Leele pe daga
111
1 Yaa Yawe Yɛnŋɛlɛ li sɔnni!Mi yaa la Yawe Yɛnŋɛlɛ li shari mbaa li sɔnni na kotogo ki ni fuun ni,
wa lesinmbele pe finliwɛ pi na, wa janwa wi gbogolomɔ pi sɔgɔwɔ†.
2 Yawe Yɛnŋɛlɛ li kapyegele ke yɛn ma tugbɔlɔ,
ke yɛn ma mbele ndanla pe maa sɔnri ke na.
3 Tiyɔnwɔ naa gbɔgɔwɔ yɛn wa li kapyegele ke ni,
li yɛn ma sin fɔ sanga pyew.
4 Li yɛn na jaa leele paa nawa tuun li kafɔnŋgɔlɔ ke na,
Yawe Yɛnŋɛlɛ li yɛn jɛnnɛ konaa ma pye leele yinriwɛ tafɔ.
5 Mbele pe maa fyɛ li yɛgɛ, li maa pe yɔn suro ti kaan pe yeri,
li jatere wi yɛn li yɔn finliwɛ* pi na fɔ sanga pyew.
6 Lìli fanŋga ki naga li woolo pe na wa li kapyegele ke ni,
ma cɛngɛlɛ sanŋgala ke tara ti shɔ mari kan pe yeri.
7 Li kapyegele ke ni fuun ke yɛn naga nari fɔ li yɛn sɛnrɛ nuŋgba yofɔ konaa ma sin,
lere mbe ya taga li kakɔnndɛgɛŋgɛlɛ ke ni fuun ke na.
8 Ke yɛn ma gbegele ma tɛgɛ mbe koro wa sanga pyew fɔ tetete,
ke nɔgɔ ki yɛn ma cɛn kaselege naa kasinŋge ko na.
9 Lìli woolo pe go shɔ,
ma yɔn finliwɛ mbakɔɔ le pe ni;
li yɛn Yɛnŋɛlɛ na li yɛn kpoyi*, ma pye fyɛrɛ yaraga.
10 Mbaa fyɛ Yawe Yɛnŋɛlɛ li yɛgɛ ko ki yɛn kajɛnmɛ pi lɛsaga ye,
mbele fuun pe maa yigi na tanri pi na, poro yɛn tijinliwɛ fɛnnɛ.
We Fɔ wi daga paa wi sɔnni fɔ sanga pyew†!