.
18 Yawe Yɛnŋɛlɛ lì jɔlɔgɔ wa na na fɔ jɛŋgɛ,
ɛɛn fɔ li silan yaga kunwɔ pi kan.
19 Ye kasinŋge go kɔɔrɔ† ti yɛngɛlɛ na kan,
jaŋgo mbe ye mbe Yawe Yɛnŋɛlɛ li shari mbeli sɔn.
20 Yawe Yɛnŋɛlɛ li go yeyɔngɔ koyi ŋga yɛɛn,
pa lesinmbele pe maa yiin wa ki ni.
21 We Fɔ, mi yaa ma shari mbɔɔn sɔn, katugu màla yɔn sogo,
mboro ma yɛn na shɔfɔ we.
22 Go wafɛnnɛ pè je sinndɛlɛgɛ ŋga na, ko kì pye go yɛnlɛ li sinndɛlɛgɛ koŋgbanŋga ye†.
23 Pa ko wogo ŋga kò yiri wa Yawe Yɛnŋɛlɛ li yeri,
a kì pye kagbɔgɔ we yɛgɛ na†.
24 Ko pilige ŋga yɛɛn, ko Yawe Yɛnŋɛlɛ lì kɔn ma tɛgɛ,
ye pan waa yɔgɔri waa nayinmɛ nii ki ni!
25 E, Yawe Yɛnŋɛlɛ, ki yaga ma we shɔ!
Yawe Yɛnŋɛlɛ, ki yaga we cew ta!
26 Ŋa wila paan Yawe Yɛnŋɛlɛ li mɛgɛ ki na, Yɛnŋɛlɛ sa duwaw wi na!
Mbe we ta wa Yawe Yɛnŋɛlɛ li shɛrigo gbɔgɔ* ki ni, we yaa duwaw pye ye kan†!
27 Yawe Yɛnŋɛlɛ lo li yɛn Yɛnŋɛlɛ le,
li maa yanwa yinrigi we kan!
Ye pan wa gbogolomɔ pi ni fɛti wi na, tige njere ni wa ye kɛyɛn yi ni,
fɔ sa gbɔn wa saraga wɔsaga* ki yɛnŋgɛlɛ ke tanla!
28 Mboro ma yɛn na Yɛnŋɛlɛ le, mi yaa lɔɔn shari mbaa ma sɔnni,
na Yɛnŋɛlɛ, mi yaa lɔɔn sɔnni.
29 Yaa Yawe Yɛnŋɛlɛ li shari yaa li sɔnni, katugu li yɛn jɛnnɛ,
li kagbaraga ki yɛn kɔsaga fu.